Read Oshindonga-Ombiimbeli Ondjapuki OMAPISALOMI 71 Bible Online

OMAPISALOMI 71 - Oshindonga-Ombiimbeli Ondjapuki bible

OMAPISALOMI 71

¹Omuwa, omungoye awike te holama; ino etha ndi sindike.

²Kutha ndje mo moshiponga, hupitha ndje moluuyuuki woye; pulakena ndje e to hupitha ndje.

³Ninga eholameno lyandje lya kola nepopilongulu lyandje li shige ndje; ongoye eholameno nepopilo lyandje.

⁴Kalunga kandje, hupitha ndje miikaha yaakaanakalunga, moonkondo dhaakolokoshi nodhaadhudhu.

⁵Oshoka ongoye awike etegameno lyandje, onde ku inekela okuza muugundjuka wandje.

⁶Onde ku inekela okuza kevalo lyandje; owa piitha ndje mo moshivalelo shameme. Onda hala oku ku simaneka.

⁷Onda ningi nda fa ndaa shi omuntu momeho goyendji, ihe ongoye egameno lyandje.

⁸Otandi ku hambelele esiku kehe notandi tseyitha esimano lyoye.

⁹Ino ekelahi ndje, sho ndaa na oonkondo.

¹⁰Oshoka aatondi yandje oya hala okudhipaga ndje; otaa popi ndje nayi notaa ningi euvaneno lyawo.

¹¹Otaa ti: “Kalunga e mu thigi po; tu mu landuleni, tu mu kwate, oshoka kaku na ngo te mu popile.”

¹²Kalunga, ino kala ndje kokule; Kalunga kandje, endelela, u kwathe ndje.

¹³Aaponokeli yandje naa halakanithwe po e taa shundulwa; mbo ya halele ndje oshiponga, naa tidhwe po ya sa ohoni.

¹⁴Ihe ngame otandi kala aluhe nde ku inekela; otandi ku simaneke aluhe sigo aluhe.

¹⁵Otandi ka hokolola iilonga yoye iiwanawa; esiku kehe ondi na okutya: “Ongoye omuhupithi,” nonando ote nyengwa oku shi fatulula nawa.

¹⁶Omuwa Omupangeliawike, otandi simaneke oonkondo dhoye; uuwanawa owoye auke tandi hokolola.

¹⁷Kalunga, owa longo ndje okuza muugundjuka, sigo onena otandi uvitha iilonga yoye iikumithi.

¹⁸Ngashingeyi sho nda kulupa nondi na oomvi, ino etha ndje, Kalunga! Kala pungame, sho te tseyitha oonkondo niikumitha yoye komaluvalo taga landula.

¹⁹Kalunga, uuyuuki woye otau adha sigo okiikogo. Owa longa iikumitha; kaku na ngo e ku fa.

²⁰Owa tumine ndje uudhigu nuuwehame, ihe oto ka pa ndje oonkondo ishewe; ito ke etha, ndi ye mombila.

²¹Uukuluntu wandje u indjipalitha ngu u talaleke ndje ishewe.

²²Otandi ku hambelele nokaharpa; Kalunga kandje, otandi ku pandula, oshoka ou shi kwiinekelwa. Otandi ku imbile nokaharpa, Omuyapuki gwaIsrael.

²³Omilungu dhandje nadhi makuke kenyanyu, ngame ngaashi ndi li, otandi ku hambelele, oshoka owa hupitha ndje.

²⁴Esiku alihe otandi ka tumbula iilonga yuuyuuki woye, oshoka mbo ya li ya halele ndje oshiponga, oya mwenekwa e taa sithwa ohoni.