Read Oshindonga-Ombiimbeli Ondjapuki OMAPISALOMI 94 Bible Online

OMAPISALOMI 94 - Oshindonga-Ombiimbeli Ondjapuki bible

OMAPISALOMI 94

¹Omuwa, ongoye Kalunga ho geele; holola ondjahi yoye!

²Ongoye omupanguli gwaantu ayehe; thikama, u pe aanuuntsa shoka ye shi ilongela.

³Omuwa, sigo uunake aakaanakalunga taa kala nokunyanyukwa? Sigo uunake, Omuwa?

⁴Sigo uunake aakolokoshi taa inenepeke notaa itangele uukolokoshi wawo?

⁵Omuwa, oyo taa thenyene aantu yoye kongudhi; otaa hepeke aantu yoye.

⁶Otaa dhipaga aaselekadhi noothigwa, osho wo aakwiilongo mbo ye li moshilongo.

⁷Otaa ti: “Omuwa ke tu wete; Kalunga kaIsrael ita dhimbulula sha.”

⁸Aantu yandje, one aagoya ngiini? Otamu ka ninga oondunge uunake?

⁹Kalunga ngoka e tu pa omakutsi, ota kala tuu ihu uvu ko? Kalunga ngoka e tu pa omeho, ota kala tuu ihaa mono ko?

¹⁰Omupangeli gwiigwana ita vulu oku yi geela? Omunongeki gwaantu ayehe ita tseya sha?

¹¹Omuwa okwa tseya ashihe shoka taa dhiladhila; okwa tseya uuhupi woondunge dhawo.

¹²Omuwa, omunelago oye ngoka to mu putudha; oongoka to mu longo ompango yoye!

¹³Oto mu pe ehekeleko momasiku guudhigu, sigo aakaanakalunga ya fulilwa ekelo, ya gwile mo.

¹⁴Omuwa ite ekelehi aantu ye; ite etha po mboka ye.

¹⁵Eutho eyuuki otali ka holoka moompangu, aayuuki ayehe otaye ke li landula.

¹⁶Olye ta pingene ndje mokugeela aakaanakalunga? Olye ta pangula aakolokoshi peha lyandje?

¹⁷Ando Omuwa ina kwatha ndje, ando onda yi mbala kehala lyeimweneneno.

¹⁸Ngame onda ti: “Otandi ihata po!” Ihe, Omuwa, owa ambidhidha ndje molwohole yoye.

¹⁹Uuna nda tila nonda sa iimpwiyu, oto hekeleke ndje e to nyanyudha ndje.

²⁰Ngoye Omuwa, ku na ehangano naapanguli aadhudhu, mbo haa popile uukolokoshi.

²¹Ohaa ende aayuuki mevi, naamboka inaaya yona sha, otaa ya pangulile eso.

²²Ihe Omuwa oye omupopili gwandje; Kalunga kandje ota gamene ndje.

²³Ote ya geelele uukolokoshi wawo note ya yono po molwomayono gawo; Omuwa Kalunga ketu ote ke ya hulitha po.