Read Oshindonga-Ombiimbeli Ondjapuki OMAYELETUMBULO 1 Bible Online

OMAYELETUMBULO 1 - Oshindonga-Ombiimbeli Ondjapuki bible

OMAYELETUMBULO 1

¹Omayeletumbulo gaSalomo yaDavid, omukwaniilwa gwaIsrael.

²Mpaka ope na omayeletumbulo ngoka tage ku kwatha okudhimbulula uunongo nomayele go opala nokuuva ko omapopyo gomadhiladhilo gomuule.

³Otage ku longo, nkene to kala omunandunge nomusimani, omuyuuki nomunashili.

⁴Otaga gandja omayele kaantu yanathangwa, uunongo nuunkulungu kaagundjuka.

⁵Omayeletumbulo ngaka otaga gwedhele kontseyo yaanongo nokugandja ewiliko kaanandunge,

⁶opo yu uve ko iiholekwa yomayeletumbulo noyomayele noohapu dhaanawino nootumbutumbu dhawo.

⁷Etilo okutila Omuwa olyo ekota lyuunongo; aagoya ohaa dhini owino neputudho.

⁸Mumwandje, pulakena omakumagidho gaho, ngoye ino ekelahi omapukululo ganyoko.

⁹Oshoka ogo oshishani oshiwanawa shokomutse gwoye nokalyenge kuulenga komothingo yoye.

¹⁰Mumwandje, aalunde nge taye ku hongolola, ino ya zimina,

¹¹ngele taa ti: “Tu yeni tu ka langeleni ombinzi, natu ponokele omukeenandjo, epwanga lyowala,

¹²natu ya nine po ondhilu ngoshaasi ye na omwenyo, naandjolowele ongaamboka taa kulukile moombogo,

¹³opo tu ki ilikolele iinima yi na ondilo, tu udhe omagumbo getu niihakanwa.

¹⁴Umbila owala oshihogololitho shoye mokati ketu, atuhe otatu ka kala tu na iitopolelwa yi thike pamwe.”

¹⁵Mumwandje, ino ya lamba mondjila ndjoka, oompadhi dhoye dhi galula mepola lyawo.

¹⁶Oshoka oompadhi dhawo otadhi tondokele kuuwinayi, notaa endelele okutilahi ombinzi,

¹⁷oshoka omwigo otagu lukililwa osima yowala montaneho yuudhila.

¹⁸Otaa langele ombinzi yawo yene, otayi ilangele yo yene.

¹⁹Osho taa ningwa ayehe mboka taa dhiladhila uukolokoshi, otashi kutha mwene omwenyo.

²⁰Owino otayi igidha pondje, otayi yelutha ewi lyayo momapandaanda,

²¹otayi igidha pookolonela nomomapandaanda goshilando, poombululu dhomiyelo tayi kugagana tayi popi oohapu dhayo:

²²“Ne aantu yanathangwa, sigo uunake tamu kala muunathangwa weni; aasheki, sigo uunake tamu kala tamu sheke; aagoya, sigo uunake tamu tondo uunongo?

²³Pungulukileni komakumagidho gandje, nena ombepo yandje otayi ke mu kungulukila, nonda hala ndi mu tseyithile oohapu dhandje.

²⁴Molwashoka ondi ithana, ne nomwa tindi, onda ganeke oshikaha shandje nokape na ngoka a pulakene,

²⁵inamu landula omayele gandje, nomakumagidho gandje inamu ga tseya,

²⁶onkee ano tandi ke mu geela pekano lyeni notandi ke mu sheka, iihuna nge tayi mu adha.

²⁷Ehaluko lyeni otali ke ya lya fa oshikungulu, nekano lyeni tali ya lya fa epukupuku lyombepo, ngele uuyina nuuwehame tau mu lambele.

²⁸Nena otamu ka ithana ndje, ihe itandi ka yamukula; otamu ka konga ndje, ihe itamu mono ndje.

²⁹Molwashoka mwa tondo uunongo noinamu hogolola etilo okutila Omuwa,

³⁰inamu hala okutseya omayele gandje nomwa dhini omakumagidho gandje agehe,

³¹otamu ka lya oshiyimati shoondjenda dheni notamu ka kuta koonkundathana dheni.

³²Aantu yanathangwa otaa si, oshoka otaa ekelehi owino. Aagoya otaa hanagulwa po kuuhethi wawo yene.

³³Ihe ngoka ta pulakene ndje, ota kala megameno, niihuna yiiponga itayi mu adha.”