Read Oshindonga-Ombiimbeli Ondjapuki LEVITIKUS 26 Bible Online

LEVITIKUS 26 - Oshindonga-Ombiimbeli Ondjapuki bible

LEVITIKUS 26

¹“Inamu iningila iimenka nenge mu idhikile iiyelekela, oongundhimanya nenge omamanya ga hongwa, mu ga tsile oongolo. Ongame Omuwa Kalunga keni.

²Dhiginineni Esabati lyandje ne mu simaneke ehala mpoka handi simanekelwa. Ongame Omuwa.

³“Ngele otamu ende paipango yandje e tamu vulika komautho gandje,

⁴otandi mu lokithile omvula pethimbo lyo opala, opo evi li menithe iilya nomiti dhi ime iiyimati.

⁵Iilya yeni otayi ka ninga oyindji notamu ka yungula iilya sigo opethimbo lyokulikola omandjembele notamu ka likola omandjembele sigo opethimbo lyokukuna iilya. Otamu ka mona iikulya ya gwana po notamu ka kala mu na ombili moshilongo.

⁶“Otandi mu pe ombili mevi lyeni, notamu ka kotha mwaa na omahalutho gasha. Otandi ke mu mangulula miiponga yiilikama moshilongo, noitaku ka kala we iita.

⁷Otamu ka sinda aatondi yeni;

⁸yatano yomune otaa ka tidha ethele, nethele lyomune otali ka sinda omayuvi omulongo.

⁹Otandi ke mu yambeka noku mu pa oluvalo olwindji; otandi dhiginine ehangano ndyoka nda hangana nane.

¹⁰Eteyo lyeni otali ka kala eloolo tali adha sigo okomumvo omukwawo, nando iigandhi tamu yi opalekele eteyo epe.

¹¹Otandi ka kala mokati keni metsalihangano lyandje, noitandi mu thigi po nando.

¹²Otandi ka kala pamwe nane. Otandi ka ninga Kalunga keni, none aantu yandje.

¹³Ongame, Omuwa Kalunga keni, nde mu tembudha muEgipiti, opo mwaa kale we aapika. Onda sindi oonkondo ndhoka dhe mu thindile pevi nonde mu enditha mwa thikameka omitse.”

¹⁴“Iipango yandje ngele itamu yi dhiginine,

¹⁵ihe otamu tindi okuvulika koompango dhandje nokomautho gandje e tamu yono ehangano lyetu nane,

¹⁶otandi ke mu geela. Otandi mu undulile oshivu — omikithi dha nyengana nomalwiidhi tage mu tsikitha omeho e tage mu uvitha omwenyo omutoye. Otamu ka kuna oombuto dheni, ihe osima yowala, oshoka aatondi yeni otaye ke mu sinda e taa li po shoka mwa kokitha.

¹⁷Otandi mu pilukile e tamu ka sindika, naamboka ye mu tonde, otaye ke mu pangela. Otamu ka haluka tamu pwampwauka, ko kwaa na ngo te mu tidha.

¹⁸“Ngele natango itamu vulika kungame, otandi ka indjipalitha egeelo lyeni luheyali.

¹⁹Otandi ka teyagula po omatha guuntsa weni; itaku ka lokwa we, evi lyeni notali ka sa oluteni e tali kolonda lya fa osheela.

²⁰Oonkondo dheni otadhi ka hepa, oshoka evi lyeni itali ka menitha we iimeno, nomiti itadhi ka ima we iiyimati.

²¹“Ngele otamu tsikile natango okutangalala e tamu tindi okuvulika kungame, egeelo lyeni otandi li indjipalitha ishewe luheyali.

²²Otandi ka tuma iilikama hayi lyana mokati keni, notayi ka lya po aana yeni, tayi thekula po iimuna yeni notayi thigi po aashona yowala, nomapola geni taga mbugala.

²³“Ihe ngele natango konima yegeelo ndika inamu pulakena ndje, ndele otamu tsikile okwiinenepekela ndje,

²⁴nena otandi mu pilukile e tandi mu geele luheyali ndi vulithe ponale.

