Read Oshindonga-Ombiimbeli Ondjapuki LEVITIKUS 18 Bible Online

LEVITIKUS 18 - Oshindonga-Ombiimbeli Ondjapuki bible

LEVITIKUS 18

¹Omuwa okwa lombwele Moses a ti:

²“Lombwela Aaisraeli to ti: ‘Ongame Omuwa Kalunga keni.

³Inamu holela iilonga yAayegipiti, sho mwa li mokati kawo, nenge yaantu mboka ye li muKaanan, hoka tandi mu fala.

⁴Vulikeni koompango dhandje, mu ninge shoka tandi mu lombwele. Ongame Omuwa Kalunga keni.

⁵Landuleni iiholelwa noompango tandi dhi mu pe; ngele tamu shi ningi, otamu kala mu na omwenyo. Ongame Omuwa.

⁶“ ‘Inapu kala omuntu ta hedha komukwawolela, opo a lale naye. Ongame Omuwa.

⁷Ino sitha ho ohoni, u lale nanyoko; ino lala naye.

⁸Ino lala nomukiintu gwaho; otashi sitha ho ohoni.

⁹Ino lala namumwanyoko, na kale nee omumwaho, omuna gwaho nenge omuna gwanyoko, a valelwa maandjeni nenge palwe.

¹⁰Ino lala nomuna gwomumwoye omumati nenge nomuna gwomumwoye omukadhona: otashi ku sitha ohoni.

¹¹Ino lala nomumwaho, oshoka a valwa kuho.

¹²Ino lala nahogona, oshoka oye omukwawo gwaho.

¹³Ino lala nanyokogona, oshoka oye omukwawo gwanyoko.

¹⁴Ino sitha hogona omusamane ohoni, u lale nomukiintu gwe.

¹⁵Ino lala noshitenya shoye, oshoka oye omukiintu gwomumwoye.

¹⁶Ino lala nasuwala yoye, oye omukiintu gwomumwanyoko.

¹⁷Ino lala nomuvongambelela gwoye nenge omuna gwomumati gwomuvongambelela. Oyo aakweni. Shika oshipwe oshinene.

¹⁸Ino ushika suwala yoye, a ninge gumwe gwomaakiintu yoye, manga omumwayina ngoka wa hokana e na omwenyo.

¹⁹“ ‘Ino lala nomukiintu e li komwedhi, oshoka kwa nika oshidhila.

²⁰Ino lala nomukiintu gwamukweni; otashi ku kwatitha oshidhila.

²¹Ino gandja aamwoye ya yambelwe oshikalunga Molek, opo waa nyateke edhina lyOmuwa. Ongame Omuwa.

²²Hamulumentu ta lala nomulumentu mukwawo. Shika iihunalela.

²³Hamulumentu ta lala noshimuna, nenge omukiintu i igandje kusho, opo shi mu hambe. Shika oshipwelela.

²⁴“ ‘Inamu inyatekitha iilonga ya tya ngaaka ngaashi iigwana mbyoka ya kala moshilongo, manga ne inaamu ya mo; oyo tuu mbyoka Omuwa te ke yi tidha mo, opo ne mu ye mo.

²⁵Iilonga yawo oya nyateke oshilongo. Nomolwashoka Omuwa ta geele oshilongo notu umbitha mo aantu mboka ya kala mo.

²⁶Oya longo iitonditha ayihe mbyoka noya nyateke oshilongo, ihe ne inamu ya holela. Ne amuhe, Aaisraeli nenge aakwiilongo ya kala pune, dhiginineni oompango dhOmuwa nomautho ge.

²⁸Nena oshilongo itashi ke mu umba mo, ngaashi shu umbu mo iigwana mbyoka ya kala mo nale.

²⁹Ne omu shi lela kutya kehe ngoka ta longo oshikungitha shontumba shomwaambika, ita ka yalulilwa we maantu yaKalunga.

³⁰“ ‘Vulikeni ano komautho nde ga gandja ne inamu landula iilonga yaantu mboka ye mu tetekelele okukala moshilongo. Inamu inyateka mokulonga iilonga mbyoka. Ongame Omuwa Kalunga keni.’ ”