Read Oshindonga-Ombiimbeli Ondjapuki OMAYELETUMBULO 5 Bible Online

OMAYELETUMBULO 5 - Oshindonga-Ombiimbeli Ondjapuki bible

OMAYELETUMBULO 5

¹Mumwandje, pulakena oondunge dhandje, gameka okutsi kwoye keuveko lyandje,

²opo u dhiginine euveko nomilungu dhoye dhi dhiginine uunongo.

³Oshoka omilungu dhomukiintu omukwiilongo otadhi ndonda onyiki, nondaathelo ye oyi na omuthenu ya fa omagadhi,

⁴ihe pehulilo oye omululululu a fa endombo, a tsa a fa egongamwele lyoongenge mbali.

⁵Oompadhi dhe otadhi kulukile muusi, noonkatu dhe otadhi ikokele moshaasi.

⁶Sho itee ende we mondjila yu uka komwenyo, oonkatu dhe otadhi tenguka inee shi tseya.

⁷Ano pulakenii ndje nawa, ne aamwandje, ne inamu gamuka koohapu dhandje.

⁸Ikaleka kokule naye, ngoye ino hedha pokantu kokagumbo ke,

⁹opo waa gandje esimano lyoye kuyalwe, nomimvo dhoye komuntu kee na ohenda,

¹⁰opo aakwiilongo yaa ka kute kuupyakadhi wiikaha yoye, niilonga yoye iidhigu yaa ye megumbo lyomukwiilongo,

¹¹nongoye to ka tonga kepwinopo lyolutu lwoye

¹²e to ti: “Omolwashike nda tondo eputudho, nomutima gwandje gwa dhini epukululo?

¹³Omolwashike inaandi pulakena ewi lyaapukululi yandje noinandi pupa ko kaalongi yandje?

¹⁴Konyalanyala ndi kale moshiponga moshigongi shegongalo.”

¹⁵Nwa omeya gomomuthima gwoye mwene, nomothithiya yomomatope goye mwene.

¹⁶Oothithiya dhoye odhi na tuu oku ka kungulukila pondje nomikanka dhoye dhomeya okomapandaanda?

¹⁷Odhoye awike, kadhi shi dhagulwe pamwe nangoye.

¹⁸Etope lyoye nali yambekwe, u nyanyukilwe omukulukadhi gwoye wa za naye kuufuko.

¹⁹Omenye oyo opala, okapundja okawanawa — ekolo lye nali ku nyanyudhe aluhe, kolwa aluhe kohole ye.

²⁰Mumwandje, omolwashike wa hala okunyanyukilwa omukiintu gwaantu, oye u kwate nokupapatela ontulo yanakuhola iipala?

²¹Oshoka oondjila dhomuntu kehe odhi igalala koshipala shOmuwa, nota konakona omapola ge agehe.

²²Uukolokoshi ohau yulu mwene gwawo, nuulunde ohau kwata omuningi gwawo.

²³Ota ka sa kepumpo lye, nokuugoya we uunene, ota ka kana po.