²⁵Otandi mu undulile iita, opo ndi mu geelele eyono lyehangano lyandje, nongele tamu gongala miilando mu holame, otandi ke mu tumina elega notamu ka gandjwa miikaha yaatondi yeni.

²⁶Otandi ka kutha po ondjundo yoondya dheni, opo aakulukadhi omulongo taa vulu okuninga oshikwiila shimwe ashike. Otaye shi topola, ihe nge mwe shi li, otamu kala mwa nkololoka.

²⁷“Konima yaambika ngele otamu tsikile natango okwiinenepekela ndje nokutinda okuvulika kungame,

²⁸nena mondjahi yandje otandi mu pilukile, negeelo lyandje otandi li ningi edhigu luheyali li vule nale.

²⁹Ondjala yeni otayi ka geya, sigo tamu li po aana yeni nokuli.

³⁰Otandi ka hanagula po omahala geni gomalongelokalunga koondundu, tandi kumuna po iiyambelo yeni yiitsinino, e tandi umbile omidhimba dheni kombanda yiimenka ya hatwa po. Menyanyalo

³¹otandi kumuna po iilando yeni nokuhanagula po omahala geni gelongelokalunga, notandi tindi okutaamba oontselelandjambo dheni.

³²Oshilongo sheni otandi shi hanagula po thiluthilu, naatondi mboka ye shi lala, otaa ka haluka pehanagulo.

³³Otandi ke mu undulila iita noku mu halakanitha nomavi gaakwiilongo. Evi lyeni tali ka mbugala, niilando yeni tayi ningi omakulukuma.

³⁴Nena evi otali ka nyanyukilwa omimvo dhevululuko li ihwa po ndyoka inaamu li gandja; otali ka kala lye ethiwa li vululukwe, manga ne mu li muupongekwa mevi lyaatondi yeni.

³⁶“Mboka ya hupu ko ye li muupongekwa, otandi ke ya kukumitha noshihomo shombepo tayi pepe komafo. Otamu matuka mwa fa tamu tidhwa molugodhi notamu punduka, nando omutondi ina thika pune.

³⁷Otamu ka tantagala tamu londathana, nando kape na ngoka te mu tidha, noitamu vulu okukondjitha aatondi yeni.

³⁸Otamu ka sila muupongekwa mwa ninwa po kevi lyaatondi yeni.

³⁹Aashona yomune mboka taa hupu ko moshilongo shaatondi yeni, otaa ka thithonokela mo omoluulunde weni nomoluulunde woohekulu.

⁴⁰“Ihe oluvalo lweni otalu ka hempulula oondjo dhalwo noondjo dhoohekulu mboka ya tindi ndje noya tsu ondumbo nangame,

⁴¹opo ndi ya pilukile noku ya undulila muupongekwa mevi lyaatondi yawo. Hugunina, oluvalo lweni sho lwi ifupipike nolwa futu eiteko lyalwo,

⁴²nena otandi dhimbulukwa ehangano lyandje nda hangana naJakob, naIsak nonaAbraham, notandi ningi euvaneko lyandje epe ishewe, opo ndi pe aantu yandje oshilongo.

⁴³Ihe tango evi otali mbugala e tali nyanyukilwa evululuko lyi ihwa po, manga aantu kaaye mo. Aantu oye na okufuta eiteko lyawo, sho ye ekelehi oompango dhandje nomautho gandje.

⁴⁴Ihe nando ye li mevi lyaatondi yawo, itandi ya etha thiluthilu nenge ndi ya yone po. Itandi hulitha po ehangano lyandje nayo, oshoka ongame Omuwa Kalunga kawo.

⁴⁵Onda hangana ehangano noohekulu, sho nde ya tembudha muEgipiti montaneho yiigwana, opo ndi kale Kalunga kawo. Ehangano ndika otandi li ningi epe ishewe. Ongame Omuwa.”

⁴⁶Oompango ndhika adhihe nomautho ngaka agehe Omuwa e ga gandja kuMoses kondundu Sinai, opo e ga pe Aaisraeli.