Read Oshindonga-Ombiimbeli Ondjapuki OBADJA 1 Bible Online

OBADJA 1 - Oshindonga-Ombiimbeli Ondjapuki bible

OBADJA 1

¹Ndika ehunganeko lyaObadja: Omuwa Omupangeliawike ota lombwele oshigwana shaEdom. Omuwa okwa tumu omutumwa gwe kiigwana, otse notu uvu oohapu dhe tadhi ti: “Thikameni! Tu yeni, tu ka hingileni Edom iita!”

²Omuwa ota ti kuEdom: “Otandi ke ku ninga oshimbembe, noshaa ngoka ote ku dhini.

³Einomo lyoye otali ku ningilile mo. Ngoye owa kala mohote yokondundu; egumbo lyoye oli li kokule mokati koondundu; onkee oto ilombwele e to ti: ‘Olye ando ta vulu okuhata ndje pevi?’

⁴Nonando wi itungile egumbo puule ongoshihandhila shekodhi, shi fe ando shi li mokati koonyothi, natango otandi ke ku hata pevi.

⁵“Aafuthi nge taa ya uusiku, otaa yangata po owala ayihe mbyoka ya hala. Aantu nge taa toonona ko omandjembele, aluhe ohaa thigi ko omakukila. Ihe aatondi yoye otaye ku kombo po thiluthilu.

⁶Oluvalo lwaEsau, omaliko geni oga yiwa nago.

⁷Aahangani nangoye oye ku kotokele; oye ku tidha moshilongo shoye. Aantu wa kala nombili nayo, oye ku sinda. Ookuume mboka mwa li iikulya pamwe nayo, oye ku tegele omwigo; otaye ku popi taa ti: ‘Oondunge dhe odhi li nee peni?’

⁸“Esiku tandi geele Edom, otandi ka yona po aanandunge yawo notandi ka thekeka po uunongo wawo.

⁹Oofule yokuTeman otaa ka kala yu uvite uugelele, nomukwiita kehe muEdom ota ka dhipagwa.

¹⁰“Oshoka owa yugu nowa dhipaga aamwanyoko, oluvalo lwaJakob, ngoye oto yonwa po nowa dhinika sigo aluhe.

¹¹Oko wa li wa thikama pooha esiku ndyoka, aatondi sho ya teyagula po omiyelo dhawo. Owa li omwiinayi wa fa aakwiilongo mbeyaka ya yugu po uuyamba waJerusalem noye u topolelathana yo yene.

¹²Ino kala u uvite enyanyu omolwomupya gwaamwanyoko muJuda! Ino nyanyukwa mesiku lyeyonuko lyawo! Ngoye ino keula omoluudhigu wawo!

¹³Ando kwa li inoo gwayela moshilando shaantu yandje, u nyanyukilwe okuhepekwa kwawo nokuyuga po uuyamba wawo mesiku lyuudhigu wawo!

¹⁴Ando kwa li inoo thikama poompagiila, u kwate mboka taa yi ontuku! Ando inoo ya gandja kaatondi mesiku lyuudhigu wawo!

¹⁵“Esiku oli li popepi, uuna ngame, Omuwa, tandi ka pangula iigwana. Edom, shoka wa ningi, oto ke shi ningilwa. Oto ka shunithilwa uuwinayi mboka wa ningi.

¹⁶Aantu yandje oya nu oshitenga oshilulu shegeelo kondundu yandje ondjapuki. Ihe osho iigwana ayihe puushiinda, otayi ka nwa oshitenga shegeelo shi vule sheni muululu; otayi ke shi nwiilila e tayi ka kana po.

¹⁷“Ihe okondundu Sion yamwe taa ka hupa, oyo notayi ka kala eha eyapuki. Ezimo lyaJakob otali ka lala oshilongo, shoka oshawo pautho.

¹⁸Ezimo lyaJakob nolyaJosef otaga ka kala ngomulilo; otaga hanagula po ezimo lyaEsau, ngaashi omulilo tagu fike po etutu. Kape na nando oluvalo lwaEsau talu hupu ko. Ongame Omuwa onde dhi ti.

¹⁹“Aantu taa zi kuumbugantu waJuda, otaa ka kwata po Edom; mboka taa zi kiikulundundu yokuuninginino, otaa ka kwata po evi lyAafilisti; Aaisraeli otaa ka lala oshitopolwa shaEfraim naSamaria; Aabenjamin otaa ka kutha po Gilead.

²⁰Aapongekwa ya zi kuumbangalantu waIsrael, otaa ka galuka nokulala Foinikia, sigo oSarefat. Aapongekwa Aajerusalem mboka ye li muSarefat, otaa ka kwata po iilando yomuNegeb.

²¹Aasindani yokuJerusalem otaa ka matukila Edom notaye shi pangele. Omuwa oye mwenemwene ta ka kala omukwaniilwa.”