Read Oshindonga-Ombiimbeli Ondjapuki OMAYELETUMBULO 11 Bible Online

OMAYELETUMBULO 11 - Oshindonga-Ombiimbeli Ondjapuki bible

OMAYELETUMBULO 11

¹Oshiviha shomakoto osho iihuna kOmuwa, ihe oomasandjundo dhu udha ote dhi hokwa.

²Uuntsa ohau tetekele epunduko, eishonopeko olyo owino.

³Uuyuuki ohau wilike aayuuki, ihe iifundja yaakaanakalunga otayi ya dhipaga po.

⁴Uuyamba itau kwatha sha esiku lyondjahi, ihe uuyuuki otau hupitha meso.

⁵Uuyuuki otau yelekanitha ondjila yomuyuuki, ihe omukeenakalunga ota pundukile po kuukeenakalunga we.

⁶Uuyuuki waayuuki otau ya hupitha, ihe aahasha otaa kwatwa muuhalu wawo.

⁷Peso lyomukeenakalunga etegameno lye otali hulu po, neinekelo lyaakolokoshi otali kana po.

⁸Omuyuuki sho a hupithwa muupyakadhi, nena omukeenakalunga ote ya pehala lye.

⁹Koohapu dhomokana omukeenakonasha ta tula mukwawo moshiponga, ihe kowino omuyuuki ta hupithwa.

¹⁰Oshilando otashi nyanyukilwa elago lyaayuuki, nongele aakaanakalunga taa si po, oku na ondigolo.

¹¹Okomayambeko gaayuuki oshilando tashi tungala, ihe komakana gaakaanakalunga otashi teka po.

¹²Omugoya oha dhini mukwawo, ihe omunandunge oha kala a mwena.

¹³Nakuhola oombudhi ota popi odhindji e ta holola iiholekwa, ihe ngoka e na ontulo, ota siikilile iinima.

¹⁴Ngele kape na ewiliko, oshigwana otashi teka po, ihe maagandjimayele oyendji omu na ehupitho.

¹⁵Nakupopila mukwawo moongunga ota ningwa nayi, ihe oongoka ta tindi oku shi koleka neminiko, ke na ombudhi.

¹⁶Omukiintu omunamikalo oha likola esimano, ihe omukulukadhi kee na uuyogoki, oye omupya gwowala.

¹⁷Omulumentu omunamikalo ota kala nawa, ihe omulumentu omugeyentu ota kwishike olutu lwe mwene.

¹⁸Omukeenakalunga oti ilikolele eliko lyiifundja, ihe ngoka ta kunu uuyuuki, oti ilikolele ondjambi yolela.

¹⁹Uuyuuki washili otau fala momwenyo, ihe ngoka ta lalakanene uuwinayi, ota adha eso.

²⁰Omunamutima gwa puka oye iihuna kOmuwa, ihe Omuwa okwa hokwa ngoka te ende muuyuuki.

²¹Oshilishili, aakolokoshi itaa kala inaa geelwa, ihe oluvalo lwaayuuki otalu mangululwa.

²²Omukiintu omwaanawa moshipala ye kee na owino okwa fa okalinga koshingoli ke li keyulu lyoshingulu.

²³Okuhala kwaayuuki otaku fala kelago, ihe aakaanakalunga uuna ye na sho ya pumbwa, nena kehe gumwe okwa geya.

²⁴Gumwe oha gandja oshindji e ta likola oshindji; gumwe oha ndalapatele shoka e shi na e ta si oluhepo.

²⁵Omwenyo ngoka tagu yambeke, otagu kutithwa, naangoka ta hekeleke, ota hekelekwa wo.

²⁶Omuluya gwiilya aantu otaye mu thingi, ihe omayambeko tage ya komutse gwaangoka ta landitha po iilya.

²⁷Oongoka ta lalakanene uuwanawa, ota ka hokiwa, ihe nakukonga uuwinayi ota ka adhika kuwo.

²⁸Oongoka ti inekele uuyamba we, ota ka punduka, ihe aayuuki otaa ka lelema ya fa omafo ga ziza.

²⁹Nakuteyapo egumbo lye ota thigulula ombepo, nomugoya ota pikwa kungoka e na owino.

³⁰Oshiyimati shomuyuuki osho omuti gwomwenyo, naangoka ta sindi oomwenyo, oye omunawino.

³¹Omuyuuki ngele ota mono ondjambi ye kombanda yevi, omukeenakalunga nomulunde wo otaa ka geelwa.