Read Oshindonga-Ombiimbeli Ondjapuki NUMERI 13 Bible Online

NUMERI 13 - Oshindonga-Ombiimbeli Ondjapuki bible

NUMERI 13

¹Omuwa okwa lombwele Moses a ti:

²“Hogolola gumwe gwomaawiliki mezimo kehe lyomazimo omulongo nagaali, opo u ya tume oondaadhi ya ka ndaadhe evi lyaKaanan, ndyoka tandi ka pa Aaisraeli.”

³Moses okwa tumu aawiliki, ngaashi taa landula: [Ezimo] — [Omuwiliki] Reuben — Shammua yaSakkur Simeon — Shafat yaHori Juda — Kaleb kaJefunne Issaskar — Igal yaJosef Efraim — Hosea yaNun Benjamin — Palti yaRafu Sebulon — Gadiel yaSodi Manasse — Gadi yaSusi Dan — Ammiel yaGemalli Aser — Setur yaMikael Naftali — Nakbi yaVofsi Gad — Geuel yaMaki

¹⁶Ndhika odho oondaadhi ndhoka Moses a tumu, dhi ka ndaadhe oshilongo. Okwa lundulula edhina lyaHosea yaNun, li ninge Josua.

¹⁷Moses sho e dhi tumu, okwa ti kudho: “Indeni lwokuumbangalantu mu ye kuumbugantu waKaanan, sigo omoshilongo shokoondundu.

¹⁸Taleni, evi nkene li li, naantu ye li mo oye thike peni noye na oonkondo dhi thike peni.

¹⁹Taleni, evi ngele ewanawa nenge ewinayi, naantu yalyo ngele oya kala miilando yi li puuyelele nenge oya tungilwa omadhingililokuma ga kola.

²⁰Taleni, evi ngele olyo ondoka nenge olya hekuka, nongele oli na omiti. Seni oshimpwiyu mu etelele iiyimati mbyoka yi li ko.” (Olya li ethimbo lyetiligano lyomandjembele.)

²¹Aalumentu oya yi kuumbangalantu e taa ndaadha evi okuza kombuga Zin muumbugantu ondjila ayihe sigo oRehob, popepi netaulilo lyaHamat muumbangalantu.

²²Tango oya yi kuumbugantu wevi noye ya kuHebron, hoka kwa kala omaludhi gaAhiman, gaSheshai nogaTalmai, oluvalo lwomuhoko gwaalefule halu ithanwa Aayanaki. (Hebron osha tungwa, sho pwa piti omimvo heyali, opo Zoan muEgipiti shi tungwe.)

²³Oye ya mesilu Eshkol noya tete mo ehila lyomandjembele lya humbatwa komutenge kaalumentu yaali ye li inda. Oye eta wo oondunga dhomugranati noonkwiyu.

²⁴(Ehala ndyoka oye li luku Eshkol molwehila lyomandjembele ndyoka Aaisraeli ya tete mo.)

²⁵Sho ya ndaadha evi omasiku omilongo ne, oondaadhi odha shuna

²⁶kuMoses, Aaron nokegongalo alihe lyaIsrael muKadesh mombuga Paran. Oya hokolola shoka ya mono noye ya ulukile iiyimati mbyoka ye yi eta.

²⁷Oya ti kuMoses: “Otwa ndaadha evi notwe li mono kutya olya tondoka shili omahini nomagadhi goonyushi; iiyimati yimwe oyo mbika.

²⁸Ihe aantu mboka ye li mo, oya kola, niilando yawo iinene unene noya kola. Mupyamunene otwa mwene mo wo aalefule, oluvalo lwaAnak.

²⁹Aayamaleki oya kala muumbugantu wevi; Aaheti, Aayebusi nAayamori oya kala moshilongo shokoondundu; Aakaanana oya kala pEfuta lyopokati nokulambalala omulonga Jordan.”

³⁰Kaleb okwa ngungumaneke aantu mboka ya li taa tamaneke Moses e ta ti: “Otatu vulu oku ya matukila noku ya sinda. Otu na oonkondo okulala evi ndyoka.”

³¹Ihe aantu mboka ya yile ko naKaleb, oya ti: “Aawe, katu na oonkondo oku ya matukila. Aantu mbeyaka oye na oonkondo ye tu vule.”

³²Oya taandelitha omutoto mokati kAaisraeli omolwevi ndyoka ya ka ndaadhele. Oya ti: “Evi ndyoka twe endagula, kali na olunza lwokupalutha aakalimo; naantu mboka twa mono, aaleeleka,

³³otwa mwene mo nokuli aalefule, oluvalo lwaAnak. Sho twi itala, otu wete aashuushuka; nomomeho gawo osho tu li wo.”