Read Oshindonga-Ombiimbeli Ondjapuki OMAYELETUMBULO 4 Bible Online

OMAYELETUMBULO 4 - Oshindonga-Ombiimbeli Ondjapuki bible

OMAYELETUMBULO 4

¹One aamwandjemati, pulakeneni omakumagidho gaho, opo mu uve ko mu likole owino.

²Oshoka otandi mu nongeke elongo lyo opala, omapukululo gandje inamu ga etha.

³Ongame sho nda li omumatyona putate omuholike nepona mekolo lyameme,

⁴tate okwa longo ndje e ta ti: “Omutima gwoye nagu dhiginine oohapu dhandje, dhama kiipango yandje e to kala u na omwenyo.

⁵Ilikolela owino, ilikolela uunongo, ino dhimbwa ngoye waa gamuke koohapu dhandje.

⁶Ino dhi etha, otadhi ke ku gamena; kala u dhi hole, nena otadhi ke ku tonatela.

⁷Oshinima shotango osho okulikola owino; gandja ayihe mbyoka u na, u likole owino.

⁸Yi tunda, nena otayi ke ku yela pombanda, otayi ku simanekitha, ngele to yi zala mothingo yoye.

⁹Otayi ka tula oshipaka shoongala sho opala komutse gwoye notayi ke ku pa oshishani hashi adhima.”

¹⁰Pulakena, mumwandje, ngoye u taambe oohapu dhandje, nena omimvo dhokukalamwenyo kwoye otadhi lelepalekwa.

¹¹Omondjila yowino tandi ku nongeke, otandi ku katukithile moshinkoti shaayuuki.

¹²Ngele to katuka, oonkatu dhoye itadhi katekwa, nongele to matuka, ito ka tengenya.

¹³Dhiginina eputudho, ino li etha tuu, li pungula, oshoka olyo omwenyo gwoye.

¹⁴Ino enda mondjila yaakaanakalunga, ngoye waa lyate mepola lyaawinayi.

¹⁵Yi etha, ino ya mo; gamuka mo, uka palwe.

¹⁶Oshoka itaa ka kotha, manga inaa ninga uuwinayi; oomposi dhawo otadhi ya londoka, manga inaa gwilitha gumwe moshiponga.

¹⁷Otaa li oshikwiila shuukeenakalunga notaa nu omaviinu guukolokoshi.

¹⁸Ondjila yaayuuki oya fa uuyelele weluwa tali tende, mboka tau yele sigo kwa shi.

¹⁹Ondjila yaakaanakalunga oya fa omilema; itaa tseya mpoka taa ka pundukila.

²⁰Mumwandje, pulakena shoka tandi ti, gameka okutsi kwoye koohapu dhandje.

²¹Ino etha, dhi ku thige po, dhi dhiginina meni momutima gwoye.

²²Odho omwenyo gwaangoka te dhi pewa, nealudho lyolutu lwe aluhe.

²³Tonatela omutima gwoye shi vule ayihe mbyoka yi na okutonatelwa, oshoka omo mu na ekota lyomwenyo.

²⁴Tula po iifundja yomokana koye, nou kaleke kokule nangoye omilungu dha goyoka.

²⁵Omeho goye naga tale gu ukilila, noombafu dhoye dha tongolola komeho.

²⁶Yelekanitha ondjila kohi yoompadhi dhoye, noondjila dhoye nadhi kale dha kolelela.

²⁷Oompadhi dhoye dhi kaleka kokule nuuwinayi, waa tengukile kolulyo nenge kolumoho.