Read Oshindonga-Ombiimbeli Ondjapuki OMAYELETUMBULO 14 Bible Online

OMAYELETUMBULO 14 - Oshindonga-Ombiimbeli Ondjapuki bible

OMAYELETUMBULO 14

¹Egumbo ohali tungwa po kowino yomukiintu, ihe uugoya otau li teya po.

²Oongoka te ende muuyuuki, ota tila Omuwa, ihe ngoka te ende ondjila ya goyoka, ote mu dhini.

³Mokana kegoya omu na olunwa luuntsa we, ihe omilungu dhomunandunge ohadhi mu gamene.

⁴Mpoka pwaa na oongombe, omatemba gokulila iimuna kage na sha, ihe koonkondo dhondumetana eliko otali ya po.

⁵Ombangi omwiinekelwa iha fundju, ihe ngoka gwiifundja oha popi iifundja.

⁶Omusheki ota kongo owino nokayi ko, ihe uunongo owo uupu kaanamayele.

⁷Za po pegoya, oshoka ito mono uunongo komilungu dhalyo.

⁸Owino yomunamayele oyo okuuva ko ondjila, ihe uugoya womusama owo omakoto.

⁹Omayonondjambo otaga yolo omagoya, ihe pokati kaayuuki opwa kala okuhokwathana.

¹⁰Omwenyo ogu shi uudhigu wagwo, nomenyanyu lyagwo egumbo lilwe itali vulu okwiidhopa mo.

¹¹Egumbo lyomukeenakalunga otali dhimwa po, ihe etsali lyomuyuuki otali humu ko.

¹²Oku na ondjila ndjoka ya yelekana momeho gomuntu, ihe pehulilo oyo ondjila yeso.

¹³Nokuyola wo otaku ehameke omutima, nenyanyu otali vulu okuhulila moluhodhi.

¹⁴Oondjenda dhe mwene otadhi kunyukitha omugoya, ihe omuntu omwaanawa ota futwa kiilonga ye.

¹⁵Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.

¹⁶Omunawino ota tila e ta gamuka kuuwinayi, ihe egoya otali kugilile notali iyinekele lyo lyene.

¹⁷Omugeyentu oha longo uugoya, nomunamakoto oha tondwa.

¹⁸Aantu yanathangwa otaa likola uugoya u ninge uuthiga wawo, ihe aanandunge otaa shanipikwa nuunongo.

¹⁹Aawinayi otaa ka inyongamena koshipala shaawanawa, naakaanakalunga opiiyelo yaayuuki.

²⁰Oohepele oye tondike nokaashiinda yawo, ihe ookuume kaayamba oyendji.

²¹Ngoka ta dhini mukwawo, ota ningi uulunde, ihe omunelago oongoka e na ohenda naanaluhepo.

²²Itaa kana mboka haa toto iiponga? Ihe ohole nuudhiginini owaamboka haa longo uuwanawa.

²³Uupyakadhi kehe ohau tompola sha, ihe omapopyagano gowala ohage etitha oluhepo.

²⁴Oshishani shaanawino osho uuyamba wawo, ihe uugoya waasama ohau fala muugoya.

²⁵Ombangi omwiinekelwa ota hupitha oomwenyo, ihe ngoka ta popi iifundja, oye omunamakoto.

²⁶Metilo okutila Omuwa omu na egameno lya kola komuntu noluvalo lwe.

²⁷Etilo okutila Omuwa olyo oluthithiya lwomwenyo nokugamuka komatavu geso.

²⁸Moshigwana oshinene omo mwa kala esimano lyomukwaniilwa, ihe muushona washo omwa kala ekanopo lyaawa.

²⁹Omutalanteni omuyamba gwoondunge, ihe omugeyentu oha likola uugoya.

³⁰Omutima gwa gundjila ogwo omwenyo gwolutu, ihe uukodhi owo ontuko momasipa.

³¹Ngoka ta hepeke omukwanaluhepo, ota sitha Omushiti gwe ohoni, ihe ngoka te mu sile ohenda, ota simaneke Kalunga.

³²Omukeenakalunga ota gwilililwa po kuuwinayi we, ihe omuyuuki ota mono egameno peso lye.

³³Owino oyi li momwenyo gwomunandunge notayi holoka mokati kaagoya.

³⁴Uuyuuki otau yelutha po oshigwana, ihe uulunde owo ohoni yiigwana.

³⁵Omukwaniilwa okwa hokwa omumati omunamayele, ihe ota geele ngoka ta sitha ohoni.