Read Oshindonga-Ombiimbeli Ondjapuki LEVITIKUS 27 Bible Online

LEVITIKUS 27 - Oshindonga-Ombiimbeli Ondjapuki bible

LEVITIKUS 27

¹Omuwa okwa lombwele Moses a ti:

²“Lombwela Aaisraeli to ti: ‘Ngele oku na omuntu tu uvaneke euvaneko ta gandja omuntu kOmuwa, omuntu ngoka a gandjwa ota vulu okumangululwa nokufutilwa ngeyi.

³Ngele omulumentu gwomimvo omilongo mbali sigo omilongo hamano: iimaliwa iisiliveli omilongo ntano pandjele yoshimaliwa oshisiliveli shoka hashi longithwa motempeli,

⁴ihe ngele omukiintu: iimaliwa omilongo ndatu;

⁵omulumentu gwomimvo ntano sigo omilongo mbali: iimaliwa omilongo mbali, ihe ngele omukiintu: iimaliwa omulongo;

⁶okanona okamati kohi yomimvo ntano: iimaliwa itano, ihe ngele okakadhona: iimaliwa itatu;

⁷omusamane e vule omimvo omilongo hamano: iimaliwa omulongo niitano, ihe ngele omukulukadhi: iimaliwa omulongo.

⁸“ ‘Omuntu ngoka tu uvaneke ngele ohepele ta nyengwa okufuta, mu faleni komuyambi, nomuyambi ota fupipike ondando pandjele yomufuti.

⁹“ ‘Ngele oshimuna shaa na oshidhila tashi uvanekwa, nena ayihe mbyoka tayi pewa Omuwa, nayi kale iiyapuki.

¹⁰Omuntu ngoka tu uvaneke ina landakanitha oshimuna shilwe nasho. Nge te shi ningi, iimuna ayihe oyOmuwa.

¹¹Ihe ngele oshimuna oshoshidhila, shoka inaashi opalela okuyambela Omuwa, na fale oshimuna komuyambi.

¹²Omuyambi ote shi uthile ondando pandjele yasho yuuwanawa noyondjundo, nondando otayi mana po oohapu.

¹³Omuntu ngele okwa hala e shi kulile ko, na fute ondando a gwedha ko oshititano.

¹⁴“ ‘Ngele oku na omuntu ta yoololele Omuwa egumbo lye, omuyambi na uthe ondando pandjele yuuwanawa nondjundo yalyo, ondando notayi mana po oohapu.

¹⁵Omugandji gwalyo ngele okwa hala e li kulile ko, na fute ondando a gwedha ko oshititano.

¹⁶“ ‘Omuntu ngele ota yapulile Omuwa oshipambu shepya lye, ondando otayi yelekwa nombuto tayi kunwa mo. Oolata omulongo nambali dhombuto yiilya otadhi gu iimaliwa iisiliveli omilongo ntano.

¹⁷Ngele ote li gandja mbala okuza komumvo gweligolo, nena ondando ayihe otayi pulwa.

¹⁸Ngele ote li gandja komeho, omuyambi na tale ondjundo pamwaalu gwomimvo dha hupu ko sigo okomumvo gweligolo, e tu utha ondando ya kuthilwe ko.

¹⁹Omuntu ngoka ta gandja epya ngele okwa hala oku li kulila ko, na fute ondando mwa gwedhwa oshititano.

²⁰Ngele ota landitha po epya komuntu gulwe, manga inee li kulila ko kOmuwa, nena ota kanitha uuthemba woku ke li kulila ko ishewe.

²¹Komumvo gweligolo epya otali ningilile lyOmuwa; otali ningi eliko lyaayambi.

²²“ ‘Omuntu ngele ota yapulile Omuwa epya e li landa,

²³omuyambi na tale ondando pamwaalu gwomimvo sigo okomumvo gweligolo, nomuntu na fute ondando esiku tuu ndyoka; iimaliwa mbika oyOmuwa.

²⁴Momumvo gweligolo epya nali shune kumwene gwalyo nenge koluvalo lwe.

²⁵“ ‘Oondando adhihe nadhi yelekwe pandjele yoshimaliwa oshisiliveli hashi longithwa motempeli.

²⁶“ ‘Osheeli shoshimuna oshOmuwa, onkee kaku na ngoka te shi mu yoololele we. Okatana, okanzigona nenge okakombwena kosheeli okOmuwa,

²⁷ihe osheeli shoshimuna shi na oshidhila, otashi kulilwa pandando ya yeleka ya gwedhwa oshititano shimwe. Ngele itashi kulilwa, nashi landithwe kushaa ngoka pandando ya yeleka.

²⁸“ ‘Kaku na omuntu ta landa nenge ta kulile shoka a yapulila Omuwa nokugana, nashi kale omuntu nenge oshimuna nenge epya. Otashi ningilile shOmuwa.

²⁹Nokuli omuntu ngoka a yapulilwa okuhanagulwa po, ina kulilwa; na dhipagwe.

³⁰“ ‘Iitimulongo ayihe yomiilikolwa yomomapya, iilya nenge iiyimati, oyOmuwa.

³¹Ngele oku na omuntu e yi kulile, na fute pandando ya yeleka mwa gwedhwa oshititano shimwe.

³²Shimwe shomiimuna omulongo kehe oshOmuwa. Uuna iimuna tayi yalulwa, oshimuna oshitimulongo oshOmuwa.

³³Mwene ina simonona iimuna, a mone kutya shika oshiwanawa nenge oshiwinayi, noine shi landakanitha, ihe ngele ote shi landakanitha, ayihe iyali oyOmuwa, itayi kulilwa.’ ”

³⁴Iipango mbika oyo mbyoka Omuwa e yi pe Moses kondundu Sinai yokulombwela Aaisraeli.