Read Oshindonga-Ombiimbeli Ondjapuki NUMERI 12 Bible Online

NUMERI 12 - Oshindonga-Ombiimbeli Ondjapuki bible

NUMERI 12

¹Moses okwa hokana omukiintu Omukusha, ihe Miriam naAaron oye shi mu tamanekele.

²Oya ti: “Omuwa ota popi ashike naMoses? Ita popi nando natse?” Omuwa oku uvu shoka ya ti.

³(Moses okwa li omulumentu omwiifupipiki e vule aantu ayehe kombanda yevi.)

⁴Ohaluka Omuwa okwa lombwele Moses, Aaron naMiriam a ti: “Onda hala ne amuhe yatatu mu pite mo mu ye ketsalihangano.” Oyo noya yi ko,

⁵nOmuwa okwa kulukile pohi moluzigi lwoshikogo a thikama posheelo shetsalihangano nokwi igidha a ti: “Aaron! Miriam!” Oyo ayehe yaali oya holoka komeho,

⁶Omuwa nokwa ti: “Ngashingeyi uvii ko shoka tandi popi! Ngele ope na aahunganeki mokati keni, ongame tandi ya ihololele momamoniko notandi ya lombwele moondjodhi.

⁷Ope na eyooloko, ngele otandi popi nomuntu gwandje Moses. Onde mu langeke omudhiginini gwaantu yandje ayehe Aaisraeli.

⁸Otandi popi naye twa talathana oshipala noshipala, sha yela, hamootumbutumbu. Okwa mono nokuli olupe lwandje! Omolwashike ano inaamu tila okusheka omuntu gwandje Moses?”

⁹Omuwa okwe ya geele nokwa zi po.

¹⁰Oshikogo sho sha yeluka po petsalihangano, ohaluka Miriam okwa toka oshilundu a fa omahegele gomongwa. Aaron sho e mu tala nokwa mono, sho a toka oshilundu,

¹¹okwa ti kuMoses: “Tatekulu, ombili, ino tu geelela uulunde wetu mboka twe u ningi muugoya wetu.

¹²Ino mu etha a ninge a fa okahanona ka valwa ka sa, olutu lwako lwo olela kombinga moshivalelo shayina.”

¹³Moses okwa kugile Omuwa ekwatho a ti: “Kalunga, mu aludha!”

¹⁴Omuwa okwa yamukula a ti: “Ando ohe e mu hiyile omayeye moshipala, oku na okuhumbata omupya gwe omasiku gaheyali. Mu yoolola montanda omasiku gaheyali, konima yago ota vulu okugalukila mo.”

¹⁵Miriam okwa li e edhililwa pondje yontanda omasiku gaheyali, naantu inaa huma ko, sigo a galukile mo.

¹⁶Konima yomasiku ngaka aantu oya tembuka muHazerot e taa ka yunga oontanda mombuga Paran.