Read Oshindonga-Ombiimbeli Ondjapuki LEVITIKUS 13 Bible Online

LEVITIKUS 13 - Oshindonga-Ombiimbeli Ondjapuki bible

LEVITIKUS 13

¹Omuwa okwa lombwele Moses naAaron omautho ngaka.

²Ngele oku na omuntu e na okandhulumutu moshipa, okupya omuthithilalo nenge okatotono okatokele a fa a kwatwa koshilundu, na falwe komuyambi Aaron nenge kugumwe gwomoyana aayambi.

³Omuyambi na konakone okatotono hoka kaa li nawa. Ngele omafufu mokatotono oga shituka omatokele, nena mbuka owo uuvu woshilundu. Omuyambi nge e shi mono, na tye omuntu nguka oku na oshidhila.

⁴Ihe okatotono okatokele ngele inaka taka okandambo moshipa, nomafufu inaga shituka omatokele, omuyambi ne mu ikalekele omasiku gaheyali e li awike.

⁵Omuyambi ne mu konakone ishewe mesiku etiheyali, nongele ota tala okatotono oka fa ngaashi ka li nale, inaka taandela, ne mu ikalekele ishewe omasiku gaheyali.

⁶Omuyambi ne mu konakone ishewe mesiku etiheyali, nongele okatotono oka ganya ko inaaka taandela we nolutu, ne mu uthe omuyelele; okwa pya omuthithilalo gwowala. Omuntu ngoka na yoge oonguwo dhe nota kala omuyelele.

⁷Ihe ngele okatotono oka taandele nolutu, sho omuyambi e mu konakona nokwe mu utha omuyelele, na holoke ishewe komuyambi.

⁸Omuyambi ote mu konakona ishewe, nongele oka taandela, nena ne mu uthe e na oshidhila; mbuka uuvu woshilundu.

⁹Ngele oku na omuntu e na uuvu woshilundu, ne etwe komuyambi,

¹⁰ngoka ne mu konakone. Ngele oku na okandhulumutu okatokele moshipa she ka shitukitha omafufu ga ninga omatokele nomwa mena ontumba,

¹¹mbuka owo uuvu uukulu woshilundu. Omuyambi ne mu uthe e na oshidhila; ita pumbwa okwiikalekelwa, oshoka oye e na oshidhila pwaa na omalimbililo.

¹²Oshilundu ngele osha taandela nolutu aluhe sha siikila olutu okuza komutse sigo okoshithi shompadhi,

¹³omuyambi ne mu konakone natango. Ngele okwa mono kutya osha siikila naanaa olutu aluhe, na uthe omuntu ngoka omuyelele. Oshoka oshipa she osha toka apehe, oye omuyelele.

¹⁴Ihe shampa tuu a mena ontumba, oye e na oshidhila.

¹⁵Omuyambi ne mu konakone ishewe, nongele ota mono ontumba ya mena, ne mu uthe e na oshidhila. Ontumba ya mena otayi holola uuvu woshilundu.

¹⁶Ihe ontumba ngele tayi pwine po e tayi shituka ontokele, omuntu na ye komuyambi,

¹⁷ngoka ne mu konakone ishewe. Ontumba ngele oya toka, oye omuyelele, nomuyambi ne mu uthe omuyelele.

¹⁸Ngele oku na omuntu ta tumbuka oshitumbuka e tashi polo,

¹⁹nopehala ndyoka tapu tutuluka okandhulumutu okatokele nenge okatotono ka nika uutokele, omuntu ngoka na ye komuyambi.

²⁰Omuyambi ne mu konakone, nehala ndyoka ngele olya fa lya kuluka lya taka okandambo, nomafufu gamo oga shituka omatokele, ne mu uthe e na oshidhila. Owo uuvu woshilundu sha tameke moshitumbuka.

²¹Ihe omuyambi ngele ota konakona ehala ndyoka e ta mono kutya omafufu ngoka ga mena mo, kage shi omatokele lyo inali taka okandambo, ihe olya tsima, omuyambi na ikalekele omuntu ngoka omasiku gaheyali.

²²Ngele okatotono otaka taandele, omuyambi ne mu uthe e na oshidhila; oku na uuvu woshilundu.

²³Ihe ngele okatotono otaka kala inaaka lunduluka, osho oshiyadhi showala shoshitumbuka; omuyambi na uthe omuntu ngoka omuyelele.

²⁴Omuntu ngele nani okwa pi, nomontumba ya mena moshilalo otamu holoka okatotono ka nika uutokeletiligane nenge uutokele,

²⁵omuyambi ne mu konakone. Omafufu gomoshilalo ngele oga shituka omatokele nasho osha taka okandambo, owo uuvu woshilundu we endele moshilalo shomulilo. Omuyambi ne mu uthe e na oshidhila.

²⁶Ihe omafufu ngele inaga shituka omatokele noshilalo inashi taka okandambo, ndele oshi li po sha tsima, omuyambi ne mu iyoololele omasiku gaheyali.

²⁷Omuyambi ne mu konakone ishewe mesiku etiheyali. Ngele okatotono oka taandele, owo uuvu woshilundu, nomuyambi ne mu uthe e na oshidhila.

