Read Oshindonga-Ombiimbeli Ondjapuki OMAPISALOMI 89 Bible Online

OMAPISALOMI 89 - Oshindonga-Ombiimbeli Ondjapuki bible

OMAPISALOMI 89

¹Oshitewo shaEthan Omuesrahi Omuwa, otandi imbi e tandi tanga esilohenda lyoye; otandi hokolola aluhe uudhiginini woye.

²Ondi shi shi ohole yoye otayi kala omathimbo agehe, uudhiginini woye owa kola ngaashi eyalelo.

³Owa ti: “Onda dhike ehangano naangoka nde mu hogolola; ondu uvanekele omupiya gwandje David nda ti:

⁴‘Gumwe gwomaamwoye ota ka kala aluhe omukwaniilwa; uukwaniilwa woye otii u kaleke po sigo aluhe.’ ”

⁵Omuwa, egulu otali imbi molwiikumitha yoye; aayapuki otaa hambelele oshili yoye.

⁶Omuwa, megulu kamu na nando ogumwe e ku fa; mokati koonakukala megulu kamu na ngo ta yelekwa nangoye.

⁷Ngoye owa simana mokati kaayapuki; ayehe ye li pungoye, otaye ku tila.

⁸Omuwa Kalunga Omunankondoawike, kaku na omunankondo e ku fa; Omuwa, ou shi kwiinekelwa miinima ayihe.

⁹Oto ngambeke efuta enene; oto mweneke omakuthikuthi galyo.

¹⁰Oto nyanyagula evovo Rahab e to li dhipaga po; oto sindi aatondi yoye noshikaha shoye oshinankondo.

¹¹Egulu olyoye, nosho wo evi; ongoye wa shiti uuyuni noshaa shoka shi li mo.

¹²Owa shiti uumbangalantu nuumbugantu; oondundu Tabor naHermon otadhi ku imbile nenyanyu.

¹³Ongoye omunankondo ngiini! Oshikaha shoye osha yeluka shi na oonkondo!

¹⁴Epangelo lyoye olya tungilwa kuuyuuki nokoshili; ohole nuudhiginini otayi holoka miilonga yoye.

¹⁵Aanelago oomboka haye ku simaneke noondjimbo; oomboka haa ende muuyelele wesilohenda lyoye.

¹⁶Ongoye enyanyu lyawo esiku alihe, notaye ku hambelelele uuwanawa woye.

¹⁷Ongoye esimano noonkondo dhetu; okehalo lyoye tatu sindana.

¹⁸Omuwa, owe tu hogololele omugameni; Kalunga kaIsrael omuyapuki okwe tu pe omukwaniilwa.

¹⁹Memoniko nalenale owa lombwele omupiya gwoye omukwaniilwa wa ti: “Onda kwatha omukwiita ofule nonda gandja epangelo kungoka nde mu hogolola mokati kaantu.

²⁰Omupiya gwandje David onde mu ningi omukwaniilwa, sho nde mu gwayeke nomugwayo omuyapuki.

²¹Oonkondo dhandje otadhi kala aluhe pamwe naye, noshikaha shandje otashi mu koleke.

²²Aatondi ye itaa ka sindana mokutsa ondumbo naye; aakaanakalunga itaye ke mu sinda.

²³Otandi nyanyagula po aatondi ye notandi dhipaga po aahepeki ye.

²⁴Otandi kala ndi mu hole nonde mu inekela. Otandi mu pe aluhe esindano.

²⁵Otandi ka taandeleka oshilongo she sigo okefuta, nepangelo lye sigo ohandiyaka yomilonga.

²⁶Oye ota ka lombwela ndje ta ti: ‘Ongoye tate naKalunga kandje; ongoye omugameni nomuhupithi gwandje.’

²⁷Otandi ke mu ninga osheeli shandje shomumati, omunene mokati kaakwaniilwa.

²⁸Euvaneko ndyoka nde mu uvanekele, otali ka kala aluhe lya kola; ehangano lyetu naye otali kala sigo aluhe.

²⁹Epangelo lye otali kala lya pama ngaashi eyalelo; moluvalo lwe otamu ka za ngo ta ningi omukwaniilwa aluhe.

³⁰“Ihe oonakuza muye mbaka ngele itaa vulika kompango yandje, noitaa ende ngaashi tandi ya lombwele,

³¹tashi ti, taa dhini omalongo gandje noitaa dhiginine iipango yandje,

³²nena otandi ya geelele oondjo dhawo notandi ya dhenge molwomayono gawo.

³³Ihe itandi etha okukala ndi hole David, nenge ndi dhimbwe shoka nde mu uvanekela.

³⁴Itandi ka teya po ehangano lyetu naye, nenge ndi ethe po euvaneko nando olimwelimwe nde li mu lombwela.

³⁵“Lumwe aluke olwa gwana, sho nde mu uvanekele nokugana okuyapuki: David itandi mu fundju.

³⁶Ota ka kala aluhe e na oluvalo, notandi kala nokugamena epangelo lye, manga etango li li ko tali minikile.

³⁷Otali kala ko ngaashi omwedhi gu li ko, ombangi yi shi kwiinekelwa yokeyalelo.”

³⁸Ihe nani owa geele omukwaniilwa omuhogololwa; owe mu thigi po nowe mu ekelehi.

³⁹Owa teya po ehangano lyeni naye, noshishani shepangelo lye owe shi umbile menono.

⁴⁰Owa teya po omakuma goshilando she; noohote dhe owe dhi thigi omakulukuma gowala.

⁴¹Ayehe mbo taa piti po, otaa yaka po eliko lye; aashiinda ye ayehe otaye mu yolo.

⁴²Aatondi ye owe ya pe esindano nowe ya nyanyudha.

⁴³Iikondjitho ye owe yi simpike nowe mu etha, a sindike molugodhi.

⁴⁴Owa hulitha po esimano lye, noshipundi shepangelo lye owe shi ekelehi.

⁴⁵Owe mu kulupike, ethimbo manga inaali thika; owe mu sitha ohoni.

⁴⁶Omuwa, oto kala wa holama sigo aluhe? Osigo uunake ondjahi yoye ya hwama ya fa omulilo?

⁴⁷Dhimbulukwa uuhupi womasiku gandje; tseya kutya aantu atuhe we tu shiti, otu na okusa.

⁴⁸Olye ta vulu okukala e na omwenyo itaa si? Omuntu ota vulu tuu okwiikeelela mombila?

⁴⁹Omuwa, ohole yoye yonale oyi li peni? Omauvaneko ngo wa pele David, oge li peni?

⁵⁰Omuwa, ino dhimbwa, nkene omupiya gwoye nda shekwa, sho ndi idhidhimikile omapopyo agehe giigwana.

⁵¹Omuwa, aatondi yoye oya sheke omukwaniilwa we mu hogolola; oye mu landula nomasheko shaa mpoka a yi.

⁵²Esimano nali ninge lyOmuwa sigo aluhe! Amen! Amen!