Read Oshindonga-Ombiimbeli Ondjapuki LEVITIKUS 5 Bible Online

LEVITIKUS 5 - Oshindonga-Ombiimbeli Ondjapuki bible

LEVITIKUS 5

¹Ngele oku na omuntu ti ithanwa kombala, a gandje uumbangi mompangu, ihe ita gandja uumbangi waashoka a uva nenge a mona, oye ta humbata iilanduliko.

²Ngele oku na ngoka ta gumu sha sha nyata mokwaashiwo, ngaashi oshimuna shi isila, ota kala a nyata nomunandjo, sigo a dhimbulula shoka a ningi.

³Ngele oku na ngoka ta gumathana nomuntu a nyata ye ke shi shi, ota ka kala e na ondjo, sigo a dhimbulula shoka a ningi.

⁴Ngele oku na omuntu ta gana muuhasha, kashi na mbudhi kutya egano olyashike, ota kala e na ondjo, sigo a dhimbulula shoka a ningi.

⁵Uuna omuntu e na ondjo, ne yi hempulule

⁶nokweetela Omuwa onzi onkiintu nenge oshikombo oshikiintu, shi ninge eyonondjambo lyokufuta ondjo ye. Omuyambi na yambele ondjo yomuntu nguka.

⁷Omuntu ngele ita vulu okumona onzi nenge oshikombo, na etele Omuwa ofuto yondjo ye oonguti mbali, nenge uungutyona uyali, yimwe omolweyonondjambo nonkwawo omolwefikilondjambo.

⁸Ne dhi ete komuyambi, ngoka ta yamba tango ondhila yeyonondjambo. Ote yi thingonona othingo, ihe ina tokola ko omutse gwayo.

⁹Na shashamine ombinzi yimwe molumbumbu lwoshiyambelo. Ombinzi onkwawo ne yi kamene pekota lyoshiyambelo. Ondjambo ndjika otayi kutha po ondjo.

¹⁰Nena na yambe ondhila ontiyali efikilondjambo pamautho. Pahedhi ndjika omuyambi ota yamba omolweyono lyomuntu ngoka, oye nota dhiminwa po.

¹¹Ngele omuntu ita vulu okumona oonguti mbali, nenge uungutyona uyali, na ete omakopi gaali guusila womunziya, u ninge eyonondjambo. Ina tula mo tuu nando omagadhi gooholivi nenge iitsinino, molwashoka eyonondjambo.

¹²Ne u ete komuyambi, ngoka ta kutha mo eke limwe, ombinga yokuyambelwa koshiyambelo, note u lungunithile koshiyambelo kombanda yefikilondjambo. Owo eyonondjambo.

¹³Pahedhi ndjika omuyambi ota yamba omolweyono lyomuntu ngoka, oye nota dhiminwa po. Uusila mboka tau hupu ko, owomuyambi pahedhi yoondjambo dhiikulya.

¹⁴Omuwa okwa pe Moses omautho ngaka.

¹⁵Ngele oku na ngoka ta yono mokwaashiwo inaa gandja iigandjwa ya yapulilwa Omuwa, na ete ondjondjambo kOmuwa, onzi ondumentu yaa na oshipo nenge oshikombo oshilumentu shaa na oshipo. Ondjundo yoshimuna nayi uthwe pandjele yiimaliwa hayi longithwa motempeli.

¹⁶Omuntu ota futu shoka a li e na okufuta e ta gwedha po oshititano. Ne yi pe omuyambi, nomuyambi ota yamba oshimuna omolweyono lyomuntu ngoka, oye nota dhiminwa po.

¹⁷Ngele oku na omuntu ta pogola kiipango yOmuwa mokwaashiwo, ota kala e na ongunga noku na oku yi futa.

¹⁸Oku na okweeta komuyambi ondjondjambo, onzi ondumentu yaa na oshipo nenge oshikombo oshilumentu shaa na oshipo. Ondjundo yasho nayi uthwe pandjele yiimaliwa hayi longithwa motempeli. Omuyambi ota yamba omolweyono lyomuntu ngoka, oye nota dhiminwa po.

¹⁹Ndhika oondjambo dhoondjo ndhoka a yono kOmuwa.