Read Oshindonga-Ombiimbeli Ondjapuki OMAPISALOMI 77 Bible Online

OMAPISALOMI 77 - Oshindonga-Ombiimbeli Ondjapuki bible

OMAPISALOMI 77

¹Episalomi lyaAsaf Otandi kugu kuKalunga; otandi mu ithana, oye notu uvu ndje.

²Methimbo lyuudhigu onda galikana Omuwa; muusiku onda yelutha omaako megalikano, ihe ite mono ehekeleko.

³Otandi ku dhiladhila, Kalunga, e tandi tongo; onda kunkwa nonda sholola.

⁴Onda tonata uusiku auhe; ondi na uudhigu noite vulu okupopya.

⁵Onda dhiladhila omasiku gonale nonda dhimbulukwa onakuziwa.

⁶Onda lala te dhiladhila nondi ipula nda ti:

⁷“Kalunga okwe tu ekelehi sigo aluhe? Ite tu sile we ohenda?

⁸Ohole ye yaaluhe oya hulu po? Euvaneko lye itali tsakanithwa we?

⁹Kalunga okwa dhimbwa kutya oye omunesilohenda? Ongeyo ye oya kutha po olukeno lwe?”

¹⁰Ngame onda ti: “Otashi ehameke ndje unene, sho oshikaha shaKalunga sha nkundipala.”

¹¹Itandi ka dhimbwa nando iilongankondo yoye, Omuwa; otandi ka dhimbulukwa iikumithalonga yoye yonale.

¹²Ote kala nokutedhatedha iilongankondo yoye; otandi dhimbulukwa iilonga yoye iinene.

¹³Iilonga yoye ayihe oya yapuka; kaku na gulwe omunene a fa Kalunga ketu.

¹⁴Ongoye Kalunga ho longo iikumitha; ho holola oonkondo dhoye mokati kaantu.

¹⁵Owa hupitha aantu yoye noshikaha shoye shoonkondo; oluvalo lwaJakob naJosef.

¹⁶Kalunga, omeya oge ku mono e taga tila; efuta ele olya kakama.

¹⁷Iikogo oya tilehi omeya; kegulu okwa zi omityalakato noombadhi dha shela koombinga adhihe.

¹⁸Omutyalakato gwoye ogu uvika moshikungulu, nolwaadhi olwa minikile uuyuni auhe; evi olyi inyenge e tali kakama.

¹⁹Owa taula omapola mefuta; wa pala ondjila mokati komeya omanene, ihe oompadhi dhoye inadhi monika.

²⁰Owe enditha aantu yoye ngaashi oshigunda shoonzi, omewiliko lyaMoses naAaron.