Read Oshindonga-Ombiimbeli Ondjapuki OMAYELETUMBULO 30 Bible Online

OMAYELETUMBULO 30 - Oshindonga-Ombiimbeli Ondjapuki bible

OMAYELETUMBULO 30

¹Oohapu dhaAgur yaJake — ontomona. Omuntu ta popi: “Kalunga, ondi ivulitha; Nampongo, ondi ilolokitha, ongame epongo.

²Ngame omugoya unene okuninga omuntu; kandi na oondunge dhopantu.

³Inandi nongela owino, opo ndi kale nda tseya Omuyapuki.

⁴Olye a londo kegulu nokwa kuluka ko? Olye a kaminina ombepo meke lye? Olye a kwatelelela omeya monguwo ye? Olye a dhike ooha dhevi adhihe? Edhina lye olye? Nedhina lyomwana olye? Lombwela ndje, ngele ou li shi.

⁵“Ohapu yaKalunga kehe oya yelithwa; oye eholameno lyaamboka taa holama puye.

⁶Poohapu dhe ino gwedha po sha, opo kee ku tamaneke nowaa holoke puuyelele omufundja.”

⁷“Otandi ku indile iinima iyali, ino yi tindila ndje, manga inaandi sa.

⁸Uufudhime niifundja yi kaleka kokule nangame. Uuyamba nenge oluhepo ino lu pa ndje; palutha ndje noshikwiila shoka sha yeleka ndje.

⁹Ngele nda kuta unene, otashi vulika tandi ku idhimbike tandi ti: ‘Omuwa oye lye?’ Nongele ndi li moluhepo, otashi vulika ndi ka yake nondi kwatithe edhina lyaKalunga kandje oshidhila.”

¹⁰Ino lombola ko omupiya kumwene gwe, opo kee ku tuke nowaa monike ombudhi.

¹¹Oku na oluvalo talu thingi he noitalu yambeke yina.

¹²Oku na aantu ya yela momeho gawo yene, nando inaa yogoka ko koongaga dhawo.

¹³Oku na aantu ye na omeho ge na uuntsa nohaa tala nethithimano.

¹⁴Oku na aantu mboka omayego gawo omagongamwele noondjego dhawo omakuwaha, opo ya taasine po aathigona moshilongo noohepele mokati kaantu.

¹⁵Ethipimbinzi oli na oyana aakadhona yaali, oyo Pendje! Pendje! Oku na iinima itatu mbyoka ihaayi kuta, iinima ine mbyoka ihaayi ti: “Sha gwana!”

¹⁶Oyo oshaasi, ela entimbe, evi ndyoka ihaali kumwa omeya, nomulilo, ngoka ihaagu ti: “Opuwo nduno!”

¹⁷Ngoka ta sheke he e ta dhini evuliko okuvulika kuyina, omadhilakola gomolusilu otage ke mu shomona omeho, nuukodhigona otau ga li po.

¹⁸Oku na iinima itatu mbyoka tayi kumitha ndje, eeno, ine mbyoka kaandi yi uvite ko:

¹⁹oshinkoti shekodhi mewangandjo, omusinda gweyoka kemanya, oshitauwa shosikepa mokati kefuta noshinkoti shomulumentu komukadhona.

²⁰Osho ondjila yomukulukadhi omuhondeli: ota li e to opaleke okana ke ta ti: “Inandi yona sha!”

²¹Kohi yiinima itatu evi otali kakama, nokohi yiine itali vulu okukala lya kola:

²²omupika ngele ta ningi omukwaniilwa nomusama ngele e na iikulya ya ha,

²³omukiintu e tondike nge ta hokanwa, nomupika omukiintu nge ta pingene mwene gwe.

²⁴Oku na iishitwa ine mbyoka iishuushuka kombanda yevi, ihe oyi na owino oyindjiyindji:

²⁵Uudhidhi owo iishitwa yaa na oonkondo, ihe otau pungula iikulya yawo mothinge.

²⁶Uuhele owo iishitwa yaa na omatha, ihe ohau ningi omakwena gawo momamanya.

²⁷Oombahu kadhi na omukwaniilwa, ihe iiluku yadho oyi li melandulathano lyo opala.

²⁸Eyengele oto vulu oku li kwata niikaha yowala, ihe ohali kala muuwa waakwaniilwa.

²⁹Oku na iishitwa itatu mbyoka hayi katuka nokutuwalala, eeno, ine mbyoka hayi ende nokwiithela:

³⁰onime, omukwaniilwa mokati kiinamwenyo, ndjoka ihaayi henukile sha,

³¹ekondombolo li na oshilundo, oshikombo shoshitsezi, nomukwaniilwa e na omatanga ga homata.

³²Ngele wa sameka nowi inenepeke nenge wa dhiladhila uuwinayi, ikwata komilungu noshikaha.

³³Oshoka okuhika omahini otaku eta omagadhi, mokuhika eyulu otamu zi ombinzi nomokuhika ondjahi otamu zi oontamanana.