Read Oshindonga-Ombiimbeli Ondjapuki LEVITIKUS 24 Bible Online

LEVITIKUS 24 - Oshindonga-Ombiimbeli Ondjapuki bible

LEVITIKUS 24

¹Omuwa okwa lombwele Moses

²a gandje kAaisraeli omautho ngaka. Eteleni oolamba dhoshihukikwanyeka omagadhi omayelele gooholivi, opo omulilo gu kale gwa tema aluhe.

³Ongulohi kehe Aaron ne dhi hwameke metsalihangano, pondje yetopolitho, ndyoka li li komeho goshikethahangano, opo dhi minikile montaneho yOmuwa okuza ongulohi sigo taku shi. Eutho ndika oli na okudhigininwa koluvalo noluvalo aluhe sigo aluhe.

⁴Aaron na sile oolamba dhomoshihukikwanyeka shoshingolilela oshimpwiyu nokutala kutya odha tema aluhe koshipala shOmuwa.

⁵Kutha uusila womunziya e to ningi iikwiila ya mbumbwakana omulongo niiyali. Moshikwiila kehe namu kale uusila womakopi gane.

⁶Iikwiila yi tula moondongelwa mbali, iikwiila ihamano mondongelwa kehe ya tentekwa koshitaafula shoshingoli sho shene, shoka shi li koshipala shOmuwa.

⁷Kombanda yondongelwa kehe tula ko iitsinino, yi ninge ombinga ndjoka tayi yambelwa koshiyambelo peha lyiikwiila.

⁸Esabati kehe aluhe sigo aluhe iikwiila mbika nayi tulwe koshipala shOmuwa. Oyo omagano Aaisraeli taye ga gandja aluhe sigo aluhe.

⁹Iikwiila otayi ningi yaAaron noyana. Oyo naye yi lile mehala eyapuki, oshoka oyo iiyapukilela. Oyo oshipewa shaaluhe tashi zi moondjambo tadhi yambelwa Omuwa.

¹⁰Montanda yAaisraeli omwa li omulumentu a zi maandjawo muEgipiti e te ende pamwe nAaisraeli. Yina, omukulukadhi Omuisraeli, ihe he Omuegipiti. Edhina lyayina oShelomit yaDibri gwomezimo lyaDan. Omulumentu nguka okwa tameke okutamanana nomulumentu Omuisraeli. Okwa sheke edhina lyOmuwa nokwe li tuku. Nena oye mu eta kuMoses.

¹²Oye mu tula moonkandja ya tegelela eutho lyOmuwa.

¹³Omuwa okwa lombwele Moses a ti:

¹⁴“Kutha mo omuntu ngoka montanda. Shaa ngoka e mu uvile ta sheke, na tenteke oshikaha she komutse gwe, shi mu ningile onzapo. Nena egongalo alihe nali mu dhipage nomamanya.

¹⁵Lombwela nduno Aaisraeli kutya shaa ngoka ta sheke Kalunga, ota pewa ondjo

¹⁶nota dhipagwa. Omuisraeli kehe nomukwiilongo kehe a kala muIsrael ta sheke Omuwa, ota dhipagwa nomamanya kegongalo alihe.

¹⁷“Oongoka ta dhipaga omuntu, na dhipagwe,

¹⁸noshaa ngoka ta dhipaga oshimuna shaantu, oku na oku shi futa — omwenyo omomwenyo.

¹⁹“Ngele oku na omuntu ta monitha mukwawo oshiponga, shoka a ningi mukwawo, osho na ningwe wo.

²⁰Ngele okwe mu teya esipa, esipa lye nali teywe; ngele okwe mu tsipula eho, eho lye limwe nali tsipulwe mo; ngele okwe mu kula eyego, eyego lye limwe nali kulwe mo. Ano shoka a ningile mukwawo, osho naanaa na ningilwe.

²¹Shaa ngoka a dhipaga oshimuna, ne shi fute, ihe ngele okwa dhipaga omuntu, na dhipagwe.

²²Ompango oyimwe kune amuhe, Aaisraeli nenge aakwiilongo ya kala mokati keni, oshoka ongame Omuwa Kalunga keni.”

²³Moses sho a lombwele Aaisraeli oohapu ndhika, oya fala omulumentu ngoka kondje yontanda e taye mu dhipaga nomamanya. Aaisraeli oya gwanitha shoka Omuwa a lombwele Moses.