Read Oshindonga-Ombiimbeli Ondjapuki JONA 3 Bible Online

JONA 3 - Oshindonga-Ombiimbeli Ondjapuki bible

JONA 3

¹Omuwa okwa lombwele ishewe Jona.

²Okwa ti: “Inda kuNinive, oshilando shiyaka oshinene, u uvithile aantu yasho elaka ndyoka tandi ku pe.”

³Jona okwa vulika kOmuwa e ta yi kuNinive, oshilando oshinene hashi tokolwa momasiku gatatu kolupadhi.

⁴Jona okwa tameke oku shi enda nosho e ende esiku limwe, oku uvitha ta ti: “Oku na omasiku omilongo ne, nena Ninive otashi hanagulwa po.”

⁵Aantu yomuNinive oyi itaale etumwalaka lyaKalunga. Onkee oya tokola okwiidhilika iikulya, naantu ayehe, okuza kaakuluntu sigo okaanona, oya zala omahahi okuholola ngeyi eitedhululo.

⁶Omukwaniilwa gwaNinive sho e shi uvu, okwa zi ko koshipangelapundi she, a hula mo oonguwo dhe dhuukwaniilwa e ta zala ehahi nokwa kuutumba momutoko.

⁷Okwa tumu etumwalaka kaantu yaNinive tali ti: “Elaka ndika olya zi komukwaniilwa nokaambala ye. Otali ti, inapa kala nando ogumwe ta li sha; aantu ayehe, iimuna noonzi oyi indikwa okulya nenge okunwa.

⁸Aantu ayehe niinamwenyo naa zale omahahi. Ayehe naa galikane Kalunga ya mana mo nokweetha omikalo dhawo omiwinayi nuukolokoshi wawo.

⁹Pamwe Kalunga ti igaluluka; ngiika ota geyuluka, natse opo twaa se.”

¹⁰Kalunga okwa mono shoka ya ningi; okwa mono kutya oye etha uuwinayi wawo. Onkee okwi igaluluka noine ya geela, ngaashi a tile.