Read Oshindonga-Ombiimbeli Ondjapuki OMAPISALOMI 76 Bible Online

OMAPISALOMI 76 - Oshindonga-Ombiimbeli Ondjapuki bible

OMAPISALOMI 76

¹Episalomi lyaAsaf Kalunga okwa tseyika muJuda; edhina lye olya simana muIsrael.

²Okwa dhikile etsali muJerusalem; omutumba gwe ogu li muSion.

³Omo moka a hanagula po iikuti yaatondi, omahuuyanza nomagonga niikondjitho yawo ayihe.

⁴Omuwa, eadhimo lyoye enene ngiini! Esimano lyoye ekumithi, sho wa galuka koondundu hoka wa sindi aatondi yoye.

⁵Aalumentu omapenda oya luwa noya gwile moomposi dheso; oonkondo nuungomba wawo inau ya kwatha sha.

⁶Kegando lyoye, Kalunga kaJakob, uukambe naakayili yawo oya si.

⁷Omuwa, ongoye awike u na okutilika. Kaku na ngo ta vulu okukala koshipala shoye, uuna wa geya.

⁸Epangulo owe li tumbula u li megulu; uuyuni owa tila e tau mwena thilu,

⁹sho wa thikama, u pangele nou hupithe aathiminikwa kombanda yevi.

¹⁰Ondjahi yaantu otayi ka hulila moku ku simaneka, naamboka taa hupu miita, otaa ke ku pandula.

¹¹Uvanekela Omuwa Kalunga koye omauvaneko e to ga tsakanitha; iilongo ayihe yopuushiinda nayi ete oombalagelo kunguka e na okutilika.

¹²Kalunga ota shonopeke aapangeli aanuuntsa; ota tilitha aakwaniilwa yomuuyuni.