Read Oshindonga-Ombiimbeli Ondjapuki OMUUVITHI 3 Bible Online

OMUUVITHI 3 - Oshindonga-Ombiimbeli Ondjapuki bible

OMUUVITHI 3

¹Ayihe oyi na otundi yayo, noshaa shoka kohi yegulu oshi na ethimbo lyasho:

²ethimbo lyokuvalwa, nethimbo lyokusa ethimbo lyokutsika, nethimbo lyokutudha mo shoka sha tsikilwe

³ethimbo lyokudhipaga, nethimbo lyokwaaludha ethimbo lyokukumuna po, nethimbo lyokutunga

⁴ethimbo lyokulila, nethimbo lyokuyola ethimbo lyokunika uuthigwa, nethimbo lyokudhana

⁵ethimbo lyokuhalakanitha omamanya, nethimbo lyoku ga gongela ethimbo lyepapatelathano, nethimbo lyokukala kokule nepapatelathano

⁶ethimbo lyokukonga, nethimbo lyokukanitha ethimbo lyokupungula, nethimbo lyokweekelahi

⁷ethimbo lyokutuula, nethimbo lyokuhondja ethimbo lyokumwena, nethimbo lyokupopya

⁸ethimbo lyokuholathana, nethimbo lyokutondathana ethimbo lyiita, nethimbo lyombili.

⁹Nakulonga oku na ekwatho lyashike mumbyoka e yi longo?

¹⁰Onda tala kiilonga mbyoka iidhigu Kalunga a pe aana yaantu yi ipyakidhile nayo.

¹¹Ayihe okwe yi ningi yo opala pethimbo lye. Okwa tula uukwaaluhe moomwenyo dhaantu, po pwaa na omuntu ta tseya iilonga mbyoka Kalunga a longo okuza ketameko sigo okehulilo.

¹²Onde shi dhimbulula kutya omuntu mokukalamwenyo kwe ke na elago lilwe lyaa shi okunyanyukwa nokulonga uuwanawa.

¹³Naashika wo omuntu a lye ye a nwe noku nyanyukilwe iilonga yuupyakadhi we auhe — osho omagano gaKalunga.

¹⁴Onda dhimbulula kutya ayihe mbyoka Kalunga a ningi, otayi kala po sigo aluhe, itaku gwedhwa sha noitaku kuthwa sha; Kalunga okwe yi ningi ngaaka, opo a tilike.

¹⁵Ayihe mbyoka yi li ko, oko ya li nale; naambyoka tayi ka kala ko, oko ya li nale; Kalunga nota ka kongulula po mbyoka ya pitilila po.

¹⁶Kohi yetango onda dhimbulula ko ishewe ehala lyetokolo — oko kwa li uukolokoshi, nehala lyuuyuuki — oko kwa li uukolokoshi.

¹⁷Ondi ipopile momwenyo gwandje nda ti: “Kalunga ota ka pangula aayuuki naakolokoshi, oshoka oku na ethimbo lyoshinima kehe nolyoshilonga kehe.”

¹⁸Ondi ipopile momwenyo gwandje nda ti: “Molwaana yaantu otashi ningwa po, opo Kalunga e ya yeleke noya dhimbulule kutya muyo yene oya fa iimuna.”

¹⁹Oshoka shoka tashi adha aana yaantu, osho tashi adha wo iimuna; ayehe oye na oshipewa shi thike pamwe. Ngaashi gumwe ta si, osho wo mukwawo ta si, naayehe oye na omufudho gwa faathana. Omuntu ke vulathane niimuna, oshoka ayihe oyowalawala.

²⁰Ayihe otayi yi kehala limwe. Ayihe oya za montsi yevi, naayihe otayi galukile montsi yevi.

²¹Olye e shi shi kutya omwenyo gwaana yaantu otagu londo handiyaka pombanda, nomwenyo gwiimuna otagu kulukile moombogo dhevi?

²²Onda dhimbulula ano kutya kape na oshiwanawa shaa shi shika, omuntu nge ti inyanyudha niilonga ye, oshoka oyo oshipewa she, oshoka olye te mu fala ko hoka, opo a mone shoka tashi ka kala ko, nge a zi po?