Read Oshindonga-Ombiimbeli Ondjapuki OMAPISALOMI 90 Bible Online

OMAPISALOMI 90 - Oshindonga-Ombiimbeli Ondjapuki bible

OMAPISALOMI 90

¹Egalikano lyaMoses, omumati gwaKalunga Omuwa, ongoye wa kala aluhe egameno lyetu.

²Manga inoo shita oondundu nomanga inoo holola po uuyuni, ngoye Kalunga kaaluhe oko wa li noto ka kala aluhe sigo aluhe.

³Oto lombwele omuntu, a shune mpoka a za; oto mu shuna montsi yevi.

⁴Oomvula eyuvi limwe koshipala shoye odha fa owala esiku limwe; ongesiku lyohela lya pita, nenge otundi yimwe muusiku.

⁵Aantu oto ya kombo po thilu; otaa piti po mbala ya fa ondjodhi. Omuntu okwa fa omwiidhi tagu tsapuka pepito lyetango.

⁶Pethimbo lyongula otagu koko notagu sheneke, ihe komatango otagu kukuta e tagu si.

⁷Otatu hulu po kondjahi yoye; otatu kana po kegeelo lyoye.

⁸Omayono getu owe ga kaleke koshipala shoye; oondjo dhetu dhomeholamo owe dhi holola puuyelele.

⁹Otse otatu hulu po kondjahi yoye; otatu kana po ngaashi omufudho.

¹⁰Oomvula dhokukalamwenyo kwetu omilongo heyali, nongele odhindji, omilongo hetatu, ihe odhi na uudhigu noluhodhi; otadhi piti po mbala twa fa twa tuka.

¹¹Olye a tseya oonkondo dhondjahi yoye? Olye e shi oshilanduliko shongeyo yoye?

¹²Tu longa okukoneka uuhupi womasiku getu, opo tu ninge aanandunge.

¹³Okugeya kwoye otaku tsikile sigo uunake? Omuwa, sila aapiya yoye ohenda!

¹⁴Ongula kehe tu ulukila esilohenda lyoye, opo tu imbe nenyanyu omasiku getu agehe.

¹⁵Tu nyanyudha ihe shi thike poluhodhi ndoka we tu pele, ngaashi twa mono iihuna ethimbo ele.

¹⁶Otse aapiya yoye, tu talitha iilongankondo yoye; talitha omaluvalo getu iilonga yoye ya simana.

¹⁷Omuwa Kalunga ketu, esilohenda lyoye nali kale kombanda yetu. Koleka iilonga yiikaha yetu!