Read Oshindonga-Ombiimbeli Ondjapuki OMUUVITHI 10 Bible Online

OMUUVITHI 10 - Oshindonga-Ombiimbeli Ondjapuki bible

OMUUVITHI 10

¹Oondhi dha sa otadhi oleke nokumbutika omugwayo gwomupiluli; uusama uushona ou na ondjundo yi vule omayele nesimano.

²Omwenyo gwomunawino ogwa gama kolulyo, ihe omutima gwomusama okolumoho.

³Eeno, omugoya ngele te ende mepola, oondunge otadhi mu pumbu, noti ihololele shaa ngoka kutya ye egoya.

⁴Ondjahi yomukwaniilwa ngele tayi ku hwamene, ino etha iilonga yoye, oshoka engungumano otali sindi omapuko omanene.

⁵Oku na epuko limwe nde li koneke kohi yetango, ombedhi ndjoka tayi zi komupangeli:

⁶aasama taa yelwa pombanda unene, naayamba taa shonopekwa.

⁷Onda mono aapika ya kayila uukambe, naawa taye ende kolupadhi ya fa aapika.

⁸Ngoka ta fulu ekelo, ota vulu okugwila mo; ngoka ta kumuna ekuma, ota lika keyoka.

⁹Ngoka ta tandula omamanya, ote ehamekwa kugo; ngoka ta panda iikuni, ota tosholwa iilalo kuyo.

¹⁰Ngele ekuya olya simpa, nomuntu ite li upike, nena nge te li longitha, ota hepeke oonkondo; ihe omunawino ote li upike.

¹¹Eyoka ngele tali li omuntu, manga inaali nonomwa, nena uunkulungu womunonomi kau na we oshilonga.

¹²Oohapu dha za mokana komunawino, odha simana, ihe omilungu dhomugoya otadhi mu nina po ye mwene.

¹³Etameko lyoohapu dhomokana ke olyo uugoya, nehulilo lyokupopya kwe uulayi wa pitilila.

¹⁴Egoya ohali popyagana omahapu ogendji, ihe omuntu ito tseya shoka tashi ka ningwa naashoka tashi ka kala ko konima ye nolye te ke mu lombwela shika.

¹⁵Uupyakadhi womugoya otau mu lolokitha, oshoka ita tseya nokuli okuya koshilando.

¹⁶Yaye shilongo ngoye, omukwaniilwa ngele okanona, nomalenga goye haga menekele omatelekela ongulangula!

¹⁷Omunelago shilongo ngoye, ngele omukwaniilwa gwoye omunedhina, nongele omalenga goye haga ningi iituthi pethimbo lyo opala pashilumentu nohangaashi oonkolwi.

¹⁸Omoluunyenge omitenge dhongulu otadhi teka po, nomoluunyolowe ongulu tayi kala yi na oontongo.

¹⁹Iitelekela ohayi telekelwa okunyanyudha, omaviinu haga hangelwa okushambudha omwenyo; ihe iimaliwa ohayi eta po ayihe.

²⁰Omukwaniilwa ino mu tuka nando omomadhiladhilo goye, nomondunda yoye yokulala ino tuka omuyamba, oshoka oondhila dhokegulu otadhi fala ewi lyoye, niikwamawawa tayi holola oohapu dhoye.