Read Oshindonga-Ombiimbeli Ondjapuki LEVITIKUS 20 Bible Online

LEVITIKUS 20 - Oshindonga-Ombiimbeli Ondjapuki bible

LEVITIKUS 20

¹Omuwa okwa lombwele Moses e ta ti:

²“Lombwela Aaisraeli to ti: ‘Shaa ngoka gwomAaisraeli nenge gwomaakwiilongo ya kala mokati keni, ta gandja omwana a yambelwe Molek, na dhipagwe. Aantu naye mu dhipage nomamanya.

³Shaa ngoka ta yambele Molek oyana e ta nyatekitha etsalihangano lyandje e ta sitha edhina lyandje eyapuki ohoni, otandi mu geele e ta dhimwa mo maantu yandje.

⁴Aantu ngele otaa thithikile omeho gawo ye mu yaalela noitaye mu dhipaga,

⁵ongame mwene tandi ikwatele ko, ndi geele omuntu ngoka nezimo lye alihe naayehe mboka inaa inekela ndje ya kala miihuna yaMolek. Otandi ke ya komba mo maantu yandje.

⁶“ ‘Ngele oku na omuntu ti igandja kaathithi nokupula aakwampungu, a kwatathane nayo, otandi mu geele notandi mu dhimi mo maantu yandje.

⁷Iyapuleni ne mu kale aayapuki, oshoka ongame Omuwa Kalunga keni.

⁸Vulikeni koompango dhandje, oshoka ongame Omuwa notandi mu yapula.

⁹“ ‘Shaa ngoka ta tuku he nenge yina, na dhipagwe; oshoka oye mwene i iyetele eso.

¹⁰“ ‘Ngele oku na omulumentu ta hondele nomukiintu gwamukwawo, ayehe yaali naa dhipagwe.

¹¹Ngele oku na omulumentu te lala nomukiintu gwahe, ota siikulula epenge lyahe, onkee ayehe yaali naa dhipagwe. Oyo yi ilongele eso.

¹²Ngele oku na omulumentu ta lala nomukiintu oshitenya she, ayehe yaali naa dhipagwe. Oya hunu noyi ilongele eso.

¹³Ngele oku na omulumentu ta lala nomulumentu omukwawo, oya longo iikungitha; ayehe yaali naa dhipagwe.

¹⁴Ngele oku na omulumentu ta hokana omukiintu nomuvongambelela gwe, ayehe yatatu naa fikwe po ya se, oshoka oya longo iihuna; iinima ya tya ngaaka inayi pitikwa mokati keni.

¹⁵Ngele oku na omulumentu ta lala noshinamwenyo, na dhipagwe pamwe noshinamwenyo.

¹⁶Ngele oku na omukiintu ti igandja koshinamwenyo shi mu hambe, na dhipagwe pamwe noshinamwenyo. Oyi ilongele eso.

¹⁷“ ‘Ngele oku na omulumentu ta hokana omumwayina nenge omumwahe e ta tala epenge lye, shika oshiponga. Naa dhimwe mo montaneho yoshigwana. Okwa siikulula epenge lyomumwayina; ota pulwa ondjo ye.

¹⁸Ngele oku na omulumentu a lala nomukiintu e li komwedhi, ayehe yaali naa kondwe mo megongalo, oshoka oya yono omautho gomisindilo dhiidhila.

¹⁹“ ‘Ngele oku na omulumentu ta lala nayinagona omukiintu nenge hegona omukiintu, ayehe yaali naa hepekelwe ondjo yombinzi ndjoka.

²⁰Ngele oku na omulumentu ta lala nomukiintu gwahegona omusamane nenge nomukiintu gwahekulu, ota sitha hegona nenge hekulu ohoni, noye nomukiintu otaa pewa ondjo; otaa si inaa vala.

²¹Ngele oku na omulumentu ta hokana suwala ye, otaa kala inaa vala. Okwa longo iihuna nokwa sitha omumwayina ohoni.

²²“ ‘Dhiginineni oompango dhandje adhihe nomautho gandje, opo mwaa tidhwe mo mevi lyaKaanan, moka tandi ke mu fala.

²³Inamu taamba oohedhi dhaantu mboka ya kala mo; otandi ke ya tidha mo, opo mu ye mo mevi. Oya nyanyalitha ndje niilonga yawo iiwinayi.

²⁴Evi ndika lya tondoka omahini nomagadhi goonyushi, onde li mu uvanekele li ninge eliko lyeni. Otandi li mu pe. Ongame Omuwa Kalunga keni. Onde mu yoolola miigwana yilwe.

²⁵Onkee ano yoololeni iinamwenyo ya yela naambyoka ya nyata, noondhila dha yela naandhoka dha nyata. Inamu lya iinamwenyo nenge oondhila dhoshidhila. Onde yi yoolola ayihe, opo mwaa inyateke.

²⁶“ ‘Kaleni aayapuki yandje awike, oshoka ongame Omuwa, ngame omuyapuki. Ongame nde mu yoolola miigwana yilwe, opo mu ninge yandje ngame awike.

²⁷“ ‘Ngele oku na omulumentu nenge omukiintu ha pula aathithi nenge e na ombepo yuunganga, na dhipagwe nomamanya. Oye okwi ilongele eso.’ ”