Read Oshindonga-Ombiimbeli Ondjapuki OMAPISALOMI 92 Bible Online

OMAPISALOMI 92 - Oshindonga-Ombiimbeli Ondjapuki bible

OMAPISALOMI 92

¹Episalomi; Eimbilo lyasabati Omuwa, osho opala oku ku hambelela, okusimaneka edhina lyoye, Gwokombandambanda,

²okuuvitha ongula kehe esilohenda lyoye, nuusiku kehe uudhiginini woye.

³Otandi lilitha uuhumba wootheta; otandi imbi nokaharpa.

⁴Omuwa, iilongankondo yoye otayi nyanyudha ndje; otandi imbi nda nyanyukwa molwaashoka we shi longo.

⁵Omuwa, iilonga yoye iinene ngiini! Omadhiladhilo goye olye te ga pikula?

⁶Ngoka itee shi dhimbulula, oye omugoya, naangoka itee shi mono, ke na omayele.

⁷Aakaanakalunga nando naa kale muulinawa ya fa omwiidhi omutalala, aakolokoshi nando naa hupe nawa, ayehe otaa ka dhimwa po thilu.

⁸Oshoka ngoye Omuwa ou li kombandambanda sigo aluhe.

⁹Aatondi yoye, Omuwa, otaa ka hula po; aakolokoshi ayehe otaa ka kana po.

¹⁰Omuwa, owa pe ndje oonkondo dha fa dhonyati nowa laleke ndje nuuyamba.

¹¹Onda mono okusindika kwaatondi yandje nondu uvu okulila kwaakolokoshi.

¹²Aayuuki otaa ka koka ya fa omilunga; otaa ka ziza ya fa omisendeli dhaLibanon.

¹³Otaa fe omiti dha tsikwa mongulu yOmuwa, tadhi kokele motempeli yaKalunga ketu.

¹⁴Otadhi imi aluhe iiyimati; aluhe odha hapa nodha ziza.

¹⁵Shika otashi holola kutya Omuwa oye omuyuuki; oye omugameni gwandje, ke na nando uuwinayi.