Read Oshindonga-Ombiimbeli Ondjapuki OMAYELETUMBULO 2 Bible Online

OMAYELETUMBULO 2 - Oshindonga-Ombiimbeli Ondjapuki bible

OMAYELETUMBULO 2

¹Mumwandje, ngele to taamba oohapu dhandje noto dhiginine iipango yandje,

²opo to gameke okutsi kwoye kowino, nomutima gwoye tagu ipamba koondunge,

³eeno, ngele oto ithana omayele, nokoondunge to yeluthile ewi lyoye,

⁴ngele oto dhi kongo ngaashi oshisiliveli noto dhi shilile ngaashi eliko lya holekwa,

⁵nena oto ka uva ko etilo okutila Omuwa e to ka mona ontseyo okutseya Kalunga.

⁶Omuwa ota gandja owino, mokana ke otamu piti ontseyo noondunge.

⁷Aayuuki ote ya kwatha, oye ehuuyanza lyaanashili.

⁸Ota tonatele oondjila dhaayuuki, nomapola gaasilwahenda ye te ga gamene.

⁹Nge to pulakene ndje, oto ka uva ko uuyuuki neuko nuunashili — ondjila kehe yo opala.

¹⁰Owino otayi ke ya momutima gwoye, nontseyo otayi ka opalela omwenyo gwoye.

¹¹Owino otayi ke ku tonatela, noondunge tadhi ke ku gamena.

¹²Owino otayi ku hupitha mepola lyaawinayi nomaantu mboka haa popi iinima yiifundja,

¹³oomboka ye etha oondjila dhuuyuuki notaye ende moondjila dhomilema,

¹⁴mboka haa nyanyukilwa okukolokosha nohaa ligolele omakotokelo gaawinayi,

¹⁵mboka ye na oondjila dha puka nohaa gamuka koshinkoti shawo.

¹⁶Owino otayi ku gamene komukiintu omukwiilongo omuholi gwiipala ta pukitha nomaheko ge,

¹⁷ngoka a thigi po kuume kuugundjuka we e ta dhimbwa ehangano lyaKalunga ke.

¹⁸Oshoka egumbo lye otali ku fala muusi, noondjila dhe tadhi ku ukitha momilema.

¹⁹Shaa ngoka ta yi kuye, ita galuka we ye ita adha we oondjila dhomwenyo.

²⁰Enda ano mondjila yaakaanashipwe nou dhiginine omapola gaayuuki.

²¹Oshoka aayuuki otaa kala moshilongo, naakaanashipwe oyo taa thigala mo,

²²ihe aakaanakalunga otaa ka kombwa mo moshilongo naakaanuudhiginini otaa ka nakulwa mo.