Read Oshindonga-Ombiimbeli Ondjapuki LEVITIKUS 4 Bible Online

LEVITIKUS 4 - Oshindonga-Ombiimbeli Ondjapuki bible

LEVITIKUS 4

¹Omuwa okwa lombwele Moses,

²a lombwele Aaisraeli kutya ngele oku na omuntu a yono nokwa pogola kiipango yOmuwa mokwaashiwo, na gwanithe omautho ngaka.

³Ngele omuyambimukuluntu ta yono e te etele aantu ondjo, na gandje ongombe ondumentu yomutanda yaa na oshipo, e yi yambele Omuwa eyonondjambo.

⁴Na ete ongombe ondumentu kosheelo shetsalihangano, na tenteke oshikaha she komutse gwayo e te yi tselele koshipala shOmuwa.

⁵Nena omuyambimukuluntu na kuthe ombinzi yongombe e te yi fala metsalihangano.

⁶Na yaye omunwe gwe mombinzi e te yi shashamine komeho getopolitho lyetsalihangano, te shi ningi luheyali.

⁷Nena ombinzi yimwe ote yi gogo kooniga dhoshiyambelo shiitsinino metsalihangano. Ombinzi onkwawo ote yi tile pekota lyoshiyambelo shomafikilondjambo shi li posheelo shetsalihangano.

⁸Mongombe na kuthe mo oofu adhihe nomakagadhi gokiikwamela,

⁹iitiyanathigo niinkene yayo nekalokwa lyokehuli,

¹⁰ngaashi tashi ningwa nongombe yekwatathanondjambo. Iinima mbika omuyambi ne yi lungunithile koshiyambelo shomafikilondjambo.

¹¹Ihe ekunka, onyama ayihe, omutse, omagulu, iikwamela yayo nehoho

¹²ne yi fale pondje yontanda pehala lya yogoka mpoka hapu tulwa omutoko, naampoka tayi lungunithilwa momulilo gwiikuni.

¹³Ngele egongalo alihe lyaIsrael tali yono e tali itsike ondjo yokuyona kiipango yOmuwa mokwaashiwo,

¹⁴nena shampa tuu ondjo ya tseyika, egongalo nali ete ongombe ondumentu yomutanda, yi ninge eyonondjambo. Na yi etwe ketsalihangano.

¹⁵Aawiliki yegongalo naa tenteke iikaha yawo komutse gwayo e taye yi tselele koshipala shOmuwa.

¹⁶Omuyambimukuluntu na kuthe mo mombinzi yongombe, e yi fale metsalihangano.

¹⁷Na yaye omunwe gwe mombinzi e te yi shashamine komeho getopolitho luheyali.

¹⁸Na goge ombinzi yimwe kooniga dhoshiyambelo shiitsinino, shoka shi li komeho gOmuwa metsalihangano. Oshihupe shombinzi ne shi tile pekota lyoshiyambelo shomafikilondjambo, shoka shi li posheelo shetsalihangano.

¹⁹Nena na kuthe oofu dhayo adhihe e te dhi lungunithile koshiyambelo.

²⁰Ongombe ndjika ne yi ninge, ngaashi a ningile nongombe yeyonondjambo. Pahedhi ndjika omuyambi ota yamba omolweyono lyaantu, oyo notaa kala ya dhiminwa po.

²¹Ongombe ne yi fale pondje yontanda e te yi lungunitha po, ngaashi naanaa a lungunithile po ongombe ya yambelwa ondjo ye mwene. Ondjambo ndjika oyo tayi kutha po ondjo yegongalo.

²²Ngele omuwiliki ta yono e ta ningi omupogoli gwiipango yOmuwa mokwaashiwo,

²³nena shampa a dhimbulula a yona, na ete ondjambo ye yoshikombo oshilumentu shaa na oshipo.

²⁴Na tenteke oshikaha she komutse gwasho e te shi dhipagele kuumbangalantu woshiyambelo, hoka haku dhipagelwa iimuna yomafikilondjambo. Osho eyonondjambo.

²⁵Omuyambi na yaye omunwe gwe mombinzi yoshikombo, te yi gogo kooniga dhoshiyambelo, nombinzi onkwawo ote yi tile pekota lyoshiyambelo.

²⁶Oofu dhasho adhihe ne dhi lungunithile koshiyambelo, ngaashi naanaa ha lungunitha oofu dhiimuna ya dhipagelwa omakwatathanondjambo. Pahedhi ndjika omuyambi ota yamba omolweyono lyomuwiliki nota kala a dhiminwa po.

²⁷Ngele nani gumwe gwomaantu yowala ta yono e ta pogola kiipango yOmuwa mokwaashiwo,

²⁸nena shampa tuu a dhimbulula eyono lye, na ete ondjambo ye yoshikombo oshikiintu shaa na oshipo.

²⁹Na tenteke oshikaha she komutse gwasho e te shi dhipagele kuumbangalantu woshiyambelo, hoka haku dhipagelwa iimuna yomafikilondjambo.

³⁰Omuyambi na yaye omune gwe mombinzi yoshikombo e te yi gogo kooniga dhoshiyambelo e ta tile ombinzi onkwawo pekota lyoshiyambelo.

³¹Nena na kuthe oofu adhihe, ngaashi oofu hadhi kuthwa koshimuna sha dhipagelwa ekwatathanondjambo, e te dhi lungunithile koshiyambelo, opo dhi gandje ezimba lya nika nawa tali opalele Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po.

³²Omuntu ngele ote eta onzi yeyonondjambo, nayi kale onkiintu yaa na oshipo.

³³Ota tenteke oshikaha she komutse gwayo e te yi dhipagele kuumbangalantu woshiyambelo, hoka iimuna yomafikilondjambo hayi dhipagelwa.

³⁴Omuyambi na yaye omunwe gwe mombinzi yonzi e te yi gogo kooniga dhoshiyambelo; ombinzi onkwawo te yi tile pekota lyoshiyambelo.

³⁵Nena na kuthe oofu adhihe, naanaa ngaashi oofu hadhi kuthwa konzi ya dhipagelwa ekwatathanondjambo, e te dhi lungunithile koshiyambelo kombanda yomafikilondjambo ga yambelwa Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po.