Read Oshindonga-Ombiimbeli Ondjapuki OMUUVITHI 11 Bible Online

OMUUVITHI 11 - Oshindonga-Ombiimbeli Ondjapuki bible

OMUUVITHI 11

¹Umbila oshikwiila shoye kombanda yomeya, oshoka nge pwa piti omasiku ogendji, oto ke shi monununa.

²Oshitopolwa shi pa ooheyali, eeno, oohetatu wo, oshoka ino tseya oshiponga oshini tashi ka kala kombanda yevi.

³Iikogo ngele oyu udha, omvula otayi lokele kevi. Omuti ngele otagu gwile lwokuumbugantu nenge lwokuumbangalantu, otagu lala pehala tuu mpoka gwa gwile.

⁴Oongoka ha tala ombepo, ita kunu; naangoka ha tala iikogo, ita teya.

⁵Ngaashi ino tseya ondjila yombepo, nenge nkene omasipa taga tungwa mela lyomusimba, osho wo ino tseya iilonga yaKalunga, ngoka a longo ayihe.

⁶Kuna oombuto dhoye ongula, ngoye ino vululukitha wo iikaha yoye komatango, oshoka ino tseya, oyini po tayi ka mena, oondjika nenge oondjiyaka, nenge adhihe mbali tadhi ka mena.

⁷Uuyelele owo uutoye, nosho opalela omeho okutala etango.

⁸Oshoka omuntu nge ta kala e na omwenyo omule omimvo odhindji, oku na okwiinyanyudha mwaadhihe e ta dhimbulukwa omasiku gomilema, kutya otaga ka kala ogendji. Ayihe mbyoka tayi ya, oyowala, owaleelela.

⁹Mugundjuka ngoye, nyanyukwa muugundjuka woye, nou nyanyudhe omutima gwoye momathimbo guugundjuka woye. Enda momapola gokomutima gwoye nomokuligamena kwomeho goye, ihe kala u shi shi kutya Kalunga ote ke ku etela ayihe mbika mepangulo.

¹⁰Tidha mo oshizimbi momutima gwoye nou kaleke uuwehame kokule nolutu lwoye, oshoka uugundjuka osho owala osho owala, owaleelela.