Read Oshindonga-Ombiimbeli Ondjapuki OMUUVITHI 2 Bible Online

OMUUVITHI 2 - Oshindonga-Ombiimbeli Ondjapuki bible

OMUUVITHI 2

¹Ondi ipopile momwenyo nda ti: “Eewa, otandi ke ku makelitha enyanyu, nyanyukilwa uuwanawa!” Ihe tala, naashika osima yowala.

²Koondjola onda ti, shika uugoya! Kenyanyu onda ti, otashi kwatha shike?

³Onde shi dhiladhila momwenyo gwandje, ndi nyanyudhe olutu lwandje nomaviinu — manga omwenyo gwandje tagu endithwa kowino — nondi ikwatelele kuusama, opo ndi mone shoka sho opalela aana yaantu ye na oku shi ninga kohi yegulu momukokomoko gwomwaalu gwomasiku gokukalamwenyo kwawo.

⁴Onda longa iilonga iinene; ondi itungile omagumbo, nondi itsikile iitsambe yomiviinu.

⁵Ondi ikunine omapya niikunino nonda tsike omiti dhiiyimati dhi ili nodhi ili.

⁶Ondi ihupile omatale, opo ndi tekele iimeno nomiti omishona.

⁷Ondi ilandele aapika aalumentu naakiintu, nonda likola mboka ya valelwa megumbo lyandje. Onda munu oongombe, oonzi niikombo, ndi vule ayehe mboka ya tetekelele ndje muJerusalem.

⁸Ondi igongelele wo oshisiliveli noshingoli nomaliko gaakwaniilwa niilongo; ondi imonene aayimbi aalumentu naakiintu nomanyanyu gaana yaantu, aaholike oyendjiyendji.

⁹Onda koko aluhe nda ningi omunene ndi vule ayehe mboka ya li ndje komeho muJerusalem. Onda kaleke owino yandje pungame.

¹⁰Noshaa shoka omeho gandje ge shi hala, inandi ge shi indika; omwenyo gwandje inagu iyageka enyanyu nando olimwe, oshoka omwenyo gwandje ogwa nyanyukilwa iilonga yandje ayihe ndi ipyakidhile nayo, nosho sha li oshitopolwa shiilonga yuupyakadhi wandje.

¹¹Sho nda tala iilonga yandje ayihe mbyoka ye etwa po kiikaha yandje nuupyakadhi woonkambadhala dhandje adhihe ndhoka nda ningi — tala, ayihe oya li osima yowala nokutidha ombepo, nokaku na sha shomupondo kohi yetango.

¹²Onda pungulukile owino, uugoya nuusama nde u tongolola nomeho. Omukwaniilwa ota vulu okuninga shike shoka inaashi ningwa nale komutetekeli gwe?

¹³Eeno, onda tala ko, owino oyi na omwago yi vule uugoya, ngaashi uuyelele u na omwago u vule omilema.

¹⁴Omunawino oku na omeho momutse gwe, ihe omusama ote ende momilema. Ihe onde shi dhimbulula kutya ayehe otaa ka adhika keadhiko limwe.

¹⁵Onkee ndi ipopile momwenyo gwandje nda ti: “Shoka ngaa tashi adha omugoya, osho wo tashi ka adha ndje. Owino oye etele ndje po shike ano?” Nondi ipopile momutima gwandje kutya naashika wo osima yowala.

¹⁶Oshoka sho shene okudhimbulukiwa kwomunawino oku thike pamwe nokwegoya, oshoka monakuyiwa ayehe otaa ka dhimbiwa; ndishi omunawino naye wo ota si ngaashi egoya.

¹⁷Onkee ano nda ketelwa kokukalamwenyo, oshoka iilonga mbyoka hayi longwa kohi yetango, oya ehameka ndje, molwaashoka ayihe oyowala nokutidha ombepo.

¹⁸Onda kunyukwa oonkambadhala dhandje adhihe ndhoka nda gwanitha nuudhigu kohi yetango, nondi na oku dhi thigila omuntu ngoka ta landula ndje.

¹⁹Olye a tseya ngele ye omunawino nenge egoya? Oye ta ka lela iilonga yandje mbyoka nde yi tsakanitha nuudhigu nonde yi likola nuunongo kohi yetango. Naashika wo osima yowala.

²⁰Onkee ano ondi iyekelele molwiilonga ayihe mbyoka nda tsakanitha nuudhigu kohi yetango.

²¹Omuntu nando ti ipyakidhile nowino, nuunongo nonuunkulungu, ayihe ote yi thigile ngoka inee yi longela. Naashika osima yowala, oshiponga nokuli.

²²Oshoka omuntu oku na ondjambi yashike momaipyakidhilo nomoonkambadhala dhe ti ihepeke nadho kohi yetango?

²³Oshoka omasiku ge agehe oge na uuwehame nomaihepeko ge agehe omalulu, nokuli uusiku omwenyo gwe itagu vululukwa nando. Naashika owaleelela.

²⁴Omuntu ke na elago lilwe lyaa shi okulya nokunwa nokunyanyudha omwenyo gwe niilonga ye yuupyakadhi. Onde shi mono wo kutya osha zi miikaha yaKalunga.

²⁵Oshoka olye ta vulu okulya nokunyanyukwa keehe mu na?

²⁶Oshoka omuntu ngoka e mu opalela, Kalunga ote mu pe owino, uunongo nenyanyu, ihe omulunde ote mu pe oshilonga shokugongela noshokundumbila pamwe, opo e yi gandje kungoka e mu opalela. Naashika wo owaleelela nokutidha ombepo.