Read Oshindonga-Ombiimbeli Ondjapuki JONA 4 Bible Online

JONA 4 - Oshindonga-Ombiimbeli Ondjapuki bible

JONA 4

¹Jona okwa yematele shika nokwa geye.

²Okwa galikana ngeyi: “Omuwa, inandi shi popya nale nani, manga inaandi za paandjetu, kutya oto ningi shino? Omolwashika onda li nda hala okuya ontuku kuSpania. Onda li ndi shi shi kutya ongoye Kalunga kohole nokesilohenda, aluhe omutalanteni, aluhe omunambili nowi ilongekidha aluhe okwiigaluluka noito geye.

³Ngashingeyi, Omuwa, etha ndi se. Okusa oku vulile ndje okukala nomwenyo.”

⁴Omuwa okwa yamukula: “Okugeya kwoye oku li tuu mondjila?”

⁵Jona okwa piti mo a yi kuuzilo woshilando e ta kuutumba. Okwi idhikile etsali e ta gondjo momuzile gwalyo a tegelela, a mone Ninive sho tashi ningwa.

⁶Nena Omuwa Kalunga okwa menitha olumono lwa koko edhelele nolwa siikile Jona, opo a kale u uvite hwepo momuzile gwalwo. Jona okwa li a nyanyukilwa olumono nokunyanyukililwa.

⁷Ihe pokutenda kweluwa esiku lya landula ko Kalunga okwa tula ko epuka li thekeke po olumono nolwa si.

⁸Etango sho lya piti, Kalunga okwa pepitha ombepo ompyuumpyuu yokuuzilo. Jona okwa li a lulilwa kuupyu woonte dhetango, sho dhe mu yaha momutse. Okwi ihalele okusa. Okwa ti: “Eso oli vulile ndje omwenyo.”

⁹Kalunga okwa ti kuye: “Oshi li tuu mondjila okugeya omolwolumono?” Jona okwa yamukula: “Eeno, oshi li mondjila, ndi kale nda geya nokwiihalela eso.”

¹⁰Omuwa okwa ti kuye: “Olumono nduka olwa koko muusiku umwe nolwa si po muukwawo wa landula ko.

¹¹Ngoye ino lu kuna noino lu kokitha, ndele ngame ote kala ngiini, ndaa uvitile Ninive, oshilando oshinene, olukeno? Oshi na aanona ye vule 120 000, osho wo iimuna oyindji.”