Read Oshindonga-Ombiimbeli Ondjapuki OMAYELETUMBULO 31 Bible Online

OMAYELETUMBULO 31 - Oshindonga-Ombiimbeli Ondjapuki bible

OMAYELETUMBULO 31

¹Oohapu ndhoka Lemuel, omukwaniilwa gwaMassa, a pukululwa nadho kuyina:

²“Oshike, mumwandjemati, omumati gwomoshivalelo shandje, omumati gwomauvaneko gandje, nandi tye shike?

³Oonkondo dhoye ino dhi manena maakiintu, ngoye u vundakane naamboka haa yono po aakwaniilwa.

⁴Akutu, Lemuel, inashi opalela aakwaniilwa, eeno, inashi opalela aakwaniilwa okunwa omaviinu, naawagona okupula iikolitha.

⁵Ota ningi a nwe ye a dhimbwe shoka ompango tayi ti e ta goyokitha uuyuuki waakwanaluhepo.

⁶Iikolitha yi peni ngoka a hala okukana, nomaviinu oomboka ye na uudhigu uululululu.

⁷Mbeyaka naa nwe yo ya dhimbwe oluhepo lwawo nokwaadhiladhila we uukweyi wawo.

⁸“Makula okana koye, u popile ombolo naayehe mboka taa hala okwoongotela.

⁹Makula okana koye, pangula pauyuuki, popila uuthemba womukweyi nohepele.”

¹⁰Olye ta ka hokana omukulukadhi omwaanawa? Oshoka omungunda gwe ogu vule omawe omanene.

¹¹Omutima gwomulumentu gwe ohagu mu inekele, ye ita pumbwa omaliko.

¹²Omulumentu gwe ohe mu ningile uuwanawa, hauwinayi, omasiku agehe gokukalamwenyo kwe.

¹³Oha sile oshimpwiyu omafufu goonzi noongodhi dholiina noha longo niikaha yi na ondjungu.

¹⁴Oku li po a fa osikepapindiki — ohe eta mo iipalutha ye tayi zi kokule.

¹⁵Oha meneka moontundumene e ta topolele aanegumbo ye iikulya niitopolwa yu uthilwa aadhike ye.

¹⁶Ota hala epya note li kulile, meliko lyiikaha ye ta tsike oshitsambe she shomiviinu.

¹⁷Oombwetelo dhe okwe dhi zaleka oonkondo nomaako ge okwe ga koleka.

¹⁸Oku uvite eliko lye tali koko, nolamba ye itayi dhimi uusiku.

¹⁹Oha tsu iikaha ye koshiyogohitho, nomake ge otaga dhiginine oshiyogohithopingo.

²⁰Eke lye ohe li kamunukile ohepele, niikaha ye ohe yi ganekele aakwanaluhepo.

²¹Egumbo lye ihali tila uutalala wombambi, oshoka yaandjawo ayehe oya zala oonguwo dhomafufu goonzi.

²²Oti itungile omakumbatha, oonguwo dhe odholiina ombwanawa ontiliganembwilili.

²³Omulumentu gwe okwa tseyika posheelo shoshilando, mpoka ta kuutumba pamwe naakuluntu yoshilando.

²⁴Ota hondjo oohema dholiina note dhi landitha po, nomapaya te ga halitha po kaahalithi yiipindi.

²⁵Oonkondo nesimano odho omizalo dhe, nota yolele esiku tali landula.

²⁶Okana ke ote ka makulile oohapu dhowino, nokelaka lye oku na enongeko lyuukuume.

²⁷Oha tonatele nawa iilonga yomegumbo lye noiha li oshikwiila shonyalo.

²⁸Oyanamati otaa thikama e taa tumbula elago lye; omulumentu gwe wo ote mu tanga ta ti:

²⁹“Aakiintu oyendji aadhiginini miilonga yawo, ihe ngoye ou ya vule ayehe.”

³⁰Oshuuluko shomukiintu kashi shi kwiinekelwa nuumbweshukile ohau yonuka; omukulukadhi ngoka ha tila Omuwa, oku na okutangwa.

³¹Na tundulukithwe kiiyimati yiilonga yiikaha ye, iilonga ye nayi mu tange miiyelo.