Read Oshindonga-Ombiimbeli Ondjapuki OMAYELETUMBULO 23 Bible Online

OMAYELETUMBULO 23 - Oshindonga-Ombiimbeli Ondjapuki bible

OMAYELETUMBULO 23

¹Ngele owa kuutumba, opo u lye pamwe nomukwaniilwa, tala nawa kutya olye mwa talathana naye.

²Tula omwele pomuligu gwoye, ngoye ngele owa lumba.

³Iikulya ye iitoye ino yi haluka, oshoka oyo omwigo gwe ku lukililwa.

⁴Ino ihepeka nuuyamba, etha oondunge dhe u ihalela.

⁵Omeho goye ngele taga lambele omaliko, otaga pepuka po. Otagi izaleke omawawa notaga tukile kegulu ga fa ekodhi.

⁶Oshithima shaangoka e ku sila efupa ino shi lya, ngoye ino haluka iikulya ye iitoye.

⁷Oshoka ngaashi ta dhiladhila momwenyo gwe, osho e li. Ote ku lombwele ta ti: “Lya, nwa,” ihe omwenyo gwe inagu gama kungoye.

⁸Onkanko ndjoka wa li, oto yi kungu ko, noohapu dhoye oombwanawa we dhi hepitha.

⁹Ino popya montaneho yegoya, oshoka otali ka dhina oohapu dhoye dhoondunge.

¹⁰Ongamba yoshitonale ino yi lundulula tuu, ngoye ino itendela oshimpungu mepya lyoothigwa.

¹¹Oshoka Omupopili gwawo omunankondo, ote ke ya popila te ku galukile.

¹²Omwenyo gwoye gu gameka keputudho nokutsi kwoye koohapu dhuunongo.

¹³Ino sa ohenda okugeela omumwoyemati. Ngele to mu dhenge nolunwa, ota hupithwa meso.

¹⁴Oto mu dhenge naanaa noshimwati, ihe omwenyo gwe oto gu hupitha meso.

¹⁵Mumwandje, omwenyo gwoye ngele tagu ningi oondunge, nena omwenyo gwandje otagu nyanyukwa;

¹⁶omutima gwandje otagu ligola, ngele omilungu dhoye tadhi popi shoka shu uka.

¹⁷Omwenyo gwoye inagu sila aalunde efupa, ihe kala aluhe mokutila Omuwa.

¹⁸Nena ngoye ou na elago konakuyiwa, netegameno lyoye itali ponyo.

¹⁹Mumwandje, pulakena u ninge oondunge, ngoye u lemene omwenyo gwoye mondjila yu uka.

²⁰Ino kala mokati kaanwi yomaviinu nokaamboka ya vuka okulya onyama.

²¹Oshoka onkolwi nomufukedhi otaa adhika koluhepo, uunanyalo otau zalitha omuntu oonguwo dhiinyanyu.

²²Pulakena ho ngoka e ku vala, ngoye ino dhina nyoko sho a kulupa.

²³Ilandela oshili, ihe ino yi landitha po we, landa wo owino, eputuko noondunge.

²⁴He yomuyuuki ota ligola unene; naangoka a vala omunandunge, ote mu nyanyukilwa.

²⁵Nyanyudha ho nanyoko, mboka ye ku vala.

²⁶Mumwandje, pe ndje omutima gwoye, nomeho goye naga hokwe oondjila dhandje.

²⁷Oshoka ohonda oyo olumbogo olule, nomukiintu gwiipala oye onyombo ya thinana.

²⁸Ota langele ngashika omuyugi e ta taandelitha eiteko mokati kaantu.

²⁹Olye ngoka ta ti: “Wuwuu!” Nolye ta takuma? Oontamanana odhalye nomayemato ogalye? Olye a tosholwa iilalo yaa na mutse nandungu? Naangoka e na omeho ga tsiyala, olye?

³⁰Oyo mboka haa tokelwa pomaviinu, oomboka haa yi mo ya makele ondungila.

³¹Ino tala omaviinu nkene ga tiligana, nkene taga konita nawa moshitenga notaga thenukile mo nawa.

³²Pehulilo otaga lumata ga fa eyoka notaga kungu uuzigo ga fa ongolonyoka.

³³Omeho goye otaga ningi omahaluhalu giihuna, nomwenyo gwoye tagu fafaeke iinima iingwangwaneki.

³⁴Oto ka kala wa fa omuntu a lala mokati kefuta, wa fa omuntu a tsilikwa kondungu yombondje yosikepa.

³⁵Oto ti owala: “Oya dhenge ndje, ihe itandi ehama; oya kopagula ndje, ngaye inandi shi koneka! Uunake tandi kololokwa? Nena otandi ke ga kongulula.”