Read Oshindonga-Ombiimbeli Ondjapuki OMAYELETUMBULO 26 Bible Online

OMAYELETUMBULO 26 - Oshindonga-Ombiimbeli Ondjapuki bible

OMAYELETUMBULO 26

¹Egoya olya sheshwa esimano ngaashi olumi mothinge nongaashi omvula mokufu.

²Ngashika namutyaga, ngaashi okandigilili taka kwinyola mokutuka, osho etulomutima lyaa na mutse nandungu itali tsu.

³Ongola oyi lile po okakambe, oshitomo oshi lile po okasino, nolunwa okombunda yegoya.

⁴Ino yamukula egoya pausama walyo, opo waahe mu fe.

⁵Yamukula egoya pausama walyo, opo lyaaha tye lyo enandunge.

⁶Ngoka ta tumu egoya, oti indimbula oompadhi dhe e ta kongo omupya.

⁷Eyeletumbulo mokana kegoya olya fa omagulu goshilema ga yululukila.

⁸Ngoka ta simaneke egoya, okwa fa ta tula emanya mokatayingili.

⁹Eyeletumbulo mokana kegoya olya fa okwega kwa tsu moshikaha shonkolwi.

¹⁰Ngoka ta kutu egoya nenge ompitula, okwa fa ondjumbeta tayi fala ayihe koshakapalu.

¹¹Egoya tali popyulula uusama walyo, olya fa ombwa tayi galukile konkungo yayo.

¹²Owa mona tuu omuntu omunongo momeho ge mwene? Okutegelela oondunge kegoya oku vule po.

¹³Omunanyalo ota ti: “Mepola omu na onime, onkoshi yi li mepandaanda.”

¹⁴Kethengununo lyomakandula omweelo tagu pingoshoka, osho wo omunanyalo ta galangata mombete ye.

¹⁵Omunanyalo ota tula oshikaha she metemba, ota vulwa oku shi fala kokana.

¹⁶Omunanyalo oye omunawino momeho ge mwene, e vule yaheyali mboka taa yamukula nawa.

¹⁷Ngoka ti idhopo moohapu inaadhi mu pamba, okwa fa ngoka ta kwata ombwa ontokolipo kokutsi.

¹⁸Ngaashi omupwidhi ta hwanuna iikuti ya hwama omulilo notu umbu iikuti yeso,

¹⁹osho omuntu ngoka ta kotokele mukwawo ta ti: “Ote dhana owala.”

²⁰Omulilo itaagu hohelwa otagu dhimi, nongele kaku na omulundili, oontamanana otadhi loto.

²¹Ngashika omakala ga hanya niikuni tayi tema omulilo, osho omuntu gwomapoye ta tukulutha oondjuma.

²²Oohapu dhomulundili odha fa uutoye; otadhi ningine mo nawa moomwenyo.

²³Ngaashi oshisha shoshisiliveli sha kolongwa koshuma, osho omilungu dhiifundja nomwenyo omukotokeli.

²⁴Omutondadhi oti idhimbitha nomilungu dhe, ihe meni lye otu utumanene omakotokelo.

²⁵Ngele ta shitukitha ewi lye ohole, ino mu inekela, oshoka momutima gwe omu na iihuna iheyali.

²⁶Nando na holeke uutondwe momakoto, uumbudhi we otau yanununwa moshigongi.

²⁷Ngoka ta fulu ekelo, ota ka gwila mo, naangoka ta galangatitha emanya, otali mu galukile.

²⁸Elaka lyiifundja otali tondo mboka lya nyanyagula, nokana komuthenu otaka eta ekano.