Read Oshindonga-Ombiimbeli Ondjapuki LEVITIKUS 7 Bible Online

LEVITIKUS 7 - Oshindonga-Ombiimbeli Ondjapuki bible

LEVITIKUS 7

¹Otapa landula omautho gondjondjambo. Oyo ondjapukilela.

²Oshimuna shondjondjambo nashi dhipagelwe kuumbangalantu woshiyambelo, hoka haku dhipagelwa iimuna yomafikilondjambo, ombinzi yasho nayi shashaminwe koombinga adhihe dhoshiyambelo.

³Oofu dhasho adhihe nadhi kugunyunwe ko e tadhi yambelwa koshiyambelo, omushila gwonzi, omakagadhi gokiikwamela,

⁴iitiyanathigo niinkene yayo, nekalokwa lyokehuli.

⁵Omuyambi na lungunithile koshiyambelo oofu adhihe dhi ninge ondjambo ya yambelwa Omuwa. Oyo ondjondjambo.

⁶Omulumentu kehe mezimo lyaayambi ota vulu oku yi lya, ihe nayi lilwe mehala eyapuki, oshoka oyo ondjapukilela.

⁷Eutho olimwe omolweyonondjambo nomolwondjondjambo; onyama oyomuyambi ngoka ta yamba.

⁸Omuyambi ngoka ta yambele omuntu efikilondjambo, na pewe ekunka lyoshimuna sha yambwa.

⁹Ondjambo yiikulya kehe ya pya peziko nenge poshikangwa nenge mombiga, oyomuyambi ngoka te yi yambele Omuwa.

¹⁰Ihe oondjambo dhiikulya adhihe inaadhi pya, ongele ndhoka dha tulwa omagadhi nenge oonkunkutu, otadhi ningi dhaayambi aana yaAaron nodhi na okutopolwa dhi thike pamwe.

¹¹Omautho taga landula ogekwatathanondjambo tali yambelwa Omuwa.

¹²Ngele omuntu te li etele Kalunga omolwepandulo, na yambe pamwe noshimuna shepandulo ondjambo yiikwiila inaayi tulwa efulika yomaludhi ngaka: iikwiila ya mbumbwakana ya ningwa nuusila womunziya wa lungilwa momagadhi gooholivi, uukwiila wa pepuka wa gwayekwa omagadhi gooholivi, nuukuki wa ningwa nuusila womunziya wa lungilwa momagadhi gooholivi.

¹³Na yambe ano iikwiila inaayi tulwa efulika pamwe noshimuna she shepandulo.

¹⁴Na ete oshikwiila shimwe sholudhi kehe kOmuwa; otashi ningi shomuyambi ngoka ta shashamine ombinzi yoshimuna shekwatathanondjambo koshiyambelo.

¹⁵Onyama yoshimuna nayi liwe esiku ndyoka ya yambwa; inapu hupithilwa yangula.

¹⁶Ngele oku na omuntu ta yamba ekwatathanondjambo omolweuvaneko nenge ta yamba pahalo lye mwene, ondjambo nayi liwe mesiku lyeyambo, ihe ngele otaku hupu sha, nashi liwe esiku lyanofu.

¹⁷Onyama kehe tayi hupile esiku etitatu, nayi lungunithwe po.

¹⁸Ngele ope na onyama yomundjoka tayi liwa esiku etitatu, Kalunga ita ka taamba ondjambo yomuntu ngoka. Itayi mu yalulilwa we, otayi talwa ya nyata, naangoka te yi li, ota pewa ondjo.

¹⁹Onyama ngele oya gumathana naashoka sha nyata, inayi liwa, ndele oyi na okulungunithwa po. Omuntu kehe a yogoka ota vulu okulya onyama yekwatathanondjambo,

²⁰ihe shaa ngoka te yi li a nyata, na dhimwe mo maantu yaKalunga.

²¹Nongele oku na ngoka a gumu shoka sha nyata, nashi kale shoka shomuntu nenge shoshimuna, na dhimwe mo maantu yaKalunga.

²²Omuwa okwa lombwele Moses

²³a gandje kAaisraeli omautho ngaka. Inamu lya omakagadhi goongombe, goonzi nenge giikombo.

²⁴Omakagadhi goshimuna shi isila nenge sha lika kiilikama, inamu ga lya, ihe otamu vulu oku ga longitha miilonga yilwe yi ili.

²⁵Shaa ngoka ta li omakagadhi goshimuna shoka tashi yambelwa Omuwa, na dhimwe mo maantu yaKalunga.

²⁶Shaa mpoka tamu kala, inamu lya ombinzi yoondhila nenge yiimuna.

²⁷Shaa ngoka ta li ombinzi, na dhimwe mo maantu yaKalunga.

²⁸Omuwa okwa lombwele Moses

²⁹a gandje kAaisraeli omautho ngaka. Shaa ngoka ta yambele Omuwa ekwatathanondjambo, na gandje oshitopolwa shalyo, shi ninge ondjambo yedhugadhugo,

³⁰te yi eta niikaha ye mwene. Na ete omakagadhi goshimuna nondete yasho te yi yambele Omuwa ondjambo yedhugadhugo.

³¹Omuyambi na lungunithile omakagadhi koshiyambelo, ihe ondete otayi ningi yaayambi.

³²Oshilama shokolulyo shoshimuna shekwatathanondjambo lyeni nashi pewe omuyambi, opo shi ninge ekwathelo lye.

³³Otashi ningi shomuyambi ngoka ta yamba ombinzi nomakagadhi gekwatathanondjambo.

³⁴Ondete yoshimuna oyo ondjambo yedhugadhugo, noshilama shokolulyo osho ekwathelo ndyoka Omuwa e li kutha kAaisraeli e te li pe aayambi. Aaisraeli oye na oku shi gandja kaayambi aluhe sigo aluhe.

³⁵Shika osho oshitopolwa shoka tashi zile Aaron noyana moondjambo tadhi yambelwa Omuwa. Oshe ya uthilwa esiku ndyoka ya yapulilwa oshilonga shuuyambi.

³⁶Esiku ndyoka Omuwa okwa lombwele Aaisraeli, ye ya pe oshitopolwa shika shoondjambo aluhe sigo aluhe.

³⁷Ngaka ogo omautho gomafikilondjambo, goondjambo dhiikulya, gomayonondjambo, goondjondjambo, goondjambo dheyapulo nogomakwatathanondjambo.

³⁸Omuwa okwa pe Moses iipango mbika kondundu Sinai esiku ndyoka a lombwele Aaisraeli ya yambele Omuwa oondjambo mombuga yaSinai.