²⁸Ihe ngele okatotono oka kala inaaka taandela ko ka tsima, nena mboka kau shi uuvu woshilundu. Omuyambi ne mu uthe omuyelele, oshoka osho oshiyadhi showala.

²⁹Ngele oku na omulumentu nenge omukiintu e na oshitopolwa shaa li nawa momutse nenge koshama,

³⁰omuyambi ne shi konakone. Ngele osha taka okandambo, nomafufu ge li mo omashunga go omashona molumbumbu, owo uuvu woshilundu shomomutse, nomuyambi na uthe omuntu ngoka e na oshidhila.

³¹Omuyambi mokukonakona ehala ndyoka lyaa li nawa ngele ota mono kutya inali taka okandambo, ihe kali na omafufu omaluudhe, ne mu ikalekele omasiku gaheyali.

³²Omuyambi na konakone ehale ndyoka ishewe mesiku etiheyali, nongele inali taandela nomulyo kamu na omafufu omashunga lyo inali taka okandambo,

³³omuntu ni ikulule kakele kehala ndyoka lyaa li nawa. Omuyambi ne mu ikalekele omasiku omakwawo gaheyali.

³⁴Mesiku etiheyali omuyambi ne mu konakone ishewe. Ehala lyaa li nawa ngele inali taandela lyo inali taka okandambo, omuyambi ne mu uthe omuyelele. Omuntu ngoka na yoge oonguwo dhe nota kala omuyelele.

³⁵Ihe ngele uuvu owa taandele konima sho u uthwa omuyelele,

³⁶omuyambi ne mu konakone ishewe. Uuvu ngele owa taandele, ita pumbwa we a tale omafufu ngele oga fa oshunga; omuntu ngoka oku na oshidhila pwaa na omalimbililo.

³⁷Ihe omuyambi ngele ote shi tala kutya uuvu inau taandela nomafufu omaluudhe oga mena mehala lyawo, omuntu okwa aluka, nomuyambi ne mu uthe omuyelele.

³⁸Ngele oku na omulumentu nenge omukiintu e na uutotono uutokele moshipa she,

³⁹omuyambi na konakone omuntu ngoka. Uutotono ngele uutokele wa dhimeya, nena mbyoka oyo iipulu yowala ya tuta molutu; omuntu ngoka omuyelele.

⁴⁰Ngele oku na omulumentu omutse gwe tagu thuka, oye oku na ongwala; oye omuyelele.

⁴¹Omutse gwe ngele otagu thuka koshipala, oku na oohenya; oye omuyelele.

⁴²Ihe mongwala nenge moohenya nge tamu holoka okandhulumutu okatokele ka nika uutiligane, mboka owo uuvu woshilundu wa tuta mongwala nenge moohenya.

⁴³Omuyambi ne mu konakone, nongele oku na okandhulumutu okatokele ka nika uutiligane,

⁴⁴omuyambi ne mu uthe e na oshidhila omoluuvu woshilundu u li momutse gwe.

⁴⁵Omuntu ngoka e na uuvu woshilundu, na zale oonguwo dha tuuka, omafufu ge inaga kamulwa, na siikile oshama she ti igidha ta ti: “Onakunika oshidhila, nakunika oshidhila!”

⁴⁶Ota kala e na oshidhila, manga e na uuvu woshilundu, ye na kale kondje yontanda.

⁴⁷Oshushi ngele oyi li monguwo yomafufu goonzi nenge yoliina,

⁴⁸moshilapi sholiina nenge shomafufu goonzi nenge moshipa nenge mushoka sha ningwa moshipa,

⁴⁹ngele eha ndyoka lya kwaulwa olya nika lya ziza nenge lya tiligana, oyo oshushi tayi taandele, noshinima oshi na okuulukilwa omuyambi.

⁵⁰Omuyambi ne shi konakone nokwiikalekela onguwo omasiku gaheyali.

⁵¹Mesiku etiheyali ne yi konakone ishewe, nongele oshushi oya taandela, nena oshinima otashi kala shi na oshidhila.

⁵²Omuyambi na fike po oshinima sha kwaulwa, oshoka oshushi ombwinayi; oyi na okufikwa po.

⁵³Ihe omuyambi ngele ta mono kutya oshushi inayi taandela we moshinima sha kwaulwa,

⁵⁴ne shi yogithe e te shi ikalekele ishewe omasiku gaheyali.

⁵⁵Nena ne shi konakone, noshushi ngele inayi lundulula olwaala lwayo, nando ongaaka inaayi taandela, oshinima oshi na oshidhila; nashi lungunithwe po, oshoka osha lika koshushi, kape na mbudhi eolelo oli li kombanda nenge omeni.

⁵⁶Ihe uuna omuyambi te shi konakona ishewe, noshushi ya ganya, na tuule oshitopolwa shoka konguwo yelapi nenge yoshipa.

⁵⁷Oshushi nge tayi holoka ishewe tayi taandele, oshinima shoshushi nashi fikwe po.

⁵⁸Ngele oshushi mokuyogwa oya ganya, oshinima nashi yogululwe notashi yele ishewe.

⁵⁹Ndjika oyo ompango yekwaulo lyoshushi moonguwo, ongele dhomafufu goonzi nenge dholiina nenge dha ningwa moshipa.