Read Oshindonga-Ombiimbeli Ondjapuki OONTAKUMANDJIMBO 2 Bible Online

OONTAKUMANDJIMBO 2 - Oshindonga-Ombiimbeli Ondjapuki bible

OONTAKUMANDJIMBO 2

¹Akwetse! Omuwa mondjahi ye okwa tula omukadhona Sion momilema. Okwe ekelehi esimano lyaIsrael lyomegulu, e li umbile pevi. Ina dhimbulukwa we oshilyatelelo shokoompadhi dhe mesiku lyondjahi ye.

²Omuwa okwa hanagula po omagumbo gaJakob pwaa na ohenda. Mondjahi ye okwa nyanyagula omapopilongulu gaJuda, okwe ga kumunine pevi. Okwa sitha oshilongo naawiliki yasho ohoni.

³Omuupyundjahi we, a teyagula oonkondo dhaIsrael. Okwa tindi okukwatha pokuhomona kwomutondi nokwa hwameke muJakob omulilo tagu lungunike ayihe yopopepi.

⁴Okwa lukile uutati we ongomutondi, a yelutha olulyo lwe i ilongekidha. Ngaashi omutondi, okwa hanagula po ashihe sho opala momeho; momatsali gomukadhona Sion, a poolele mo ondjahi ye ya fa omulilo.

⁵Omuwa okwa fa omutondi; okwa hanagula po Israel. Okwa kombo po oombala dhe adhihe; a silukitha omapopilongulu ge. Okwi indjipalitha oluhodhi nelilagano lyomukadhona

⁶Okwa hwagununa po enkolo lye a fa ta yonagula po oshikunino; a halakanitha po ehala lye lyoshigongi. Omuwa okwe ekelehi edhimbulukwo lyiituthi nOmasabati muSion. Muupyundjahi we okwi inaga omukwaniilwa nomuyambi.

⁷Omuwa okwe ekelehi oshiyambelo she e ta thigi po otempeli ye. Omakuma guuwa we e ga gandja kaatondi. Oya kugu onkugo motempeli yOmuwa ya fa yomesiku lyoshituthi.

⁸Omuwa okwa li a tokola a kumune po omadhingililokuma gaSion; okwa tama oshiyelekithongodhi ye ina yelutha we oshikaha she, sigo a hanagula po ayihe thilu. Omapopilongulu nomadhingililokuma ogo ongotele pevi nokuyemata.

⁹Iiyelo yaJerusalem oya ningine mevi, okwa teyagula po iiyedhilitho yayo. Omukwaniilwa naanamadhina yasho oye li muupongekwa. Ompango ihayi longwa we, naahunganeki ihaa mono we omamoniko taga zi kOmuwa.

¹⁰Aawiliki yomukadhona Sion, oya mbwata mevi ya tya thilu. Oyi igunda ontsi momitse dhawo yo ya zala omahahi. Aafuko Aajerusalem, omitse dhawo odha nyongama.

¹¹Omeho gandje oga dhimeya kokulila, omandjandja gandje otaga nyulukuta, ehuli lyandje olya hililwa pevi, oshoka oshigwana shandje osha gonwa, aanona nuuhanona otau gundile momapandaanda goshilando.

¹²Otaa pula ooyina taa ti: “Oshithima oshi li peni?” Otaa galangata ya fa oomwahe momapandaanda goshilando e taa fudha mo oomwenyo dhawo ye li komagundji gooyina.

¹³Omukadhona Jerusalem, nandi ku hokololele shike, nandi ku yeleke nashike? Olye ngoka ndi mu tule pungoye, e ku hekeleke, omukadhona Sion? Omupya gwoye omunene ngefuta, olye ta vulu oku ku aludha?

¹⁴Omamoniko gaahunganeki yoye oga li giilombo gaa na omwago; inaa yanuna nando uulunde woye, oga ningi ondjambi yokupongekwa kwoye. Oye ku lombwele omahunganeko giifundja nogomapukitho.

¹⁵Aapitipo ayehe otaye ku hakelele omake. Otaa hiki omwiilwa taa pukapukile omukadhona Jerusalem komitse e taa ti: “Oshilando osho tuu shoka kwa tiwa osheopalo lyo lyene nenyanyu lyuuyuni auhe?”

¹⁶Aatondi yoye ayehe otaye ku nyonkele. Otaa hiki omwiilwa yo tayi ikokota komayego. Otaa ti: “Twe mu dhilagula po. Ndika olyo esiku twa kala twa tegelela. Ngashingeyi otwa thiki mulyo, twe li mono.”

¹⁷Omuwa a tsakanitha shoka a popile, okwa gwanitha oohapu dhe dha popilwe momasiku gonale. Okwa hanagula pwaa na ohenda, a pe omutondi gwoye ompito yoku ku nyonkela nokuholola oonkondo dhe.

¹⁸Omukadhona Sion, kuga muule, kugila Omuwa. Omahodhi goye naga pononoke omutenya nuusiku ga fa efundja. Ino ipa nando evululuko, ino thithikila omeho goye.

¹⁹Yambuka po, lilagana uusiku auhe nokomutakushi. Omwenyo gwoye gu tilahi ongomeya koshipala shOmuwa. Yeluthila omaako goye kuye omolwoomwenyo dhaamwoye, mboka taa sile pookolonela dhomapandaanda kondjala.

²⁰Omuwa, tala u shi dhiladhile: Olye we mu ningile ngeyi? Omolwashike aakiintu taa li po uuhanona wawo, oomputu ye dhi yamutha, ye dhi ukata? Omolwashike omuyambi nomuhunganeki taa dhipagelwa motempeli yOmuwa?

²¹Aanona naakuluntu, oya kangawala pevi momapandaanda. Aafuko yandje naamati, oya gwila po ya sa kegongamwele. Owe ya dhipaga mesiku lyondjahi yoye, owe ya tsele waa na ohenda.

²²Owa hiya aahaluthi yandje koombinga adhihe, ye ye koshituthi shomatilitho. Mesiku lyondjahi yoye kakwa li ngoka a fadhuka po. Ayehe mboka nda tekula nonde ya palutha, omutondi a tula kothingo.