Read Oshindonga-Ombiimbeli Ondjapuki LEVITIKUS 3 Bible Online

LEVITIKUS 3 - Oshindonga-Ombiimbeli Ondjapuki bible

LEVITIKUS 3

¹Uuna omuntu ta yamba ekwatathanondjambo te li kutha miimuna ye, na ete ongombe ondumentu nenge ondema yaa na oshipo.

²Omuntu na tenteke oshikaha she komutse gwongombe e te yi tselele posheelo shetsalihangano. Aana yaAaron aayambi naa shashamine ombinzi koombinga adhihe dhoshiyambelo.

³Mekwatathanondjambo naa kuthe mo omakagadhi gokiikwamela noofu e te yi yambele Omuwa,

⁴osho wo iitiyanathigo niinkene yayo nekalokwa lyokehuli.

⁵Ayihe mbika aayambi naa yi lungunithile koshiyambelo kombanda yefikilondjambo tali gandja ezimba lya nika nawa lyo opalela Omuwa.

⁶Uuna omuntu ta yamba ekwatathanondjambo te li kutha moonzi nenge miikombo ye, na ete oshimuna oshilumentu nenge oshikiintu shaa na oshipo.

⁷Omuntu ngele ota yamba onzi, ne yi ete koshipala shOmuwa,

⁸na tenteke oshikaha she komutse gwayo e te yi dhipagele posheelo shetsalihangano. Aayambi naa shashamine ombinzi yayo koombinga adhihe dhoshiyambelo

⁹nokuyambela Omuwa iitopolwa mbika yekwatathanondjambo: oofu, omushila gwa tetwa metindi, omakagadhi agehe gokiikwamela,

¹⁰iitiyanathigo niinkene yayo nekalokwa lyokehuli.

¹¹Ayihe mbika omuyambi ne yi lungunithile poshiyambelo, yi ninge ondjambo yiikulya ya yambelwa Omuwa.

¹²Ngele oku na omuntu ta yamba oshikombo, ne shi ete koshipala shOmuwa.

¹³Na tenteke oshikaha she komutse gwasho e te shi dhipagele posheelo shetsalihangano. Aayambi naa shashamine ombinzi yasho koombinga adhihe dhoshiyambelo

¹⁴nokuyambela Omuwa iitopolwa mbika: omakagadhi agehe gokiikwamela,

¹⁵iitiyanathigo niinkene yayo nekalokwa lyokehuli.

¹⁶Omuyambi ne yi lungunithile poshiyambelo, yi ninge ondjambo yiikulya yi na ezimba lya nika nawa. Omakagadhi agehe ogOmuwa.

¹⁷Kape na Omuisraeli ta li omakagadhi nenge ombinzi; eutho ndika nali dhigininwe kAaisraeli sigo aluhe shaa mpoka ye li.