Read Oshindonga-Ombiimbeli Ondjapuki OMAPISALOMI 86 Bible Online

OMAPISALOMI 86 - Oshindonga-Ombiimbeli Ondjapuki bible

OMAPISALOMI 86

¹Egalikano lyaDavid Omuwa, pulakena e to yamukula ndje, oshoka ngame ohepele nomukwanaluhepo.

²Gamena ndje, oshoka ondi igameka kungoye. Ongoye Kalunga kandje, nangame omupiya gwoye nde ku inekela.

³Omuwa, sila ndje ohenda; otandi ku indile esiku alihe.

⁴Omuwa, nyanyudha omupiya gwoye, oshoka omagalikano gandje otaga yelukile kungoye.

⁵Omuwa, ongoye omunalukeno noho tu dhimine po; ou na esilohenda kumboka taye ku indile.

⁶Omuwa, uva egalikano lyandje; otandi lili, ndi silwe ohenda.

⁷Otandi ku ithana ethimbo kehe lyuudhigu, oshoka oho yamukula omaindilo gandje.

⁸Kaku na Kalunga gulwe e ku fa, Omuwa; kaku na ngo ta longo ngaashi ho longo.

⁹Iigwana ayihe mbyoka wa shiti, otayi ke ya e tayi ku tsile oongolo; otayi ke ku simaneka, Omuwa.

¹⁰Oshoka ongoye omunankondo noho longo iikumitha; ongoye awike Kalunga.

¹¹Omuwa, longa ndje, ndi tseye ehalo lyoye, notandi ka vulika nokukala moshili. Longa ndje, ndi ku simaneke nomwenyo aguhe.

¹²Omuwa Kalunga kandje, otandi ku hambelele nomwenyo aguhe; otandi ka hokolola uunene woye sigo aluhe.

¹³Ohole yoye onene ngiini kungame! Owa hupitha omwenyo gwandje meso lyo lyene.

¹⁴Kalunga, aanuuntsa otaa kondjitha ndje; ongundu yaakolokoshi oya hala okudhipaga ndje — oomboka kaaye na ko na sha nangoye.

¹⁵Ihe ngoye, Omuwa, ongoye Kalunga omunesilohenda nomunahole, omwiidhidhimiki, omunalukeno nomwiinekelwa.

¹⁶Tala ndje, u sile ndje ohenda; tula ndje omukumo e to hupitha ndje, oshoka ongame omupiya gwoye ngaashi meme a li.

¹⁷Omuwa, ulukila ndje endhindhiliko tali hololele ndje uuwanawa woye. Nena aatondi yandje ngele taye shi mono, otaa si ohoni, sho wa kwatha ndje nowa tsu ndje omukumo.