Read Oshindonga-Ombiimbeli Ondjapuki JOEL 2 Bible Online

JOEL 2 - Oshindonga-Ombiimbeli Ondjapuki bible

JOEL 2

¹Hikeni ombenda; hikeni enkuma muSion, kondundu yaKalunga ondjapuki. Kakameni, ne aantu yomuJuda!

²Otali ka kala esiku eluudhe noli na oonzigi, esiku ethokothoko nolyiikogo iiluudhe. Oshipupu oshinene shoombahu otashi taandele, ngaashi omilema tadhi siikile oondundu. Inaku kala nale oshinima sha fa shika, noitashi ka kala ko we.

³Oombahu otadhi li po iimeno dha fa epeya. Komeho gadho oshilongo osha fa oshikunino shaEden, ihe konima yadho osho ombuga ya hekuka. Kape na shoka tashi hunuka kudho.

⁴Odha fa uukambe; otadhi matuka dha fa oonkawilwankambe.

⁵Nge tadhi nyantuka koondundu, otadhi kolokota dha fa omatembakwiita; otadhi tyotyoma dha fa omwiidhi omukukutu mepeya. Odha fa etangakwiita tali ilongekidhile olugodhi.

⁶Ngele tadhi hedha ko, shaa ngoka ota haluka; oshipala kehe otashi pembe.

⁷Otadhi pononoka ko dha fa aakwiita; otadhi londo omakuma ngaakwiita. Adhihe otadhi katuka dhu ukilila komeho noitadhi penge nando, dhi ye mooha

⁸nenge dhi pumathane. Otadhi pandakana mokati komagonga, nokaku na sha shoka tashi dhi keelele.

⁹Otadhi matukile oshilando; otadhi kondo omakuma; otadhi londo omagumbo notadhi yi mo tadhi pitile momakende ngaafuthi.

¹⁰Evi otali kakama, nge tadhi humu ko; ewangandjo otali tengauka. Etango nomwedhi otayi luudha, noonyothi itadhi minikile we.

¹¹Omuwa ota kaluluka, sho ta lombwele etangakwiita lye. Oongundu ndhoka hadhi vulika kuye odhindji noonankondo. Esiku lyOmuwa etilithi ngiini! Olye ta ka hupithwa kulyo?

¹²Omuwa ota ti: “Itedhululeni shili ngashingeyi, mu galukile kungame nokwiidhilika iikulya, nokulila nonokunika uuthigwa.

¹³Tuuleni omitima dheni, mu holole oluhodhi; okutuula oonguwo dheni inaku gwana.” Galukileni kOmuwa Kalunga keni. Oye omunambili nomunesilohenda; oye omunalukeno nota dhiginine omauvaneko ge.

¹⁴Pamwe Omuwa ota lundulula omadhiladhilo ge note mu yambeke neloolo lyiimeno. Nena otamu mu yambele iilya nomaviinu.

¹⁵Hikeni ombenda kondundu Sion; gandjeni elombwelo lyeidhiliko, hiyeni oshigongi!

¹⁶Gongeleni aantu ayehe; ya longekidhileni oshigongi oshiyapuki; eteni aantu aakuluntu; gongeleni aanona nuuhanona wo. Nokuli ombushiki na ze mondunda ye nomufuko mondjugo ye, opo ye ye koshigongi.

¹⁷Aayambi mboka taa longele Omuwa pokati koshiyambelo nomweelo gwotempeli, naa lile nokugalikana: “Omuwa, sila aantu yoye ohenda. Ino etha iigwana yilwe, yi tu sithe ohoni noyi tu sheke yi tye: ‘Kalunga keni oku li peni?’ ”

¹⁸Nena Omuwa okwa holola oshimpwiyu nevi lye; okwa li e na ohenda naantu ye.

¹⁹Okwe ya yamukula: “Ngashingeyi otandi ke mu pa iilya nomaviinu nomagadhi gooholivi, notamu ka kuta. Iigwana yilwe itayi ke mu sheka we,

²⁰Otandi ka tidha po oombahu ndhoka dhe ya dha ziilile kuumbangalantu note tidhile dhimwe dhomudho kombuga. Ombinga yokomeho otandi yi tidhile mEfuta lya sa, naandjoka yokonima omEfuta lyopokati. Ndhoka dha sa, otadhi ka nika keolelo. Otandi dhi yonagula po molwaayihe mbyoka dhe mu ningile.

²¹“Malundu, inamu tila, ihe ligoleni nokunyanyukwa omolwaayihe Omuwa e yi mu ningile.

²²Iinamwenyo, inamu tila. Omanapelo oga ziza; omiti odhi ima iiyimati yadho, noku na eloolo lyoonkwiyu nomandjembele.

²³“Yantu yaSion, nyanyukweni. Tundulukilweni mbyoka Omuwa Kalunga keni e yi mu ningile. Okwe mu pe omagano go opala gomvula yokomusheko; okwe mu lokithile omvula yopokufu nomvula yontemuna ngoshitonale.

²⁴Omalupale otaga ka ndumbala iilya; iilambo yomatemba gokukolela otaga ka hunga omaviinu nomagadhi gooholivi.

²⁵Otandi ke mu galulila shoka mwa kanitha momimvo ndhiyaka, sho oombahu dha li po iimeno yeni. Ongame nda tumine oombahu ndhika, dhi mu kondjithe.

²⁶Ngashingeyi otamu ka kala mu na eloolo lyiikulya notamu ka kuta. Otamu ka hambelela Omuwa Kalunga keni, ngoka e mu ningile iikumitha. Aantu yandje itaa ka shekwa we.

²⁷Nena, Israel, oto ka tseya kutya ondi li mokati keni, nokutya ongame Omuwa Kalunga keni nokaku na gulwe. Aantu yandje itaa ka sithwa we ohoni.”

²⁸“Konima yomasiku otandi ka tilila ombepo yandje kushaa ngoka: aana yeni aamati naakadhona otaa ku uvitha oohapu dhandje; aasamane yeni otaa ka yaguma, naagundjuka yeni otaa ka mona omamoniko.

²⁹Pethimbo ndyoka otandi ka tilila ombepo yandje kombanda yaayakuli ayehe, aalumentu naakiintu.

³⁰“Otandi ka gandja omalondodho omolwesiku ndyoka mewangandjo nokombanda yevi; otaku ka kala etikombinzi, omulilo niikogo yolwithi.

³¹Etango otali ka luudha, omwedhi otagu tiligana ngombinzi, manga esiku enene netilithi lyOmuwa inaali thikana.

³²Ihe ayehe mboka taa indile ekwatho kOmuwa, otaa hupithwa. Ngaashi Omuwa a ti: ‘Yamwe muJerusalem otaa ka fadhuka po; oomboka nde ya hogolola, otaa ka hupa ko.’ ”