Read Oshindonga-Ombiimbeli Ondjapuki NUMERI 15 Bible Online

NUMERI 15 - Oshindonga-Ombiimbeli Ondjapuki bible

NUMERI 15

¹Omuwa okwa lombwele Moses a ti:

²“Lombwela Aaisraeli u tye: Ngele tamu ka ya mevi lyokukalamo, ndyoka tandi li mu pe,

³otamu vulu okuyambela Omuwa ongombe ondumentu, onzi ondumentu, onzi nenge oshikombo, shi ninge efikilondjambo nenge ontselelandjambo mokugwanitha euvaneko nenge omuntu ta yamba pahalo lye mwene nenge ondjambo yomoshituthi shontumba; ezimba lyoondjambo ndhika otali opalele Omuwa.

⁴Kehe ngoka ta yambele Omuwa efikilondjambo lyonzi nenge lyoshikombo, ne ete pamwe noshimuna kehe oograma mbali dhuusila womunziya wa lungilwa molita yimwe yomagadhi gooholivi, u ninge ondjambo yiikulya. Ne ete wo olita yimwe yomaviinu ga ninge oshinuwandjambo.

⁶Uuna onzi ondumentu tayi yambwa, pamwe nayo napa yambwe ondjambo yiikulya yoograma ne netata lyuusila womunziya wa lungilwa momagadhi gooholivi golita yimwe noshititano.

⁷Omolwoshinuwandjambo omuntu ne ete olita yimwe noshititano shomaviinu. Ezimba lyoondjambo ndhika otali opalele Omuwa.

⁸Uuna ongombe ondumentu tayi yambelwa Omuwa yi ninge efikilondjambo nenge ontselelandjambo mokugwanitha euvaneko nenge ekwatathanondjambo,

⁹napa yambwe ondjambo yiikulya yuusila womunziya woograma hamano netata wa lungilwa moolita mbali dhomagadhi gooholivi,

¹⁰pamwe noolita mbali dhomaviinu. Ezimba lyondjambo ndjika otali opalele Omuwa.

¹¹“Shika osho shoka tashi ningwa, ngele taku yambwa ongombe ondumentu, onzi ondumentu, onzi nenge oshikombo.

¹²Uuna taku yambwa iimuna yi vule shimwe, pamwe noshimuna kehe naku yambwe ondjambo yasho yiikulya nomaviinu.

¹³Omuisraeli kehe ne shi ninge, uuna ta yamba ondjambo yiikulya, ezimba lya nika nawa tali opalele Omuwa.

¹⁴Pethimbo kehe omukwiilongo a kala mokati keni, kashi na nee mbudhi, okathimbo okafupi nenge ethimbo ele, ta yamba oondjambo dhiikulya, ezimba lya nika nawa tali opalele Omuwa, oku na okugwanitha omautho tuu ngoka.

¹⁵Osho ngaaka omautho ngoka tage mu manga aluhe sigo aluhe one yene naakwiilongo mboka ya kala mokati keni. Ne nayo omu thike pamwe koshipala shOmuwa.

¹⁶Oompango tuu ndhoka dhimwe nomautho tage mu pula, osho nayo wo.”

¹⁷Omuwa okwa lombwele Moses a ti:

¹⁸“Lombwela Aaisraeli u tye: Ngele tamu ka ya mevi ndyoka tandi li mu pe,

¹⁹omu na okugandja omagano kOmuwa miikulya mbyoka tamu li.

²⁰Nge tamu teleke iikwiila, gandjeni oshikwiila shotango shiilya iipe omagano kOmuwa. Nashi ninge ondjambo tayi zi kolupale.

²¹Ondjambo ndjika yomiikwiila ya telekwa miilya iipe, ne omu na oku yi gandja kOmuwa aluhe sigo aluhe.

²²“Ngele otamu ningi epuko noitamu gwanitha oshipango shontumba Omuwa a lombwele Moses,

²³— ano okuza kesiku ndyoka Omuwa a lombwele Moses iipango ye sigo okomaluvalo tage ya ngele itamu gwanitha sha shomiipango —

²⁴ihe egongalo lya yono mokwaashiwo, nali yambe ongombe ondumentu yi ninge efikilondjambo, ezimba lya nika nawa tali opalele Omuwa, pamwe nondjambo yiikulya nomaviinu. Naa yambe wo oshikombo oshilumentu shi ninge eyonondjambo.

²⁵Omuyambi na gwanithe eyelithoyapulo lyegongalo, notali dhiminwa po, oshoka epuko olya li mokwaashiwo, nolye etele Omuwa efikilondjambo neyonondjambo lyalyo.

²⁶Egongalo alihe lyaIsrael naakwiilongo ya kala mokati kawo otaa dhiminwa po, oshoka shaa ngoka okwa li mepuko.

²⁷“Ngele omuntu gumwe oye a yono mokwaashiwo, na yambe oshikombo oshikiintu shomumvo gumwe shi ninge eyonondjambo.

²⁸Poshiyambelo omuyambi ota gwanitha eyelithoyapulo lyomuntu ngoka, nota kala a dhiminwa po.

²⁹Eutho ndika olimwe kukehe ngoka ta yono mokwaashiwo, na kale nee Omuisraeli nenge omukwiilongo a kala mokati kAaisraeli.

³⁰“Ihe omuntu ngoka ta yono owina, na kale nee omuvalelwamo nenge omukwiilongo, oku na ondjo yokuhinda Omuwa noku na okudhipagwa,

³¹oshoka okwa dhini shoka Omuwa a popi nokwa yono owina iipango ye. Okwi ilongela eso.”

³²Esiku limwe manga Aaisraeli ya li mombuga, okwa monika omulumentu ta tyaya iikuni mEsabati.

³³Okwa falwa kuMoses, Aaron negongalo alihe,

³⁴noye mu manga, oshoka inaa tseya nkene ye na oku mu ninga.

³⁵Omuwa okwa ti kuMoses: “Omulumentu ngoka oku na okudhipagwa; egongalo alihe nali mu dhipage nomamanya pondje yoontanda.”

³⁶Egongalo alihe olye mu fala pondje yoontanda e tali mu dhipaga nomamanya, ngaashi Omuwa a lombwele Moses.

³⁷Omuwa okwa lombwele Moses a ti:

³⁸“Lombwela Aaisraeli u tye: Itungileni oondjendjelela dhi endjelele koonkotso dhomizalo dheni ne mu tule ko ongodhi ombulau kondjendjelela kehe. Shika omu na oku shi ninga aluhe sigo aluhe.

³⁹Oondjendjelela ohadhi mu dhimbulutha iipango yandje shaa ethimbo tamu dhi tala, opo mu vulike kuyo; nena itamu pilamene ndje we nokulandula omahalo nuuhalu weni.

⁴⁰Oondjendjelela ohadhi mu dhimbulutha mu dhiginine iipango yandje notamu ningi ihe yandjelela.

⁴¹Ongame Omuwa, Kalunga keni; onde mu tembudha muEgipiti ndi ninge Kalunga keni. Ongame Omuwa.”