Read Oshindonga-Ombiimbeli Ondjapuki LEVITIKUS 16 Bible Online

LEVITIKUS 16 - Oshindonga-Ombiimbeli Ondjapuki bible

LEVITIKUS 16

¹Omuwa okwa popi naMoses konima yeso lyaana yaAaron yaali mboka ya si, sho ya holoka koshipala shOmuwa ye na omulilo gwaa shi omuyapuki.

²Omuwa okwa ti: “Lombwela omumwanyoko Aaron kaa ye ethimbo kehe a hala mEhala lyUuyapukielela meni lyetopolitho, oshoka omo tandi holoka ndi li moshikogo kombanda yoshisiikilo shoshikethahangano. Ngele ita vulika, ota si.

³Ihe uuna ta yi mEhala lyUuyapukielela, na ete ongombe yomutanda yi ninge eyonondjambo, nonzi ondumentu yi ninge efikilondjambo.

⁴Ni iyoge olutu aluhe nawa ye na zale oonguwo dhuuyambi dholiina: ohema, ombulukweya, ekwamo nentsilu.”

⁵Egongalo lyaIsrael nali gandje iikombo iyali iilumentu yi ninge eyonondjambo, nonzi ondumentu yi ninge efikilondjambo.

⁶Aaron na yambe ongombe ondumentu yi ninge eyonondjambo lyokukutha po oondjo dhe mwene nodhaanegumbo lye.

⁷Nena na kuthe iikombo mbyoka iyali e te yi fala kosheelo shetsalihangano.

⁸Oko ne yi umbile oshihogololitho ta longitha uumanya uyali, kamwe ka nyolwa “oshOmuwa” nakamwe “oshaAsasel.”

⁹Aaron na kuthe oshikombo shoka sha kwatwa koshihogololitho shi ninge shOmuwa e te shi yamba eyonondjambo.

¹⁰Oshikombo shoka sha hogololelwa Asasel, nashi tulwe koshipala shOmuwa shi na omwenyo e tashi tidhilwa kombuga shi ye kuAsasel, opo shi kuthe po oondjo dhaantu.

¹¹Uuna Aaron ta yamba ongombe ondumentu yi ninge eyonondjambo lye mwene naanegumbo lye,

¹²na kuthe oshikangwa shomulilo shu udha omakala gomulilo koshiyambelo neshambekela lyu udha lyiitsinino noku yi fala mEhala lyUuyapukielela.

¹³Iitsinino ne yi tule momulilo koshipala shOmuwa, olwithi lwayo lu siikile oshisiikilo shoshikethahangano, opo kee shi mone a se.

¹⁴Na kuthe ombinzi yimwe yongombe ondumentu note yi nagele nomunwe gwe komeho goshisiikilo e ta nagele onkwawo komeho goshikethahangano luheyali.

¹⁵Konima yaambika na dhipage oshikombo sheyonondjambo lyoshigwana e ta fala ombinzi yasho mEhala lyUuyapukielela e te yi shashamine koshisiikilo nokomeho goshikethahangano.

¹⁶Pahedhi ndjika na opaleke pamusindilo Ehala lyUuyapukielela koonyata dhAaisraeli nokomayono gawo agehe. Oye oku na oku shi ningila etsalihangano, oshoka oli li mokati kontanda ndjoka ya nyatekwa.

¹⁷Okuza pethimbo ndyoka Aaron ta yi mEhala lyUuyapukielela, a ka tsakanithe eopaleko lyopamusindilo, sigo okethimbo ndyoka ta mana a ze mo, inamu kala nando omuntu metsalihangano. Ngele a tsakanitha eopaleko lyopamusindilo omolwe mwene naanegumbo lye nomolwegongalo alihe,

¹⁸na pite mo e ta yi koshiyambelo shi li koshipala shOmuwa, opo e shi yapule. Na kuthe mombinzi yongombe ondumentu nomombinzi yoshikombo e te yi gogo kooniga adhihe dhoshiyambelo.

¹⁹Na nagele ombinzi yimwe koshiyambelo nomunwe gwe luheyali. Pahedhi ndjika ote shi yelitha koonyata dhuulunde wAaisraeli e te shi yapula.

²⁰Aaron sho a mana okutsakanitha omisindilo dhokuyelitha Ehala lyUuyapukielela, etsalihangano alihe noshiyambelo, nena na ete po oshikombo shoka shi na omwenyo sha hogololelwa Asasel.

²¹Na tenteke iikaha ye komutse gwoshikombo e ta hempulula uuwinayi auhe noondjo adhihe niikulumuna ayihe yAaisraeli. Osho ngaaka te yi tenteke komutse gwoshikombo. Nena omuntu ngoka a uthilwa oku shi ninga, na tidhile oshikombo kombuga.

²²Oshikombo otashi humbata po oondjo dhawo adhihe noku dhi fala kokuma kwa mbugala.

²³Nena Aaron ne ye metsalihangano, a hule mo oonguwo dhuuyambi ndhoka a zalele, manga inaa ya mEhala lyUuyapukielela, e te dhi thigi mo.

²⁴Na yoge olutu lwe aluhe mehala eyapuki e ta zala oonguwo dhe dhoshito. Konima yaambika na ze mo e ta yamba efikilondjambo lyokukutha po oondjo dhe mwene nodhoshigwana.

²⁵Na lungunithile oofu dhoshimuna koshiyambelo, dhi ninge eyonondjambo.

²⁶Omulumentu ngoka a tidhile oshikombo kombuga, shi ye kuAsasel, na yoge oonguwo dhe ye ni iyoge olutu aluhe, manga inaa galukila montanda.

²⁷Ongombe ondumentu noshikombo sheyonondjambo mbyoka ombinzi yayo ya falelwe mEhala lyUuyapukielela okudhima po oondjo, nayi falwe kondje yontanda nokulungunithwa po. Ekunka, onyama niikwamela nayi lungunithwe po ayihe.

²⁸Ngoka te yi lungunitha po, na yoge oonguwo dhe ye ni iyoge olutu aluhe, manga inee ya montanda.

²⁹Omautho taga landula naga dhigininwe aluhe sigo aluhe. Mesiku etimulongo lyomwedhi omutiheyali Aaisraeli naakwiilongo ya kala mokati kawo naa idhilike iikulya yo inaa longa sha.

³⁰Esiku ndyoka otaa yelithwa koondjo dhawo adhihe, opo ya kale ya yogoka koshipala shOmuwa.

³¹Esiku ndyoka nali kale eyapukilela kuyo, uuna ndoka taa idhilike iikulya noitaa longo nando osha. Eutho ndika nali dhigininwe aluhe sigo aluhe.

³²Omuyambimukuluntu ngoka a yapulwa nokwa yoololelwa a landule he moshilonga, na tsakanithe omisindilo dheyelitho. Na zale oonguwo dhuuyambi,

³³e ta tsakanitha omisindilo dhokuyelitha Ehala lyUuyapukielela netsalihangano alihe, oshiyambelo, aayambi naakwanegongalo ayehe.

³⁴Omautho ngaka naga dhigininwe aluhe sigo aluhe. Omisindilo nadhi gwanithwe lumwe omumvo kehe okuyelitha Aaisraeli koondjo dhawo adhihe. Osha ningwa, ngaashi Omuwa a lombwele Moses.