Read Oshindonga-Ombiimbeli Ondjapuki OMAYELETUMBULO 18 Bible Online

OMAYELETUMBULO 18 - Oshindonga-Ombiimbeli Ondjapuki bible

OMAYELETUMBULO 18

¹Omukunyunu oha landula omakamba ge, ota kondjitha ayihe mbyoka tayi hilile kuuwanawa.

²Egoya inali hokwa oondunge, ihe okwiigalaleka omutima gwalyo lyene.

³Omukeenakalunga nge te ya, nondhino otayi ya wo, nesithahoni otali etelele eshundulo.

⁴Oohapu dhomokana komuntu odho omeya omale, odho omulonga tagu fuluka noluthithiya lwowino.

⁵Inashi opala okwiigameka komunandjo nokupilika oshinima shomukeenandjo mompangu.

⁶Omilungu dhegoya odhi na oontamanana, nokana ke otaka igidha omadhengo.

⁷Okana kegoya oko ekano lyalyo, nomilungu dhe odho etavu lyomwenyo gwe.

⁸Oohapu dholuhoko odho oontoye tadhi thenunukile moondjugo dhomeni.

⁹Ngoka ta tonyala miilonga ye, oye omumwayina gwanakumbugaleka.

¹⁰Edhina lyOmuwa olyo oshungo ya kola; omuyuuki ota matukile mo e ta gamenwa.

¹¹Eliko lyomuyamba momadhiladhilo ge olyo oshilando she sha kola, ngashika ekuma eleeleka lyaa shi kukondwa momadhiladhilo ge.

¹²Omutima gwomuntu otagu inenepeke komeho gehanagulo lye, ihe eishonopeko otali tetekele esimano.

¹³Ngoka ta yamukula, manga inaa uva, otashi mu nikile uugoya notashi mu sitha ohoni.

¹⁴Ombepo ya kola otayi mu ambidhidha muuvu we, ihe olye ta vulu okutula omukumo momwenyo gwa nyanyagulwa?

¹⁵Omutima gwomunandunge otagu likola uunongo, nokutsi kwomunamayele otaku kongo ontseyo.

¹⁶Omulongelo gwomuntu otagu mu palele eha noku mu fala koshipala shaanenentu.

¹⁷Nakuthika tango koompangu oku na uuthemba, ihe mukwawo ote ya note mu konakona nawa.

¹⁸Oshihogololitho ohashi lotitha oontamanana e tashi kutha esipa pokati koombwa.

¹⁹Omumwayina a kotokelwa oku vule oshilando sha kola mokusindwa, noontamanana odha fa omweelo gwa patekeka.

²⁰Koshiyimati shokokana ela lye otali kuta, ta kutithwa kiiyetwapo yomilungu dhe.

²¹Eso nomwenyo oya kala moonkondo dhelaka; naangoka he li longitha, ota ka lya iiyimati yalyo.

²²Nakumona omukulukadhi oku na elago, a likola ohokwe yOmuwa.

²³Oohepele otayi indile nokwiifupipika, ihe omuyamba ota yamukula nomagandambadhi.

²⁴Omuntu gwookuume oyendji ota hanagulwa po, ihe kuume omudhiginini e vule omumwayina.