Read Oshindonga-Ombiimbeli Ondjapuki LEVITIKUS 6 Bible Online

LEVITIKUS 6 - Oshindonga-Ombiimbeli Ondjapuki bible

LEVITIKUS 6

¹Omuwa okwa pe Moses omautho ngaka.

²Ondjambo nayi yambwe, shampa gumwe a yono kOmuwa, ongele mokutinda okushunitha shoka Omuisraeli a thigile po sha fa ombambyona nenge sha yakelwe nenge moku mu kotokela

³nenge a fundju molwoshinima sha kana ye ta gana ta ti, ine shi mona.

⁴Uuna omuntu ta yono pamukalo nguka, na fute shoka e na, molwashoka ke li moshili. Esiku ndyoka ta monika ondjo, oku na okufuta mwene gwiinima ofuto yu udha mwa gwedhwa oshititano.

⁶Ne ete komuyambi ondjondjambo ye, yi yambelwe Omuwa: onzi ondumentu yaa na oshipo nenge oshikombo oshilumentu shaa na oshipo, pamuthika gwondjele.

⁷Omuyambi ota yamba omolweyono lyomuntu ngoka, oye nota dhiminwa po.

⁸Omuwa okwa lombwele Moses

⁹a gandje kuAaron noyana omautho gomidhidhindjambo taga landula. Efikilondjambo nali kale koshiyambelo momulilo tali pi uusiku auhe, sigo otaku shi.

¹⁰Nena omuyambi na zale eguyo lye lyoliina nombulukweya yoliina e ta yuku po omutoko gwa li koshiyambelo e te gu tula pooha dhoshiyambelo.

¹¹Nena ota lundulula omizalo dhe e ta fala omutoko pondje yontanda pehala lya yogoka.

¹²Omulilo nagu kale gwa tema koshiyambelo, inagu pitikwa gu dhime. Ongula kehe omuyambi na hohe iikuni mugwo e ta longekidha efikilondjambo nokulungunitha oofu dhekwatathanondjambo kombanda yalyo.

¹³Omulilo nagu kale aluhe gwa tema koshiyambelo, inagu dhima!

¹⁴Omautho gondjambo yiikulya ogo ngaka. Aana yaAaron naa ete ondjambo yiikulya kOmuwa komeho goshiyambelo.

¹⁵Omuyambi na kuthe mo ombinga yokuyambelwa koshiyambelo, oyo eke lyu udha lyuusila womunziya u na omagadhi gooholivi niitsinino ayihe yi li mo, e te yi lungunithile koshiyambelo, li ninge ezimba lya nika nawa tali opalele Omuwa.

¹⁶Oshihupe otashi liwa po kaayambi. Otashi ningwa moshikwiila inaashi tulwa efulika e tashi lilwa pehala eyapuki, omehale lyetsalihangano. Omuwa okwe shi pa aayambi, shi ninge oshitopolwa shoondjambo dhiikulya. Osho oshiyapukilela sha faathana nomayonondjambo noondjondjambo.

¹⁸Aana yaAaron ayehe aalumentu oye na oku shi lya. Osho oshipewa shawo shaaluhe shoondjambo dhiikulya ya yapulilwa Omuwa. Kehe ngoka te shi gumu, ota kala omuyapuki.

¹⁹Omuwa okwa pe Moses eutho ndika lyondjambo yaAaron noyana taa yamba esiku ndyoka taa yapulwa. Naa ete kOmuwa omakopi gaali guusila womunziya, u ninge ondjambo yiikulya, etata limwe ongula nekwawo ongulohi.

²¹Namu tulwe omagadhi noku u kangela moshikangwa noku u nyangushula uupambu, opo u ninge ondjambo yiikulya yezimba lya nika nawa tali opalele Omuwa.

²²Ondjambo ndjoka oyi na okuyambwa aluhe koluvalo lwaAaron kungoka ta kala omuyambimukuluntu. Nayi lungunithwe po thiluthilu; oyo oshipewa shOmuwa shaaluhe.

²³Ondjambo kehe yiikulya tayi zi komuyambi, nayi lungunithwe po ayihe, ihayi liwa.

²⁴Omuwa okwa lombwele Moses,

²⁵a pe Aaron noyana omautho geyonondjambo. Oshimuna sheyonondjambo otashi dhipagelwa kuumbangalantu woshiyambelo, hoka haku dhipagelwa iimuna yomafikilondjambo. Shika osho ondjambo ondjapukilela.

²⁶Omuyambi ngoka ta yamba eyonondjambo lyoshimuna, ne li lile mehala eyapuki, omehale lyetsalihangano.

²⁷Kehe ngoka nenge shaa shoka tashi gumu onyama ndjoka, otashi kala oshiyapuki. Ngele onguwo ya nothelwa kombinzi yoshimuna, nayi yogelwe mehala eyapuki.

²⁸Ombiga yoshikangwa kehe ya pila onyama, nayi tatulwe; ngele oyosheela, nayi kwehulwe nokuyagwa e tayi simpulwa nawa nomeya.

²⁹Aalumentu ayehe yomezimo lyaayambi otaa li ondjambo ndjika; oyo ondjapukilela.

³⁰Ihe eyonondjambo ngele oshitopolwa shimwe shombinzi sha falwa metsalihangano oku ka dhima po oondjo, oshimuna shoka inashi liwa; oshi na okulungunithwa po.