Read Oshindonga-Ombiimbeli Ondjapuki OMAPISALOMI 72 Bible Online

OMAPISALOMI 72 - Oshindonga-Ombiimbeli Ondjapuki bible

OMAPISALOMI 72

¹Episalomi lyaSalomo Kalunga, longa omukwaniilwa, a tokole oohapu pauyuuki woye. Mu lombwela, a landule eutho lyoye,

²opo a pangule aantu yoye pauyuuki, naathiminikwa e ya uthile nawa.

³Oondundu nadhi etele aantu uuyamba, niikulundundu nayi ze uuwanawa.

⁴Omukwaniilwa na popile aathiminikwa moshigwana; na kwathe oohepele e ta tidha po aahepeki.

⁵Manga etango li li ko, nomwedhi tagu monika, aantu yoye naye ku simaneke.

⁶Omukwaniilwa na kale naalelwa ye ngaashi omvula niimeno, omvula yomuzimbi tayi tutike evi.

⁷Uuyuuki nau pangele methimbo lye; ombili nayi kale moshilongo, manga omwedhi tagu minikile.

⁸Na pangele okuza kefuta sigo okefuta ekwawo, okuza kuEufrat sigo okooha dhuuyuni.

⁹Aakali mombuga otaa ke mu tsila oongolo, naatondi ye otaa ki ihata po.

¹⁰Aakwaniilwa yokuSpania naamboka yokoontuntu otaa ke mu etela oombalagelo; aakwaniilwa yokuSheba noyokuSeba otaa ke mu etela omagano.

¹¹Aakwaniilwa ayehe otaye ke mu tsila oongolo; iigwana ayihe otayi ke mu longela.

¹²Ota hupitha ohepele ngo te mu lilile, omuthiminikwa ngo kee na ngo te mu kwatha.

¹³Ota sile oshimbembe nohepele olukeno note ya hupitha meso.

¹⁴Ote ya hupitha methiminiko nomepiyagano, oshoka oomwenyo dhawo odhi na ondilo momeho ge.

¹⁵Omukwaniilwa na kale aluhe nomwenyo! Ne etelwe oshingoli shokuSheba. Aantu naye mu galikanene aluhe yo naye mu halele omayambeko gaKalunga esiku kehe.

¹⁶Moshilongo namu kale eloolo lyiilya; kiikulundundu naku kale omapya, niiyimati nayi monike ngaashi yokuLibanon. Iilando nayi udhe aantu ngaashi omwiidhi gwokelundu.

¹⁷Edhina lyomukwaniilwa nali simane sigo aluhe; nali kale ko ngaashi etango li li kegulu. Iigwana ayihe otayi ka yambekwa omolwe notayi ke mu ithana “Omulalekwa nuuyamba.”

¹⁸Esimano nali ninge lyOmuwa, Kalunga kaIsrael! Oye awike ha longo iikumitha ya tya ngeyi.

¹⁹Esimano nali ninge lyedhina lye sigo aluhe! Eadhimo lye nali udhithe uuyuni auhe. Amen! Amen!

²⁰Omagalikano gaDavid yaIsai oga hulile mpaka.