Read Oshindonga-Ombiimbeli Ondjapuki OMAYELETUMBULO 8 Bible Online

OMAYELETUMBULO 8 - Oshindonga-Ombiimbeli Ondjapuki bible

OMAYELETUMBULO 8

¹Owino itayi igidha nani? Nenge uunongo itau kololoka pombanda?

²Koondungu dhoondundu dhopondjila nopoompagiila dhoondjila tau thikama.

³Koombinga dhiiyelo, peelo lyoshilando, poombululu dhomiyelo tau kugagana mokule:

⁴“Aalumentu ne, one tandi ithana, newi lyandje tandi li yeluthile aana yaantu.

⁵Aantu ne yanathangwa, ilongeni okupikula omayele, nane omagoya, ilongeni okuuva ko oondunge.

⁶Pulakeneni, oshoka tandi popi iinima yolela, nomilungu dhandje tadhi ekamene uuyuuki.

⁷Oshoka ondaathelo yandje tayi popi oshili, nuukeenakalunga owo iihuna komilungu dhandje.

⁸Oohapu adhihe dhomokana kandje odhu uka, mudho kamu na iifundja nomakoto gasha.

⁹Adhihe otadhi yelele omunandunge, notadhi ukitha mboka ya likola ontseyo.

¹⁰Taambeni omapukululo gandje, hashisiliveli, hogololeni uunongo komeho goshingoli sho shene.

¹¹Oshoka owino oyi vule oshimona, nokaku na uulenga tau yelekwa nayo.

¹²“Ngame, Owino, omwiinekelwa momayele nondi na ontseyo neuveko lyu uka.

¹³EtiloKalunga olyo okutonda uuwinayi; ondi tonde uuntsa nuuntseyele, oondjenda oombwinayi nokana koluhoko.

¹⁴Omayele nepukululo olyandje; ondi na oondunge noonkondo.

¹⁵Koonkondo dhandje aakwaniilwa taa pangele, naaleli taa tula po omautho.

¹⁶Koonkondo dhandje aaniikandjo otaa lele, noomvalekele naatokolihapu ayehe yevi.

¹⁷Ondi hole mboka ye hole ndje, naamboka taa kongo ndje, otaa ka mona ndje.

¹⁸Pungame ope na uuyamba nesimano, omaliko nuuyuuki.

¹⁹Oshiyimati shandje oshiwanawa shi vule oshingoli sha yelithwa, iiyetwapo yandje oyi vule oshisiliveli sha hogololwa.

²⁰Otandi katukile mondjila yuuyuuki nomokati komapola guuyuuki,

²¹opo ndi thigululithe aaholike yandje omaliko, noompungulilo dhawo tandi dhi udhitha.”

²²“Omuwa okwa shiti ndje omutango gwiilonga ye, okuza konalenale.

²³Ondu umbwa nalenale muukwaaluhe, okuza ketameko, okuza komathimbo gaaluhe, evi manga inaali shitwa.

²⁴Omafuta manga inaaga holoka, oko nda li nale; nda valwa, manga kwa li kaaku na oothithiya dhi na omeya omanene.

²⁵Oko nda li, oondundu manga inaadhi dhikwa nomanga iikulundundu inaayi valwa,

²⁶manga inaa shita evi, nomalundu nenge okandhulumutu kevi nokuli.

²⁷Oko nda li nale, sho a yala egulu, sho a yalaleke ombanda yomeya momafuta.

²⁸Sho a dhike iikogo mookathele nokwa koleke oothithiya dhomeya mookandoli,

²⁹sho u uthile omafuta oongamba dhago, opo omeya gaa taaguluke omalombwelo ge, sho a dhike omakankameno gevi,

³⁰oko nda li nale nda fa engomba nda tegama naye, onde mu nyanyudha esiku nesiku, naaluhe nda dhanene koshipala she,

³¹nokudhanena kombanda yongonga yevi lye, nenyanyu lyandje olya li okunyanyukilwa aana yaantu.

³²“One aamati, pulakenii ndje. Aanelago oyo mboka haa dhiginine omapola gandje.

³³Pulakeneni omagando, mu pukuluke, ne inamu ga ekelahi.

³⁴Omunelago oye tuu ngoka ta pulakene ndje, oongoka ha tonatele esiku nesiku pomiyelo dhandje noha langele iikulo yomiyelo dhandje.

³⁵Oshoka ngoka ta mono ndje, ota likola omwenyo nOmuwa ota ka hokwa okukala pamwe naye.

³⁶Ihe ngoka ta hunutha ndje, ota ningi omwenyo gwe mwene oshege; ayehe mboka taa tondo ndje, oye hole eso.”