Read Oshindonga-Ombiimbeli Ondjapuki OMAYELETUMBULO 21 Bible Online

OMAYELETUMBULO 21 - Oshindonga-Ombiimbeli Ondjapuki bible

OMAYELETUMBULO 21

¹Omutima gwomukwaniilwa ogu li miikaha yOmuwa ngaashi omikanka dhomeya; ote gu gameke hoka a hala.

²Oondjila dhomuntu adhihe odho opala momeho ge, ihe Omuwa ota konakona omitima.

³Okulonga uuyuuki neuko okwo opalela Omuwa ku vule omayambo.

⁴Omeho ga pota nomwenyo gu hole uuntsa — onyeka yaakaanakalunga — oyo uulunde.

⁵Oompangela dhomunandjungu otadhi mu etele eliko, ihe ngoka a lungulukwa, ota yi moluhepo.

⁶Elikolo lyuuyamba melaka lyiifundja olyo omufudho tagu fudhwa mo, olyo omwigo gweso.

⁷Iikolokosha yaakaanakalunga otayi ya kookolola po, oshoka otaa tindi okulonga uuyuuki.

⁸Ondjila yomufundja oya goyoka, ihe aayogoki iilonga yawo oyu uka.

⁹Okukala koshungo yongulu oku vule okukala megumbo limwe nomukulukadhi e na omulungu.

¹⁰Omwenyo gwomukeenakalunga ogwa hala uuwinayi, namukwawo ita mono ohenda momeho ge.

¹¹Uuna omusheki ta geelwa, omuntu gwanathangwa ota pukuluka; uuna omunawino ta nongekwa, ota taamba ontseyo.

¹²Kalunga omuyuuki ota konakona egumbo lyomukeenakalunga; ota tengulile aakaanakalunga omupya.

¹³Ngoka ta thitikile onkugo yohepele omakutsi ge, one ki igidha noita uvika.

¹⁴Oongoga dhomonguwi ohadhi loteke ondjahi, nombumbo yomeholamo ohayi gundjilike uupyakadhi.

¹⁵Okulonga uuyuuki otaku nyanyudha nakutila Kalunga, ihe okwo ehalukitho lyaalongi yuukolokoshi.

¹⁶Omuntu ngoka a puka mondjila yoondunge, ota ka thuwila moshigongi shaakwampungu.

¹⁷Nakuhola iitelekela ta ka adhika koluhepo, nakuhokwa omaviinu nomugwayo ita yambapala.

¹⁸Omukeenakalunga oye iikahu yomuyuuki, nomuhasha oyaamboka ya kala moshili.

¹⁹Osho opala okukala mevi lya mbugala shi vule okukala nomukulukadhi omupwidhi nomudhudhu.

²⁰Megumbo lyomunawino omu na eliko li na ondilo nomagadhi, ihe egoya otali li mana po.

²¹Omulalakaneni guuyuuki niilonga iiwanawa ota kala e na omwenyo, uuyuuki nesimano.

²²Omunandunge ota matukile oshilando shoofule e ta kumuna po omakuma ngoka shi inekela.

²³Ngoka ta tonatele okana nelaka lye, ota gamene omwenyo gwe kuuyina.

²⁴Omwiinenepeki omunuuntsa ota lukwa omusheki, oongoka e na uuntseyele wa pitilila.

²⁵Uuhalu womunanyalo otau mu dhipaga, oshoka iikaha ye otayi tindi okulonga.

²⁶Aluhe okwa sa ompiya okupewa, ihe omuyuuki oha gandja ye iha ndalapatele.

²⁷Ondjambo yaakaanakalunga oyo iihuna yowala, nontala oya yambelwa uukolokoshi.

²⁸Onzapo yiifundja ota yonuka po, ihe omuntu ngoka ta pulakene nawa, ota popi aluhe.

²⁹Omukeenakalunga ota kukutike oshipala she, ihe omuyuuki otu ukitha oondjila dhe.

³⁰Kape na owino, kape na oondunge nokape na omayele gokutinda Omuwa.

³¹Okakambe otaka dheulilwa esiku lyolugodhi, ihe esindano otali zi kOmuwa.