Read Oshindonga-Ombiimbeli Ondjapuki NUMERI 19 Bible Online

NUMERI 19 - Oshindonga-Ombiimbeli Ondjapuki bible

NUMERI 19

¹Omuwa okwa popi naMoses naAaron

²e tu uthile Aaisraeli omautho ngaka ta ti: “Eteni ondema ontiligane yaa na oshipo yo inayi tulwa kondjoko,

³mu yi gandje komuyambi Eleasar. Nayi falwe pondje yontanda e tayi dhipagelwa montaneho ye.

⁴Eleasar na kuthe nomunwe gwe mombinzi yayo e te yi ndondele luheyali lwokomeho getsalihangano.

⁵Ondema ayihe, ekunka, onyama, ombinzi niikwamela nayi lungunithwe montaneho yomuyambi.

⁶Omuyambi na kuthe oshiti shomusedeli, oshisopi nongodhi ontiligane e te yi umbile meziko.

⁷Konima yaambika na yoge oonguwo dhe e ti itile omeya nota shuna kontanda, ihe ota kala a nika oshidhila sigo ongulohi.

⁸Omulumentu ngoka a lungunitha po ondema, oku na okuyoga oonguwo dhe nokwiitila omeya, ihe naye wo ota kala a nika oshidhila sigo ongulohi.

⁹Omulumentu gumwe a yogoka na kuthe po omutoko gwondema e te gu fala pehala eyelele pondje yontanda. Nagu pungulilwe egongalo lyAaisraeli, gu longithwe momeya geyelitho. Ohaga yogo po omayono.

¹⁰Omulumentu ngoka a yuku omutoko, na yoge oonguwo dhe, ihe ota kala a nika oshidhila sigo ongulohi. Eutho ndika otali kala aluhe sigo aluhe kAaisraeli nokaakwiilongo ya kala mokati kawo.”

¹¹“Oongoka ta gumu omudhimba, ota kala a kwata oshidhila omasiku gaheyali.

¹²Oku na okwiiyelitha nomeya geyelitho mesiku etitatu nomesiku etiheyali, nota kala a yela. Ihe ngele iti iyelitha momasiku agehe gaali, ita kala a yela.

¹³Oongoka ta gumu omudhimba noini iyelitha, ota kala a kwata oshidhila, oshoka omeya geyelitho inage mu tilwa. Ota nyateke etsalihangano lyOmuwa, noku na okudhimwa mo maantu yaKalunga.

¹⁴“Ngele oku na ngoka ta sile metsali, shaa ngoka ta adhika metsali pethimbo lyetokoko nenge ta yi mo, ota kala a kwata oshidhila omasiku gaheyali.

¹⁵Oshuma kehe metsali shoka shaa na oshisiikilo, otashi kala sha kwata oshidhila.

¹⁶Shaa ngoka ta gumu omuntu a dhipagwa nenge i isila kelundu nenge omuntu ta gumu iipongo yomuntu nenge ombila, ota kala a kwata oshidhila omasiku gaheyali.

¹⁷“Nakukwata oshidhila na kuthilwe mo omutoko gwondema ndjoka ya yambelwa edhimopo lyoondjo, e tagu tulwa moshuma notamu gwedhwa omeya omayelele.

¹⁸Omuntu gumwe a yogoka na kuthe oshisopi, te shi yaya momeya e ta shashamine etsali, ayihe yi li mo naantu ya li mo. Omuntu ngoka omuyelele na shashamine wo omeya komuntu ngoka a guma iipongo yomuntu nenge omudhimba nenge ombila.

¹⁹Mesiku etitatu nomesiku etiheyali omuntu ngoka omuyelele na shashamine omeya komuntu ngoka a kwata oshidhila. Mesiku etiheyali ota yelitha omuntu ngoka. Omuyelithwi na yoge oonguwo dhe nokwiitila omeya, nopeningino lyetango ota kala omuyelele.

²⁰“Shaa ngoka a kwata oshidhila noita iyelitha, ota kala a nika oshidhila, oshoka omeya geyelitho inage mu tilahilwa. Ota nyateke etsalihangano lyOmuwa, noku na okudhimwa mo maantu yaKalunga.

²¹Ne omu na okudhiginina eutho ndika aluhe sigo aluhe. Omuntu ngoka ta shashamine omeya geyelitho, oku na wo okuyoga oonguwo dhe; shaa ngoka ta gumu omeya, ota kala a kwata oshidhila sigo ongulohi.

²²Shaa shoka omuntu ngoka e na oshidhila te shi gumu, otashi nika oshidhila, noshaa ngoka te shi gumu, ota kala a kwata oshidhila sigo ongulohi.”