Read Oshindonga-Ombiimbeli Ondjapuki OMAYELETUMBULO 28 Bible Online

OMAYELETUMBULO 28 - Oshindonga-Ombiimbeli Ondjapuki bible

OMAYELETUMBULO 28

¹Aakaanakalunga otaa fadhuka po pwaa na ngoka te ya tidha, ihe aayuuki oye na uulaadhi ya fa onime ongundjuka.

²Omolwomayono oshilongo otashi kala shi na aawa oyendji, ihe omolwomunongo gumwe omunamayele elandulathano otali kala po.

³Omuntu omukwanaluhepo ta hepeke oohepele okwa fa omvula tayi vovola iilya yo itayi gandja iipalutha.

⁴Mboka taa etha ompango, otaa tanga aakaanakalunga, ihe mboka taa dhiginine ompango, oyu uvite uugelele molwawo.

⁵Aawinayi kaye uvite ko uuyuuki, ihe mboka haa kongo Omuwa oyu uvite ko ayihe.

⁶Ohepele ndjoka tayi ende yaa na oshipwe, oyi vule omuyamba ngoka te ende oondjila mbali dha goyoka.

⁷Omumati omunandunge oye ngoka ta dhiginine ompango, ihe ngoka ta kala naahanaguli, ota sitha he ohoni.

⁸Ngoka ti indjipalitha eliko lye nontanitho ya pitilila, ote yi gongelele ngoka ta ka sila oohepele ohenda.

⁹Ngoka ta thitike omakutsi ge kaa uve ompango, negalikano lye olyo iihuna.

¹⁰Ngoka ta fala aayuuki mondjila yepuko, ota ka gwila mekelo lye mwene, aakaanashipwe otaa ka thigulula elago.

¹¹Omuyamba oye omunongo momeho ge mwene; ihe ohepele onandunge otayi mu konakona.

¹²Aayuuki nge taa ligola, eopalo enene, ihe aakaanakalunga sho taa holoka, aantu otaa holama.

¹³Oongoka ta holeke iilonga ye iiwinayi, oye ke na elago, ihe ngoka te yi hempulula note yi etha, oye ta silwa ohenda.

¹⁴Omunelago oye ngoka ta kala aluhe a tila Omuwa, ihe ngoka ta kukutike omwenyo gwe, ota ka gwila momupya.

¹⁵Ngaashi onime tayi pumbu nemwanka lya sa ondjala, osho omukeenakalunga ta pangele oshigwana oshikweyi.

¹⁶Omukwaniilwa kee na oondunge, oha yugu aantu, ihe ngoka e tonde eliko lyiifundja, ota nyanyukilwa omwenyo omule.

¹⁷Omuntu ngoka e na uutoni, ota kala ta holamaholama sigo okeso lye; nokape na ngoka te mu gamene.

¹⁸Ngoka te ende pauyuuki, ota ka kwathwa, ihe ngoka te ende oondjila mbali dha goyoka, ota ka punduka ohaluka.

¹⁹Ngoka ta longo epya lye, ota mono iilya, ihe ngoka ta lalakanene iinima yowala, ota ka hepa unene.

²⁰Omuntu omwiinekelwa ota yambekwa unene, ihe ngoka a pya ompiya okuninga omuyamba, ita kala inaa geelwa.

²¹Inashi opala okukala nolutandu, oshoka omolwokapambu koshikwiila omuntu ta vulu okuyona.

²²Omunefupa otu ulumine uuyamba ye ina tseya kutya oluhepo otalu ke mu kwata.

²³Ngoka ta ganda omuntu, ota ka pandika shi vule ngoka ta mbembeleke.

²⁴Ngoka ta yugu he nenge yina e ta ti: “Kashi shi ondjo,” oye omukwawo gwomuhanaguli.

²⁵Omunalwiho ota tukula oontamanana, ihe ngoka ti inekele Omuwa, ota talalekwa.

²⁶Ngoka i inekela omutima gwe mwene oye egoya, ihe ngoka te ende mowino, ota hupithwa.

²⁷Oongoka ta pe sha oohepele, ita hepa; ihe ngoka te dhi thithikilile omeho ge, ota thingwa koyendji.

²⁸Aakaanakalunga nge taa yeluka, aantu otaa holama; ihe nge taa hulu po, aayuuki otaa indjipala.