Read Oshindonga-Ombiimbeli Ondjapuki OMUUVITHI 6 Bible Online

OMUUVITHI 6 - Oshindonga-Ombiimbeli Ondjapuki bible

OMUUVITHI 6

¹Oku na oshiponga shoka nda mono kohi yetango tashi thindile uuntu pohi.

²Omuntu ngoka a pewa kuKalunga uuyamba nomaliko nesimano, ina hepa we sha, ihe Kalunga ite mu pe ompito yoku yi nyanyukilwa, oshoka omuyeni ote yi nyanyukilwa. Shika eihepeko lyowala nuuwehame uululululu.

³Omuntu nge ta vala aanona ethele nota kala ko olule, omimvo nokuli odhindji, ihe omwenyo gwe itagu kuta uuwanawa ye ita fumvikwa nokuli nawa, nena otandi ti: Omupononwa oku na elago e mu vule.

⁴Oshoka te ya po owala nota yi momilema, nedhina lye otali siikilwa komilema.

⁵Ina mona etango noine li tseya. Oku na evululuko e vule omuntu ngo.

⁶Eeno, nando omuntu ngoka na kale e na omwenyo lwoomvula omayuvi gaali, ihe ina nyanyukilwa uuwanawa — ayihe itayi ka hulila pehala limwe?

⁷Iilonga yuupyakadhi ayihe yomuntu oyokokana ke, ihe uuhalu itau fudhithwa.

⁸Oshoka omunawino oku na shike e vule omusama, nohepele otayi mono shike mokutseya okukala mokati kaanamwenyo?

⁹Okuligamena nomeho oku vule okweendagula kuuhalu. Naashika owaleelela nokutidha ombepo.

¹⁰Ashihe shoka tashi ningwa, oshu uthwa nale; osha tseyika nale kutya omuntu omushike, ita vulu okutamaneka ngoka e mu vule.

¹¹Oohapu odhindji otadhi indjipalitha uupyakadhi, omuntu oti imonene mo shike?

¹²Oshoka olye ta tseya shoka tashi opalele omuntu momasiku gokukalamwenyo kwe okufupi, ga fa omuzizimba? Olye ta tseyithile omuntu shoka tashi ka kala ko konima ye kohi yetango?