Read Oshindonga-Ombiimbeli Ondjapuki OMAYELETUMBULO 16 Bible Online

OMAYELETUMBULO 16 - Oshindonga-Ombiimbeli Ondjapuki bible

OMAYELETUMBULO 16

¹Oompangela dhokomutima odhomuntu, ihe eyamukulo lyelaka otali zi kOmuwa.

²Oondjila dhomuntu adhihe odha yela momeho ge mwene, ihe Omuwa ota konakona oombepo.

³Gandja iilonga yoye kOmuwa, nena oompangela dhoye otadhi ka gwanithwa.

⁴Iinima ayihe Omuwa okwe yi shitile elalakano lye, eeno, nomukeenakalunga esiku lyoshiponga.

⁵Omutima kehe gu hole uuntsa, ogwo iihuna koshipala shOmuwa. Oshili, itagu kala inaagu geelwa.

⁶Okohole nuudhiginini oondjo otadhi dhimwa po, noketilo okutila Omuwa omuntu ota gamuka kuuwinayi.

⁷Omuwa ngele okwa hokwa oondjila dhomuntu, nena ote mu hangukununa wo naatondi ye.

⁸U na okashona koye pamwe nuuyuuki, ohwepo shi vule omaliko ogendji nuugoyoki.

⁹Omutima gwomuntu otagu nunu ondjila ye, ihe Omuwa otu utha oonkatu dhe.

¹⁰Eutho olya kala komilungu dhomukwaniilwa, moompangu okana kwe itaka sameke.

¹¹Oshiyelekitho shu uka noshiviha ohayi zi kOmuwa, oomasandjundo adhihe odha hambulwa kuye.

¹²Aakwaniilwa ohaa tondo uukolokoshi, oshoka uuyuuki ohau koleke oshipangelapundi.

¹³Aakwaniilwa oya hokwa omilungu omiyuuki, noye hole ngoka ta popi oohapu dhu uka.

¹⁴Ondjahi yomukwaniilwa oya fa aambala yeso, ihe omunawino ohe yi lotitha.

¹⁵Eadhimo lyoshipala shomukwaniilwa olyo omwenyo nohokwe ye oya fa iikogo yoposhitemamvula.

¹⁶Okuhogolola uunongo oku vule oshingoli, nokuhogolola oondunge oku vule okulikola oshisiliveli.

¹⁷Okukokola ondjila yaayuuki okwo okugamuka kuuwinayi; ngoka ta tonatele oondjila dhe, ota gamene omwenyo gwe.

¹⁸Uuntsa tau tetekele ehanagulo, einenepeko otali tetekele epunduko.

¹⁹Osho opala okwiishonopekela pamwe naadhinwa shi vule iihakanwa pamwe naanuuntsa.

²⁰Ngoka ta pulakene oohapu, ota kala nawa, naangoka ti inekele Omuwa, ota kala e na elago.

²¹Omunandunge komutima ota lukwa omunamayele, nuutoye womilungu otau taandelitha elongo.

²²Oondunge odho oluthithiya lwomwenyo kumwene gwadho, ihe egoya otali geelwa omoluulayi walyo.

²³Omutima gwomunawino otagu ningi okana ke okanandunge nokutaandelitha elongo tali zi komilungu dhe.

²⁴Oohapu oontalala odha fa oshithima shehila lyoonyushi, otadhi opalele omwenyo nendjangeko lyomasipa.

²⁵Oku na ondjila ndjoka ya yelekana momeho gomuntu, ihe pehulilo oyo ondjila yeso.

²⁶Ondjala yomuniilonga otayi mu longitha, oshoka okana ke otake mu thiminike.

²⁷Omukatalume ota fulu ekelo, nokomilungu dhe okwa fa omulilo gwa geta.

²⁸Omuntu ombudhi oha kunu olutandu, nomunaluhoko oha kuthathanitha po ookuume nookuume.

²⁹Omukolokoshi oha pukitha mukwawo note mu fala mondjila yaa fele.

³⁰Ngoka ta thithikile omeho ge, ota dhiladhila omakoto; ngoka a maka okana ke, okwa gwanitha nale uuwinayi.

³¹Oomvi dhokomutse odho oshishani shuulenga; otashi adhika mondjila yuuyuuki.

³²Omutalanteni oku vule ofule; naangoka ta pangele omwenyo gwe, oku vule ngoka ta sindi oshilando.

³³Oshihogololitho ohashi umbilwa mekolo, ihe eutho ohali zi kOmuwa.